ছ’চিয়েল মিডিয়াত এন আৰ চি কেন্দ্ৰিক যিকোনো উৰা-বাতৰি বিয়পালে তেনে দুৰ্বৃত্তক দৃষ্টান্তমূলক শাস্তি দিবলৈ আৰক্ষী সাজু হৈ আছে। তাৰ বাবে ছ’চিয়েল মিডিয়াত অসম আৰক্ষীয়ে শেনচকু ৰাখিছে।
আজি উলুবাৰীস্থিত অসম আৰক্ষীৰ মুখ্য কাৰ্য্যালয়ত এখন সংবাদমেল সম্বোধন কৰি এই কথা জনালে আৰক্ষী সঞ্চালক প্ৰধান কুলধৰ শইকীয়াই।
৩১ আগষ্টত পুৱা ১০ বজাত উন্নীতকৃত ৰাষ্ট্ৰীয় নাগৰিকপঞ্জীৰ চূড়ান্ত তালিকা প্ৰকাশ পাব।
বহু প্ৰত্যাশিত এই ৰাষ্ট্ৰীয় নাগৰিকপঞ্জীত বহুতো ভাৰতীয়ৰ নাম নথকাৰ শংকা কৰি বিভিন্ন দল-সংগঠনে বিভিন্ন ধৰণৰ আন্দোলন আদিৰ ভাবুকি দি আহিছে। আন কিছু সংখ্যক দল-সংগঠনে এন আৰ চিত বিদেশীৰ নাম অন্তৰ্ভুক্ত হোৱা বুলিও উৰাবাতৰি বিয়পাই আছে।
এইবোৰ দিশলৈ লক্ষ্য ৰাখি ৰাজ্যৰ আইন-শৃংখলা পৰিস্থিতি সন্দৰ্ভত আৰক্ষী সঞ্চালক প্ৰধানজনে কেইবাটাও গুৰুত্বপূৰ্ণ পদক্ষেপ লোৱাৰ কথা ৰাজহুৱা কৰে।
যোৱা ২৩ আগষ্টত জিলা উপায়ুক্ত আৰু আৰক্ষী অধীক্ষকসকলৰ সৈতে বৈঠক অনুষ্ঠিত কৰিছিল। আৰক্ষী অধীক্ষকক নিজা ববীয়াকৈ আৰক্ষী বাহিনী মোতায়েন কৰা আৰু ৰাইজৰ মাজত সজাগতা বৃদ্ধিৰ বাবে পদক্ষেপ লোৱাৰ বাবে কোৱা হৈছে। ৰাইজৰ সজাগতা বৃদ্ধিৰ বাবে বিভিন্ন গাঁৱত ৰাজহুৱা সভা পাতিছে আৰক্ষীয়ে। জনালে সঞ্চালক প্ৰধানজনে।
ছ’চিয়েল মিডিয়াত উৰাবাতৰি বিয়পোৱা লোকৰ পোষ্ট দেখিলে আৰক্ষীক অৱগত কৰিবলৈ সকলোকে আহ্বান জনাইছে সঞ্চালক প্ৰধানজনে। এই ক্ষেত্ৰত সংবাদ মাধ্যম আৰু জনসাধাৰণৰ সহযোগিতা বিচাৰে সঞ্চালক প্ৰধান শইকীয়াই। খচৰা প্ৰকাশৰ সময়ত যিদৰে ৰাইজে সহায়-সহযোগিতা আগ বঢ়াইছিল এইবাৰো শান্তি-সম্প্ৰীতি বজাই ৰাখিবলৈ আহ্বান জনায়।
পূৰ্বে থকা ১৬৪টা কোম্পানিৰ উপৰি কেন্দ্ৰৰ ফালৰ পৰা সামৰিক বাহিনীৰ ৫১টা কোম্পানি নতুনকৈ প্ৰেৰণ কৰা হৈছে, জনালে সঞ্চালক প্ৰধানজনে।
