ধেমাজিৰ চিচিবৰগাঁও আৰক্ষী চকীত নিপন নাথ নামৰ এগৰাকী আৰক্ষী উপ পৰিদৰ্শকে নিজৰ ছাৰ্ভিচ পিষ্টলেৰে গুলীয়াই আত্মহত্যা কৰা ঘটনাক লৈ সমগ্ৰ অঞ্চলটোত চাঞ্চল্যৰ সৃষ্টি হৈছে।
শুকুৰবাৰে ৰাতিপুৱা আত্মহত্যা কৰা আৰক্ষী উপ পৰিদৰ্শকগৰাকীৰ ঘৰ কামৰূপ গ্ৰাম্য জিলাৰ ৰঙিয়াৰ মধুকুছিত।
আনহাতে, নিপন নাথৰ আত্মহত্যা সম্বন্ধে গুৰুতৰ অভিযোগ উত্থাপন কৰিছে পৰিয়ালৰ লোকে।
থানাৰ ভাৰপ্ৰাপ্ত বিষয়া পদ্মেশ্বৰ বৰকটকীৰ মানসিক নিৰ্যাতনত অতিষ্ঠ হৈয়ে নাথে আত্মহত্যাৰ দৰে ভয়ংকৰ পথ বাছি লবলগীয়া হয় বুলি পৰিয়ালৰ লোকে অভিযোগ কৰে।
পৰিয়ালৰ লোকসকলে সমগ্ৰ ঘটনাৰ উচিত তদন্তৰ দাবী জনাই শীঘ্ৰে দোষীক শাস্তি প্ৰদানৰ বাবে আহ্বান জনায়।
কৰ্তব্যৰত অৱস্থাত এগৰাকী আৰক্ষী উপ পৰিদৰ্শকে এনেদৰে আত্মহত্যা কৰিবলগীয়া হোৱা ঘটনাক সহজভাৱে লব পৰা নাই সচেতন লোকসকলে।
ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে আৰু মৃত নিপন নাথৰ মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে।
উল্লেখযোগ্য যে, অসম আৰক্ষীৰ কৰ্তব্যৰত জোৱানে আত্মহত্যা কৰাৰ এয়া নতুন ঘটনা নহয় ইয়াৰ পূৰ্বেও বিভিন্ন সময়ত বিভিন্ন কাৰণত আৰক্ষী জোৱানে আত্মহত্যা কৰিছিল।