বানপানীৰ বাবে মিচিং স্বায়ত্তশাসিত পৰিষদৰ নিৰ্বাচনী ভোটাৰ তালিকা প্ৰস্তুতি আৰু প্ৰচাৰৰ সময়সূচী সলনি
অসম ৰাজ্যিক নিৰ্বাচন আয়োগে আগন্তুক ২০২৬ চনৰ মিচিং স্বায়ত্তশাসিত পৰিষদৰ নিৰ্বাচনৰ বাবে ভোটাৰ তালিকা প্ৰস্তুত আৰু প্ৰকাশৰ সময়সূচী সলনি কৰিছে। ৰাজ্যখনত চলি থকা ভয়াবহ বানৰ ফলত সৃষ্টি হোৱা অসুবিধাৰ বাবেই এই সিদ্ধান্ত লোৱা হৈছে বুলি আয়োগে জানিবলৈ দিছে।
যোৱা ২১ জুলাই, মঙলবাৰে জাৰি কৰা এখন জাননীত আয়োগে উল্লেখ কৰিছে যে বানত আক্ৰান্ত অঞ্চলসমূহত ভোটাৰ তালিকা প্ৰস্তুত কৰাৰ কামটো পুৰণি সময়সূচী অনুসৰি শেষ কৰিব পৰা হোৱা নাছিল। নিৰ্বাচনী প্ৰক্ৰিয়াটো সুচাৰুৰূপে সম্পূৰ্ণ কৰিবলৈ আৰু যোগ্য ভোটাৰসকলক নাম পঞ্জীয়ন তথা শুধৰণি কৰাৰ বাবে পৰ্যাপ্ত সুযোগ প্ৰদান কৰিবলৈ এই নতুন সময়সূচী প্ৰস্তুত কৰা হৈছে।
মিচিং স্বায়ত্তশাসিত পৰিষদ (নিৰ্বাচন) নিয়ম, ২০০৫ ৰ ১৬ নং নিয়মৰ অধীনত লাভ কৰা ক্ষমতা প্ৰয়োগ কৰি আয়োগে ঘোষণা কৰিছে যে এতিয়া খচৰা ভোটাৰ তালিকা ২০২৬ চনৰ ২৯ জুলাইত প্ৰকাশ পাব। দাবী আৰু আপত্তি দাখিল কৰাৰ অন্তিম তাৰিখ ১৩ আগষ্ট নিৰ্ধাৰণ কৰা হৈছে আৰু এই দাবী তথা আপত্তি সমূহ ২০ আগষ্টৰ ভিতৰত নিষ্পত্তি কৰা হ‘ব।
এই নতুন কাৰ্যসূচী অনুসৰি, ২০২৬ চনৰ মিচিং স্বায়ত্তশাসিত পৰিষদৰ নিৰ্বাচনৰ চূড়ান্ত ভোটাৰ তালিকা ২০২৬ চনৰ ২৪ আগষ্টত প্ৰকাশ কৰা হ‘ব। আয়োগে স্পষ্ট কৰি দিছে যে যোৱা ৩০ জুন, ২০২৬ তাৰিখে জাৰি কৰা পূৰ্বৰ জাননীৰ আন সকলো নিয়ম আৰু চৰ্ত একেই থাকিব। অসমৰ কেইবাখনো জিলাত বানেস্বাভাৱিক প্ৰশাসনিক কাম-কাজত ব্যাঘাত জন্মোৱাৰ সময়তে সকলো নিয়মীয়া প্ৰক্ৰিয়া সুকলমে সম্পূৰ্ণ কৰাৰ স্বাৰ্থত কৰ্তৃপক্ষই এই নিৰ্বাচনী সময়সূচী সলনি কৰিবলৈ বাধ্য হৈছে।