অসমৰ প্ৰয়াত শিল্পী জুবিন গাৰ্গৰ ভগ্নী পামী বৰঠাকুৰে আদালতত এক গুৰুতৰ অভিযোগ উত্থাপন কৰিছে। মঙলবাৰে আদালতত তেওঁৰ জেৰা সমাপ্ত হোৱাৰ পিছত সংবাদ মাধ্যমৰ আগত তেওঁ কয় যে প্ৰতিৰক্ষা পক্ষৰ উকীলসকলে জুবিন গাৰ্গক আদালতত এজন মদাহী হিচাপে প্ৰতিপন্ন কৰিবলৈ অহৰহ চেষ্টা চলাইছে। জুবিন গাৰ্গে অসমীয়া সমাজ আৰু সংস্কৃতিলৈ আগবঢ়োৱা অৱদানক আওকাণ কৰি তেওঁক কেৱল এজন নিচাসক্ত ব্যক্তি হিচাপে দেখুৱাবলৈ চেষ্টা কৰাত ভগ্নী পামী বৰঠাকুৰে গভীৰ দুখ প্ৰকাশ কৰিছে।
তেওঁ আক্ষেপ কৰি কয় যে যিজন মানুহে অসমক বিশ্বৰ দৰবাৰত প্ৰতিষ্ঠা কৰিলে, তেনে এজন ব্যক্তিক আদালতত মদাহী সজোৱাটো সঁচাকৈয়ে দুখজনক। প্ৰতিৰক্ষা পক্ষৰ এই দাবীক প্ৰশ্ন কৰি তেওঁ কয় যে যদি জুবিন সঁচাকৈয়ে তেনেকুৱাই আছিল, তেন্তে তেওঁ ইমানবোৰ গান লিখিবলৈ বা সুৰ দিবলৈ কেতিয়া সময় পালে? তেওঁৰ ৫২ বছৰীয়া জীৱনত অসমীয়া চিনেমাৰ বাবে কাম কৰিবলৈ, মানুহক সহায় কৰিবলৈ আৰু ইমানবোৰ অনুষ্ঠানত অংশগ্ৰহণ কৰিবলৈ কেনেকৈ সক্ষম হ’ল বুলিও তেওঁ প্ৰশ্ন কৰে। প্ৰতিৰক্ষা পক্ষই জুবিন গাৰ্গৰ শিল্পীসত্তা আৰু সামাজিক অৱদানক একেবাৰে পাহৰি গৈ তেওঁ ২৪ ঘণ্টাই নিচাত আৱদ্ধ হৈ আছিল বুলি প্ৰমাণ কৰিব বিচৰা কাৰ্যই তেওঁক মৰ্মাহত কৰিছে।
ইয়াৰ উপৰিও প্ৰতিৰক্ষা পক্ষই জুবিন গাৰ্গৰ ব্যক্তিগত জীৱনক লৈয়ো প্ৰশ্ন উত্থাপন কৰে। তেওঁলোকে দাবী কৰে যে জুবিন ঘৰত প্ৰায় নাথাকেই আৰু বেছিভাগ সময় বাহিৰতেই কটায়। ভগ্নী পামীয়ে কয় যে যিজন ব্যক্তিয়ে নিজৰ গোটেই জীৱন অসম আৰু অসমীয়া সংস্কৃতিৰ বাবে উচৰ্গা কৰিলে, তেওঁৰ বিৰুদ্ধে এনে দাবী মানি লোৱা টান। পামীয়ে কয় যে তেওঁৰ ভাতৃয়ে অসমৰ বাবে কাম কৰি থাকোঁতেই প্ৰাণ হেৰুৱালে। আটাইতকৈ আচৰিত কথাটো হ’ল, প্ৰতিৰক্ষা পক্ষৰ উকীলসকলো অসমীয়া, কিন্তু জেৰাৰ সময়ত তেওঁলোকে নিজৰ পেচাৰ দোহাই দি সম্পূৰ্ণ বেলেগ ৰূপত আৱিৰ্ভাৱ হয়। আনকি জেৰা আৰম্ভ কৰাৰ আগতে একাংশ উকীলে নিজকে জুবিন গাৰ্গৰ ডাঙৰ অনুৰাগী বুলিও পৰিচয় দিছিল।
যোৱা চাৰি-পাঁচ দিন ধৰি চলা এই জেৰাৰ সময়ত পামী বৰঠাকুৰ কেইবাবাৰো আৱেগিক হৈ কান্দি পেলাইছিল। ভাতৃৰ মৃত্যু বা হত্যাৰ বিষয়ে বাৰে বাৰে আলোচনা কৰা আৰু অভিযুক্তসকলক সন্মুখত দেখি তেওঁ মানসিকভাৱে ভাগি পৰিছিল যদিও নিজৰ আৱেগক নিয়ন্ত্ৰণ কৰি তেওঁ নিজৰ স্থিতিত আৰু প্ৰমাণত অটল থাকে। জেৰাৰ সময়ত তেওঁক আৱেগিকভাৱে দুৰ্বল কৰি তেওঁৰ ভাষ্য সলনি কৰিবলৈ বা নিৰ্বাক কৰিবলৈ চেষ্টা কৰা হৈছিল নেকি বুলি সোধা এক প্ৰশ্নৰ উত্তৰত তেওঁ হয় বুলি উত্তৰ দিয়ে। তেওঁ কয় যে ভাতৃৰ হত্যাৰ বিষয়ে কোৱাৰ সময়ত তেওঁক আৱেগিক কৰিবলৈ কিছুমান প্ৰশ্ন কৰা হৈছিল, কিন্তু তেওঁ এই সকলোবোৰ প্ৰত্যাহ্বান সফলতাৰে অতিক্ৰম কৰে বুলি সংবাদ মাধ্যমৰ আগত প্ৰকাশ কৰে।
