‘অসম সাহিত্য সভাই দুয়োখন দেশৰ সেঁতু বন্ধনৰ বাবে যি কৰিব লাগে কৰিম।‘ চানমাৰিত চলি থকা ৩২ তম গুৱাহাটী গ্ৰন্থমেলাত চতুৰ্থ দিনা বংগ বন্ধু শ্বেখ মজিবুৰ ৰহমানৰ ‘অসমাপ্ত আত্মজীৱনী’ উন্মোচন কৰি ভাষণ প্ৰসংগত এই মন্তব্য কৰে অসম সাহিত্য সভাৰ সভাপতি ড০ পৰমানন্দ ৰাজবংশীয়ে।
তেওঁ লগতে কয়, ‘বাংলাদেশৰ মানুহ কঠোৰ পৰিশ্ৰমী, অসমৰ মানুহ কঠোৰ পৰিশ্ৰমী নহয়।‘
তদুপৰি ৰাজবংশীয়ে ভৱিষ্যতবাণী কৰি কয়, ‘’বাংলাদেশৰ অৰ্থনৈতিক ভেটি টনকিয়াল হ’লে ভাৰতলৈ আৰু কেতিয়াও বাংলাদেশী নাহে।‘’
ইপিনে, বাংলাদেশৰ অৰ্থনৈতিক ভেটিক লৈ মন্তব্য কৰোঁতেই তেওঁ টানি আনে ভাৰতৰ এক প্ৰসংগ। তেওঁ কয়, ‘’ভাৰতবৰ্ষ অৰ্থনৈতিকভাৱে পিছ পৰি গ’লে বাংলাদেশলৈ প্ৰব্ৰজন হ’ব। তাৰ পৰাও ভাৰতলৈ অহা প্ৰব্ৰজন বন্ধ হ’ব।‘’
তেওঁ ভাৰতৰ ছাত্ৰ-ছাত্ৰীসকলৰ প্ৰতি আহ্বান জনাই কয়, ‘’আমাৰ ছাত্ৰ-ছাত্ৰীসকল বাংলাদেশলৈ যাওঁক, এসময়ত এইখন আমাৰেই দেশ আছিল।‘’
‘’অসম আৰু বাংলাদেশৰ মাজত কোনো পাৰ্থক্য নাই, পাৰ্থক্য মাথোঁ ৰাজনৈতিক,‘’ ভাষণ প্ৰসংগত এইদৰে কয় ৰাজবংশীয়ে।
ৰাজবংশীয়ে লগতে কয়, ‘’উজনি অসমত বিহু যেনেকৈ জনপ্ৰিয় ঠিক তেনেকৈ পশ্চিম অসম আৰু বাংলাদেশত অধিক জনপ্ৰিয় কিষাণ গান, ভয়াচৎকা।‘‘
আনহাতে, বাংলাদেশী বুলি কোৱাৰ লগে লগে বৰ্তমান অসমৰ মানুহৰ মাজত অস্বস্তিৰ সৃষ্টি হোৱা দেখিবলৈ পোৱা গৈছে বুলি উল্লেখ কৰি তেওঁ কয়, ‘’ইয়াৰ জৰিয়তে উত্তৰ প্ৰজন্মৰ মাজত এক বিষবাস্প বিয়পাই দিয়াৰ চেষ্টা কৰা হৈছে।‘’
ইপিনে, বাংলাদেশৰ অৰ্থনৈতিক ভেটি সুদৃঢ় কৰাৰ ক্ষেত্ৰত ভাৰত চৰকাৰ আৰু বাংলাদেশ চৰকাৰে কেতবোৰ গুৰুত্বপূৰ্ণ পদক্ষেপ হাতত লোৱা বুলি কয়।
‘’বাংলাদেশৰ প্ৰধান মন্ত্ৰী শ্বেখ হাচিনা আৰু প্ৰধান মন্ত্ৰী নৰেন্দ্ৰ মোদীয়ে এক গুৰুত্বপূৰ্ণ আলোচনা চলাই আছে। এই আলোচনাত দেশ দুখনৰ উচ্চ আয়ুক্ত দুগৰাকী জৰিত,’‘-ভাষণ প্ৰসংগতে এই কথা ব্যক্ত কৰে ৰাজবংশীয়ে।
ৰাজবংশীয়ে দাবী কৰা মতে, ‘’এই গুৰুত্বপূৰ্ণ কামতো হৈছে বাংলাদেশত অসমৰ দাঁতিকাষৰীয়া বহু অঞ্চল আছে। সেই সমগ্ৰ অঞ্চলৰ মানুহখিনিক অৰ্থনৈতিকভাৱে সবল কৰাৰ বাবে বিভিন্ন পদক্ষেপ হাতত লৈছে। পদ্মা নদীৰ ওপৰত দলং সজাৰ কাম আৰম্ভ কৰিছে বাংলাদেশ চৰকাৰে।‘’
আনহাতে, বাংলাদেশৰ অৰ্থনৈতিক উন্নয়নৰ কাৰণে ভাৰত তথা অসম চৰকাৰে বহুখিনি সহায় কৰিছে বুলি ৰাজবংশীয়ে কয়।
এইক্ষেত্ৰত দুয়োখন চৰকাৰকে ধন্যবাদ জ্ঞাপন কৰি তেওঁ লগতে কয়, ‘’ভাষা-সংস্কৃতিৰ মাজতো সমন্বয় ৰক্ষা কৰিবৰ বাবে অসম সাহিত্য সভাই এখন দলং সাজিব লাগিব।‘’
ইপিনে, উক্ত গ্ৰন্থখনৰ উন্মোচনী অনুষ্ঠানত অংশগ্ৰহণ কৰি অসমীয়াতে ভাষণ আৰম্ভ কৰি সমূহ অসমবাসী তথা ‘’অসমাপ্ত আত্মজীৱনী’’ শীৰ্ষক গ্ৰন্থখনৰ অসমীয়া অনুবাদক ব্যতিক্ৰমী মাছদ’ৰ সভাপতি ড০ সৌমেন ভাৰতীয়াই কৃতজ্ঞতা জ্ঞাপন কৰে।
তদুপৰি, তেওঁ অসমৰ বীৰ লাচিত বৰফুকন, মুক্তিযোদ্ধা তৰুণৰাম ফুকন আৰু মণিৰাম দেৱানৰ নাম বৰ্তমানো বিশ্বৰ দৰবাৰত প্ৰতিষ্ঠিত নোহোৱাৰ বাবে আক্ষেপ প্ৰকাশ কৰে। লগতে চক্ৰেটিছ, চেইক্সপিয়েৰৰ দৰে এই বীৰসকলৰ নামো বিশ্বৰ দৰবাৰত প্ৰতিষ্ঠা কৰিবৰ বাবে সকলোৱে প্ৰয়াস কৰিব লাগিব বুলিও তেওঁ কয়।
