কোভিডৰ পিছত অসমত উত্থান হৈছ হাৰ্ট এটেক আৰু প্ৰেচাৰ ষ্ট্ৰোকত মৃত্যু হোৱা লোকৰ সংখ্যা। ঢেকিয়াজুলিৰ আৰ টি আই কৰ্মী দিলীপ নাথে দাখিল কৰা আৰ টি আইৰ জৰিয়তে পোহৰলৈ আহিছে ভয়ংকৰ তথ্য।
আৰ টি আইৰ পৰা পোৱা তথ্য অনুসৰি ২০১৮ চনৰ পৰা ২০২৪ চনৰ মে’ মাহলৈকে মাত্ৰ তিনিখন চৰকাৰী চিকিৎসালয় — ডিব্ৰুগড়ৰ অসম চিকিৎসা মহাবিদ্যালয়, তেজপুৰ চিকিৎসা মহাবিদ্যালয় আৰু গুৱাহাটী চিকিৎসা মহাবিদ্যালয়ত হৃদৰোগ সম্পৰ্কীয় অৱস্থা আৰু উচ্চ ৰক্তচাপত ৩,১৯৫ জন লোকৰ মৃত্যু হৈছে। ২০২২ চনৰ পৰা এনে মৃত্যুৰ হাৰ লক্ষণীয়ভাৱে বৃদ্ধি পোৱা দেখা গৈছে।
ডিব্ৰুগড় চিকিৎসা মহাবিদ্যালয়ত ২০১৮ চনত ২৫৭ গৰাকী লোক হৃদ ৰোগ আৰু উচ্চ ৰক্তচাপত মৃত্যু হৈছিল আৰু ই ২০২৩ চনত ৩২৭ জনলৈ বৃদ্ধি পাইছে। ২০২৪ চনৰ মে’ মাহলৈকে ইতিমধ্যে ১২৬ জনৰ লোকৰ এনেদৰে মৃত্যু হৈছে।
একেদৰে তেজপুৰ মেডিকেল কলেজত উচ্চ ৰক্তচাপৰ মৃত্যুৰ হাৰ ২০১৮ চনত ১৮০ৰ আছিল যদিও ২০২২ চনত ২৯৭লৈ বৃদ্ধি পাইছে। ২০২৪ চনতো একেদৰে ৯৮জনৰ মৃত্যু হৈছে।
গুৱাহাটী মেডিকেল কলেজতো ২০১৮ চনৰ পৰা ২০২৩ চনৰ ছেপ্টেম্বৰৰ ভিতৰত হৃদযন্ত্ৰ আৰু ষ্ট্ৰোক সম্পৰ্কীয় ৰোগত মুঠ ২,৩৩৩ জন লোকৰ মৃত্যু হৈছে। ইয়াৰে ২০২২ চনত ৪৬৪ জন আৰু ২০২৩ চনৰ মাত্ৰ ৯ মাহত ৪৪৫ জনৰ মৃত্যু হৈছে।
তথ্যৰ পৰা এটা কথা যে কোভিড মহামাৰীৰ সময়ৰ (২০১৯–২০২১)ৰ তুলনাত ক’ভিডৰ পিছত এনে মৃত্যুৰ সংখ্যা অধিক। ২০২০ চনত অসম মেডিকেল কলেজত হৃদযন্ত্ৰৰ ৰোগৰ ফলত ১৭৫ জন লোকৰ মৃত্যু হোৱা বুলি জানিব পৰা গৈছে। ২০২২ চনত ৩২০ আৰু ২০২৩ চনত ৩২৭ জনৰ মৃত্যু হৈছে।
সেয়েহে, সততে প্ৰশ্নৰ উত্থাপন হৈছে যে কোভিডৰ প্ৰতিষেধকৰ পাৰ্শ্বক্ৰিয়াৰ বাবেই হৃদৰোগ আৰু উচ্চ ৰক্তচাপত মৃত্যুৰ সংখ্যা বৃদ্ধি পাইছে নেকি?
উল্লেখ্য যে পুনেৰ এজন আবেদনকাৰীয়ে দাখিল কৰা আৰ টি আইৰ তথ্যত প্ৰকাশ পাইছে যে ভাৰতীয় চিকিৎসা গৱেষণা পৰিষদ (আই চি এম আৰ) আৰু কেন্দ্ৰীয় ঔষধ মান নিয়ন্ত্ৰণ সংস্থাই ২০২৩ চনৰ জানুৱাৰী মাহত ক’ভিড-১৯ৰ ভেকচিনৰ সম্ভাৱ্য পাৰ্শ্বক্ৰিয়া স্বীকাৰ কৰিছিল। কিন্তু স্বাস্থ্য আৰু পৰিয়াল কল্যাণ মন্ত্ৰালয়ে এই কথা অস্বীকাৰ কৰিছিল।
