প্ৰতিদিন আৰু প্ৰতিদিন টাইমৰ সাংবাদিক নজৰুল ইছলামৰ লগতেপ্ৰাগ নিউজৰ সাংবাদিক তুলসী মান্তাক জাগীৰোড সমষ্টিৰ বিধায়ক তথা অসমৰ এগৰাকী মন্ত্ৰী পীযুষ হাজৰিকাই চোঁচৰাই নিয়াৰ লগতে ঠেং ভাগি দিয়াৰ দৰে মাৰাত্মক ভাবুকি প্ৰদান কৰাৰ বিষয়টোকলৈ উত্তাল হৈ আছে সমগ্ৰ ৰাজ্য।
এনে সময়তে অসম ৰাজ্যিক সাংবাদিক সন্থাৰ মৰিগাঁও জিলা সমিতিয়ে দুই সাংবাদিকক ভাবুকি প্ৰদান কৰা মন্ত্ৰী পীযুষ হাজৰিকাক ২৪ ঘণ্টাৰ ভিতৰত গ্ৰেপ্তাৰ কৰাৰ দাবী জনাই অসমৰ আৰক্ষী সঞ্চালক প্ৰধানলৈ এখন স্মাৰকপত্ৰ প্ৰেৰণ কৰিছে।
অসম ৰাজ্যিক সাংবাদিক সন্থাৰ মৰিগাঁও জিলা সমিতিৰ কাৰ্যকৰী সভাপতি প্ৰণৱ গোস্বামী আৰু সম্পাদক মিণ্টু কুমাৰ মেধিয়ে স্বাক্ষৰ কৰা স্মাৰকপত্ৰ খনত এই বুলি উল্লেখ কৰা হৈছে যে মন্ত্ৰীগৰাকীৰ পৰা ভাবুকি পোৱাৰ পিছতে ভুক্তভোগী সাংবাদিক দুগৰাকীয়ে জাগীৰোড থানাত এজাহাৰ দাখিল কৰিছে।
কিন্তু মন্ত্ৰী গৰাকীৰ বিৰুদ্ধে এতিয়ালৈকে আৰক্ষীয়ে কোনো ব্যৱস্থা গ্ৰহণ নকৰাত সংগঠনটোৱে আশ্বৰ্য প্ৰকাশ কৰিছে।
সেয়ে ২৪ ঘণ্টাৰ ভিতৰত অভিযুক্ত মন্ত্ৰী গৰাকীক গ্ৰেপ্তাৰৰ দাবী জনাই অসম ৰাজ্যিক সাংবাদিক সন্থাৰ মৰিগাঁও জিলা সমিতিয়ে আৰক্ষী সঞ্চালক প্ৰধানলৈ স্মাৰকপত্ৰ প্ৰেৰণ কৰে।
স্মাৰকপত্ৰ খনত কোৱা হৈছে যে মন্ত্ৰীৰ দৰে এক গুৰুত্বপূৰ্ণ পদবীত অধিষ্ঠিত হৈ থাকি পীযুষ হাজৰিকাই যি কাৰ্য কৰিছে সেয়া অতি ভয়াৱহ।
কেৱল সেই সাংবাদিক দুগৰাকীয়েই নহয়, আন সাংবাদিক সকলো সুৰক্ষিত নহয় বুলি সংগঠনটোৱে আশংকা ব্যক্ত কৰিছে।
মন্ত্ৰী পীযুষ হাজৰিকাক ২৪ ঘণ্টাৰ ভিতৰত গ্ৰেপ্তাৰ নকৰিলে অসম ৰাজ্যিক সাংবাদিক সন্থাই তীব্ৰ গণতান্ত্ৰিক আন্দোলনৰ কাৰ্যসূচী গ্ৰহণ কৰিব বুলিও আৰক্ষী সঞ্চালক প্ৰধানগৰাকীলৈ লিখা স্মাৰকপত্ৰত স্পষ্ট কৰি দিছে।
