পঞ্জাৱৰ অমৃতসৰ গুৰু নানকদেৱ বিশ্ববিদ্যালয়ৰ ইণ্ডোৰ ষ্টেডিয়ামত অনুষ্ঠিত হোৱা ৰাষ্ট্ৰীয় জুনিয়ৰ পেনঞ্চাক চিলাট চেম্পিয়নশ্বিপত ব্ৰঞ্জৰ পদক লাভ কৰে অসমৰ লাকী দাসে।
লাকী দাস ধনশিৰি মহকুমাৰ সৰুপথাৰৰ চুঙাজান উচ্চ মাধ্যমিক বিদ্যালয়ৰ ছাত্ৰী।
প্ৰতিযোগিতাখনৰ ৫৮ কেজি শাখাত অংশগ্ৰহণ কৰি লাকীয়ে ব্ৰঞ্জৰ পদক দখল কৰি সমগ্ৰ অসমৰ লগতে ধনশিৰি মহকুমালৈ গৌৰৱ কঢ়িয়াই আনে।
প্ৰতিভাৱান খেলুৱৈগৰাকীয়ে গগন চন্দ্ৰ বড়োৰ তত্বাৱধানত প্ৰশিক্ষন গ্ৰহন কৰি এই সফলতা অৰ্জন কৰিবলৈ সক্ষম হয়।
উল্লেখযোগ্য যে, পঞ্জাৱত ১৯ আগষ্টৰ পৰা ২১ আগষ্টলৈ অনুষ্ঠিত হোৱা প্ৰতিযোগিতাখনত দেশৰ বিভিন্ন প্ৰান্তৰ খেলুৱৈয়ে অংশগ্ৰহণ কৰিছিল।
আনহাতে, ব্ৰঞ্জৰ পদক দখল কৰি উৎফুল্লিত হৈ পৰিছে অসমৰ খেলুৱৈগৰাকী।
তেওঁ এই সফলতাৰ বাবে প্ৰশিক্ষকৰ লগতে ৰাজ্যৰ প্ৰতিগৰাকী ক্ৰীড়া অনুৰাগীক ধন্যবাদ জ্ঞাপন কৰে।
