গোলাঘাট জিলাৰ নুমলীগড়ৰ ধলাগুৰি চাহ বাগিচাত হাতীৰ উপদ্ৰৱৰ পৰা ৰক্ষা পোৱাৰ বাবে বাগিচাৰ কৰ্তৃপক্ষই গ্ৰহণ কৰিছে অভিনৱ কৌশল।
বনাঞ্চলৰ পৰা ওলাই আহি জনাঞ্চলত প্ৰৱেশ কৰি বন্যহস্তীৰ জাকে দিনে-নিশাই তাণ্ডৱ সৃষ্টি কৰি আহিছিল। ফলত বাগিচা কৰ্তৃপক্ষই এই বন্যহস্তীৰ সন্ত্ৰাস ৰোধ কৰিবৰ বাবেই অভিনৱ কৌশল গ্ৰহণ কৰে।
কৰ্তৃপক্ষই বাগিচাখনৰ হাতী অহা-যোৱা কৰা পথত স্থাপন কৰিছে তিনিটাকৈ ফাইবাৰে নিৰ্মাণ কৰা বৃহৎ আকাৰৰ জিৰাফৰ মূৰ্তি। ফলত বন্যহস্তীৰ জাকে এই বৃহৎ আকাৰৰ জিৰাফৰ মূৰ্তিটো দেখি সলাবলৈ বাধ্য হৈছে নিজৰ পথ।
জিৰাফৰ মূৰ্তি স্থাপন কৰাৰ পিছৰে পৰা অঞ্চলটোত হ্ৰাস পাইছে বন্যহস্তীৰ উপদ্ৰৱ। পূৰ্বতে বন্যহস্তীৰ জাকে বাগিচাখনত প্ৰৱেশ কৰি চাহ গছকে ধৰি বহুতো ধ্বংস কৰিছিল।
‘বন্যহস্তীৰ জাকে বিগত এটা সপ্তাহত দুই-তিনিবাৰকৈ বাগিচাখনত প্ৰৱেশ কৰিছিল। বন্যহস্তীৰ জাকটোৱে কোনো লোকক আক্ৰমণ কৰা নাই যদিও বাগিচাখনৰ চাহ গছকে ধৰি বহু ক্ষতি কৰে।’ বাগিচাখনৰ পৰিচালক উৎপল গোস্বামীৰ মন্তব্য।
এই বৃহৎ আকাৰৰ জিৰাফৰ মূৰ্তিটো গুৱাহাটীৰ সোনাপুৰৰ পৰা প্ৰায় ৫০ হাজাৰ টকা খৰচ কৰি নিৰ্মাণ কৰা হৈছে বুলি জানিব পৰা গৈছে।