শেহতীয়াকৈ ৰাজ্যিক কেবিনেটৰ এখন গুৰুত্বপূৰ্ণ বৈঠকে কেইবাটাও জনকল্যাণমূলক আৰু প্ৰশাসনিক সিদ্ধান্ত গ্ৰহণ কৰিছে। মুখ্যমন্ত্ৰী ড° হিমন্ত বিশ্ব শৰ্মাৰ পৌৰোহিত্যত অনুষ্ঠিত এই বৈঠকত ৰাজ্যৰ ৩৭টাকৈ চাহ জনগোষ্ঠীক স্বতন্ত্ৰভাৱে অন্যান্য পিছপৰা শ্ৰেণীৰ (অ’বিচি) মৰ্যাদা প্ৰদানৰ লগতে ‘পিএম স্বনিধি’ আঁচনিৰ সম্প্ৰসাৰণ আৰু গুৱাহাটীৰ পাহাৰীয়া অঞ্চলৰ বাসিন্দাসকলক মাটিৰ পট্টা প্ৰদানৰ দৰে গুৰুত্বপূৰ্ণ বিষয়ত অনুমোদন জনোৱা হয়।
বৈঠকৰ অন্তত মুখ্যমন্ত্ৰীয়ে সংবাদ মাধ্যমৰ আগত প্ৰকাশ কৰে যে পূৰ্বতে ৰাজ্যৰ ৩৭টা চাহ জনগোষ্ঠীক উপ-জাতি হিচাপেহে শ্ৰেণীভুক্ত কৰা হৈছিল। কিন্তু কেবিনেটৰ শেহতীয়া সিদ্ধান্ত মৰ্মে এতিয়াৰে পৰা এই সম্প্ৰদায়সমূহক স্বতন্ত্ৰভাৱে অ‘বিচি মৰ্যাদা প্ৰদান কৰা হ’ব। সমাজ কল্যাণ বিভাগে এই সন্দৰ্ভত অতি সোনকালেই এখন আনুষ্ঠানিক অধিসূচনা জাৰি কৰিব।
আনহাতে, পথৰ দাঁতিৰ ব্যৱসায়ীসকলৰ সুবিধাৰ্থে ৰূপায়ণ কৰা ‘পিএম স্বনিধি’ আঁচনিখন কেৱল পৌৰ এলেকাৰ সলনি ৰাজ্যৰ লোকপিয়ল নগৰসমূহলৈকো (Census Towns) সম্প্ৰসাৰণ কৰাৰ সিদ্ধান্ত লোৱা হৈছে। ইয়াৰ লগতে, ভৌগোলিক অৱস্থানৰ সৈতে সংগতি ৰাখি বৰপেটাস্থিত ‘ড° ফখুৰুদ্দিন আলী আহমেদ চিকিৎসা মহাবিদ্যালয়’ৰ নাম সলনি কৰি ‘বৰপেটা চিকিৎসা মহাবিদ্যালয়’ ৰখাৰ প্ৰস্তাৱত কেবিনেটে অনুমোদন জনায়। অৱশ্যে প্ৰাক্তন ৰাষ্ট্ৰপতিগৰাকীৰ নামত আন কোনো উপযুক্ত প্ৰতিষ্ঠান নামাকৰণ কৰা হ’ব বুলি মুখ্যমন্ত্ৰীয়ে জানিবলৈ দিয়ে।
গুৱাহাটী মহানগৰীৰ উন্নয়নৰ প্ৰতি লক্ষ্য ৰাখিও কেবিনেটে কেতবোৰ বিশেষ পদক্ষেপ গ্ৰহণ কৰিছে। দীৰ্ঘদিনীয়া দাবীৰ প্ৰতি সঁহাৰি জনাই গুৱাহাটীৰ পাহাৰীয়া অঞ্চলত বসবাস কৰা পৰিয়ালসমূহক মাটিৰ পট্টা প্ৰদানৰ প্ৰক্ৰিয়া আৰম্ভ কৰা হ’ব। প্ৰথম পৰ্যায়ত দিছপুৰ, গুৱাহাটী আৰু আজাৰা অঞ্চলৰ ৮১৬টা পৰিয়ালক এই পট্টা প্ৰদান কৰা হ’ব। মুখ্যমন্ত্ৰীয়ে সদৰী কৰা অনুসৰি, কেবল তৃতীয় প্ৰজন্মৰ অসমীয়া পৰিয়ালসমূহহে এই পট্টা লাভৰ বাবে যোগ্য হ’ব। তদুপৰি, নুনমাটিৰ দৰে পানী যোগানৰ পৰা বঞ্চিত অঞ্চলসমূহ সামৰি ল’বলৈ ১,৩৬৭ কোটি টকা ব্যয় সাপেক্ষে ‘দক্ষিণ-পূব গুৱাহাটী পানী যোগান প্ৰকল্প’ সম্প্ৰসাৰণ কৰা হ’ব, যিটো লাৰ্ছেন এণ্ড টুৰ্বো (L&T) কোম্পানীয়ে ৰূপায়ণ কৰিব।
সাংস্কৃতিক ক্ষেত্ৰতো কেবিনেটে মিচিং জনগোষ্ঠীৰ জাতীয় উৎসৱ ‘আলি আয়ে লৃগাং’ৰ দিনটোত চৰকাৰী বন্ধ ঘোষণা কৰাৰ ঐতিহাসিক সিদ্ধান্ত গ্ৰহণ কৰিছে। লগতে সোণাপুৰৰ জুবিন ক্ষেত্ৰৰ ১০ বিঘা মাটি সাংস্কৃতিক পৰিক্ৰমা বিভাগক আৱণ্টন দিয়াৰ লগতে গোৱালপাৰা ঔদ্যোগিক প্ৰকল্পৰ বাবে ১১২ বিঘা মাটি অনুমোদন জনোৱা হয়। ইয়াৰ উপৰি ২৪,৮০০ কোটি টকাৰ ছটা ব্যক্তিগত বিনিয়োগৰ প্ৰস্তাৱ আৰু অসম গেছ কোম্পানীৰ ১১০ কোটি টকাৰ দুটা প্ৰস্তাৱতো কেবিনেটে সন্মতি প্ৰদান কৰে।
