চৰাইদেউ জিলাৰ মথুৰাপুৰ বাগিচা প্ৰাথমিক বিদ্যালয়ত সংঘটিত এক জঘন্য ঘটনা পোহৰলৈ আহিছে। এজন শিক্ষকে কণ কণ ছাত্ৰ-ছাত্ৰীক শ্ৰেণী কোঠাৰ ভিতৰতে বৰ্বৰভাৱে প্ৰহাৰ কৰা দৃশ্য চিচিটিভি কেমেৰাত আৱদ্ধ হোৱাৰ পিছতে সমগ্ৰ অঞ্চলটোত তীব্ৰ চাঞ্চল্যৰ সৃষ্টি হৈছে। অভিযুক্ত শিক্ষকজনক মথুৰাপুৰ তিনিআলিৰ বাসিন্দা ৫১ বছৰীয়া মহম্মদ আৰিফুল ইছলাম বুলি চিনাক্ত কৰা হৈছে। এই ঘটনাৰ পিছতে আৰক্ষীয়ে শিক্ষকজনক গ্ৰেপ্তাৰ কৰিছে।
বিদ্যালয়খনৰ প্ৰধান শিক্ষকে শ্ৰেণী কোঠাত লগোৱা চিচিটিভি ফুটেজ পৰীক্ষা কৰাৰ সময়তে এই ভয়ংকৰ সত্য পোহৰলৈ আহে। ফুটেজত দেখা গৈছে যে শিক্ষকজনে কোনো কাৰণ নোহোৱাকৈয়ে শিশুসকলক নৃশংসভাৱে মাৰপিট কৰিছে। আনকি এটা দৃশ্যত তেওঁ এজন ছাত্ৰক শ্ৰেণী কোঠাৰ খিৰিকীৰে বাহিৰলৈ দলিয়াই দিবলৈ চেষ্টা কৰা বুলিও অভিযোগ উঠিছে। কেৱল সিমানেই নহয়, ছাত্ৰ-ছাত্ৰীসকলক স্কুলৰ ভিতৰতে শিক্ষকজনক তেল মালিশ কৰিবলৈ বাধ্য কৰোৱাৰ দৰে গুৰুতৰ অভিযোগো উত্থাপন হৈছে।
এই ঘটনাৰ খবৰ বিয়পি পৰাৰ লগে লগে অভিভাৱক আৰু স্থানীয় ৰাইজৰ মাজত ব্যাপক ক্ষোভৰ সৃষ্টি হয়। স্থানীয় ৰাইজে অভিযুক্ত শিক্ষকজনৰ বিৰুদ্ধে কঠোৰ আইনী আৰু বিভাগীয় ব্যৱস্থা গ্ৰহণৰ দাবী জনাইছে। অসম চাহ জনজাতি ছাত্ৰ সন্থাই এই সন্দৰ্ভত জিলা প্ৰশাসনক এক স্মাৰক পত্ৰ প্ৰদান কৰিছে। আনহাতে বিদ্যালয়ৰ পৰিচালনা সমিতি আৰু প্ৰধান শিক্ষকে ৫ মে’ত চৰাইদেউ মহকুমাৰ বিদ্যালয় উপ-পৰিদৰ্শকৰ ওচৰত লিখিত অভিযোগ দাখিল কৰিছে।
শিক্ষা বিভাগে এই ঘটনাক অতি গুৰুত্বসহকাৰে গ্ৰহণ কৰিছে আৰু খণ্ড শিক্ষা বিষয়াক সমগ্ৰ বিষয়টোৰ তদন্ত কৰিবলৈ নিৰ্দেশ দিছে। ছচিয়েল মিডিয়াত এই নিৰ্যাতনৰ ভিডিঅ’ ভাইৰেল হোৱাৰ পিছতে আৰক্ষীয়ে শিক্ষকজনক আটক কৰি আইনী প্ৰক্ৰিয়া আৰম্ভ কৰে। বিদ্যালয়ৰ দৰে পবিত্ৰ স্থানত কণ কণ শিশুৰ ওপৰত চলোৱা এনে অত্যাচাৰে ছাত্ৰ-ছাত্ৰীৰ সুৰক্ষাক লৈ ডাঙৰ প্ৰশ্নচিহ্নৰ সৃষ্টি কৰিছে। ৰাইজে দোষী শিক্ষকজনক উচিত শাস্তি দিবলৈ দাবী জনাইছে।
