অসমে মুখ্যমন্ত্ৰী ৰূপে পাব দেশৰ প্ৰধান মন্ত্ৰী নৰেন্দ্ৰ মোদীক! আমি এই কথা কোৱা নাই। মন্ত্ৰী ডঃ হিমন্ত বিশ্ব শৰ্মাই তেওঁৰ ভাষণত আওপকীয়াকৈ এই কথা উল্লেখ কৰিছে।
২০১৯ চনৰ লোকসভা নিৰ্বাচনৰ পূৰ্বে বিজেপি দলৰ অসমত মুখ্য শ্লোগান আছিল ‘আকৌ এবাৰ মোদী চৰকাৰ। আনকি এই শ্লোগানৰে গায়ক সীমান্ত শেখৰে গীতো পৰিৱেশন কৰিছিল যিটো বিজেপিৰ সমৰ্থক তথা ভোটাৰ ৰাইজৰ মাজত বহু সমাদৰ লাভ কৰিছিল।
ঠিক সেইদৰে বিজেপিৰ ২০১৪ চনত ‘এইবাৰ মোদী চৰকাৰ’ তথা ২০১৬ চনৰ শ্লোগান আছিল ‘বহুত হ’ল দুৰ্নীতি ভ্ৰষ্টাচাৰ অসমত এইবাৰ সৰ্বাৰ চৰকাৰ’।
তেনেকৈয়ে ২০২১ৰ নিৰ্বাচনৰ পূৰ্বেও বিজেপি দলৰ অসমত শ্লোগান হ’ব লাগিছিল ‘আকৌ এবাৰ বিজেপি চৰকাৰ’ বা ‘আকৌ এবাৰ সৰ্বাৰ চৰকাৰ’। যিহেতু এইবাৰো বিজেপিৰ মুখ্যমন্ত্ৰী পদৰ প্ৰাৰ্থী সৰ্বানন্দ সোণোৱাল হ’ব বুলি ইতিমধ্যে নিশ্চিত কৰিছে বিজেপিৰ শীৰ্ষ নেতৃত্বই।
কিন্তু এই শ্লোগান সম্পূৰ্ণৰূপে সলাই পেলালে মন্ত্ৰী ডঃ হিমন্ত বিশ্ব শৰ্মাই। তেওঁৰ মতে ‘অসমত আকৌ এবাৰ মোদী চৰকাৰ।‘
‘অসমমালা’ শীৰ্ষক আঁচনিৰ শুভাৰম্ভৰ বাবে ঢেকিয়াজুলিত প্ৰধান মন্ত্ৰী নৰেন্দ্ৰ মোদী উপস্থিত হোৱাৰ পাছতে তেওঁৰ সন্মুখতে জনসাধাৰণক উদ্দেশ্যি ভাষণ প্ৰদান কৰিছিল প্ৰতাপী মন্ত্ৰী ডঃ হিমন্ত বিশ্ব শৰ্মাই।
ডিঙিৰ শিৰ ফুলাই দিয়া ভাষণৰ শেষৰ ফালে হয়তো প্ৰধান মন্ত্ৰী নৰেন্দ্ৰ মোদীৰ প্ৰিয়ৰ পাত্ৰ হ’বলৈ মন্ত্ৰীগৰাকীয়ে কয় ‘অসম ভূমিলৈ নৰেন্দ্ৰ মোদী ডাঙৰীয়াক সাদৰৰে সৈতে আদৰণি জনাইছো। মোদী ডাঙৰীয়াক আমি আশ্বাস দিছো যে অসমত আকৌ এবাৰ মোদী চৰকাৰ। সকলোৱে ক’ব অসমত আকৌ এবাৰ মোদী চৰকাৰ।‘
তেওঁ বক্তব্যত হয়তো ‘আকৌ এবাৰ সোণোৱাল চৰকাৰ’ বা ‘সৰ্বানন্দৰ চৰকাৰ’ বুলি উল্লেখ কৰিব পাৰিলেহেঁতেন!
কিন্তু প্ৰশ্ন হৈছে ‘মুখ্যমন্ত্ৰীৰূপে ‘সৰ্বানন্দ সোণোৱাল’ৰ নাম লোৱাত কুন্ঠাবোধ কিয় মন্ত্ৰী হিমন্ত বিশ্ব শৰ্মাৰ?’
ইতিমধ্যে, এটা বিষয়ে অধিক চৰ্চা লাভ কৰিছে যে এইবাৰ বিজেপিৰ মুখ্যমন্ত্ৰীৰ দৌৰত মন্ত্ৰী হিমন্ত বিশ্ব শৰ্মাৰ নামো চৰ্চিত হৈছিল। হিমন্ত বিশ্ব শৰ্মাৰো মুখ্যমন্ত্ৰীৰ আসনখনৰ বাবে যে চকু নথকা নহয় সেয়া সময়ে সময়ে প্ৰতিপন্ন হৈছে।
মুখ্যমন্ত্ৰীৰ পদটোৰ বাবে থকা লালসাৰ বাবে অবচেতন মনত ক্ৰিয়া কৰি থকা ভাৱনা অজানিতে মুখৰে বাহিৰ হ’ল বুলিও একাংশই মত পোষণ কৰিছে।