ৰাজ্যৰ ডিটেনশ্যন কেম্পত বিগত তিনি বছৰ ধৰি বন্দী হৈ থকা ৫৬ গৰাকী বিদেশীক মুকলি কৰি দিয়াৰ বাবে অসম আৰক্ষীয়ে নিৰ্দেশ লাভ কৰিছে বুলি মঙলবাৰে উল্লেখ কৰে।
জানিব পৰা মতে, ডিটেনশ্যন কেম্পৰ পৰা মুকলি কৰি দিবলৈ কোৱা বিদেশী লোককেইগৰাকীয়ে পূৰ্বে অসমৰ বিভিন্ন এঘাৰখন জিলাত বাস কৰিছিল।
ইতিমধ্যে নিৰ্দিষ্ট জিলাকেইখনৰ আৰক্ষী অধীক্ষক সকলক প্ৰয়োজনীয় নিৰ্দেশনাৱলী সম্পূৰ্ণ কৰিবলৈ কোৱা হৈছে।
মুকলি কৰি দিবলগীয়া বন্দী সকলৰ পৰিছয়ৰ লগতে তেওঁলোকৰ হৈ নিশ্চয়তা প্ৰদান কৰিবলগীয়া লোক সকলৰো পৰিছয় ভালদৰে পৰীক্ষা কৰা হৈছে।
চলিত বৰ্ষৰ মে’ মাহত উচ্চতম ন্যায়ালয়ে ডিটেনশ্যন কেম্পত তিনিবছৰতকৈ অধিক সময় কটোৱা লোকসকলৰ বায়োমেট্ৰিক তথ্য সংৰক্ষণ কৰি ৰাখি মুকলি কৰি দিবলৈ নিৰ্দেশ দিছিল।
উচ্চতম ন্যায়ালয়ে মুকলি কৰি দিবলগীয়া বিদেশী লোকসকলক মুকলি কৰি দিয়াৰ পাছত ক’ত থাকিব সেই সম্পৰ্কতো তথ্য জমা দিবলৈ নিৰ্দেশ দিছিল।