অসমত বন্ধ হ’ব মাদ্ৰাছা আৰু সংস্কৃত টোল
ৰাজ্যত অতি সোনকালে চৰকাৰী মাদ্ৰাছা আৰু সংস্কৃত টোলসমূহ বন্ধ কৰা হ’ব বুলি ঘোষণা কৰিছে শিক্ষা মন্ত্ৰী ড০ হিমন্ত বিশ্ব শৰ্মাই।
বুধবাৰে শ্ৰীমন্ত শংকৰদেৱ কলাক্ষেত্ৰত অনুষ্ঠিত এক চৰকাৰী অনুষ্ঠানত অংশগ্ৰহণ কৰি এই ঘোষণা কৰিছে মন্ত্ৰীগৰাকীয়ে।
তেওঁ কয়, ‘অসমত চৰকাৰী মাদ্ৰাছা আৰু সংস্কৃত টোলসমূহ বন্ধ কৰা হ’ব। কাৰণ আৰবিক ভাষা শিকোৱা বা অন্য ভাষা শিকোৱা বা ধৰ্মগ্ৰন্থ শিকোৱা চৰকাৰৰ কাম নহয়।‘
ইপিনে, অতি সোকনকালে চৰকাৰী মাদ্ৰাছা আৰু সংস্কৃত টোলসমূহ হাইস্কুল আৰু উচ্চতৰ মাধ্যমিক বিদ্যালয়লৈ ৰূপান্তৰিত কৰা হ’ব বুলিও তেওঁ ঘোষণা কৰি কয়, ‘নিজৰ পইছা দি ধৰ্মীয় শিক্ষা শিকোৱাটো বেলেগ কথা, ৰাষ্ট্ৰৰ টকাৰে ধৰ্ম গ্ৰন্থ শিকালে বিদ্যালয়ত গীতাও শিকাব লাগিব, বাইবেলো শিকাব লাগিব।‘
‘মাদ্ৰাছা, হাই মাদ্ৰাছা আৰু সংস্কৃত টোল অহা ৪-৫ মাহৰ ভিতৰত বন্ধ কৰি দিম।‘ হিমন্তই এইদৰে কয়।
অৱশ্যে. মাদ্ৰাছা আৰু সংস্কৃত টোলত ধৰ্মীয় বিষয় পঢ়োৱা শিক্ষকসকলে ঘৰত বহিয়েই অৱসৰৰ পৰ্য্যন্ত দৰমহা লৈ থাকিব পাৰিব বুলি তেওঁ সদৰী কৰে।
হিমন্ত বিশ্ব শৰ্মাৰ এই ঘোষণাৰ পাছতে প্ৰতিক্ৰিয়া প্ৰকাশ কৰিছে এ আই য়ু ডি এফে। এ আই য়ু ডি এফৰ সাধাৰণ সম্পাদক আমিনুল ইছলামে এই ঘোষণাক ‘ভূতৰ মুখত ৰাম নাম’ আখ্যা দিয়ে।
‘ধৰ্ম নিৰপেক্ষতা দেখুৱাবলৈ গৈ তেওঁলোকে সংস্কৃত টোল আৰু মাদ্ৰাছা উঠাই দিব বিচাৰিছে। সংস্কৃত সকলোতকৈ পুৰণি ভাষা। সংস্কৃত টোল বন্ধ কৰাৰ পক্ষত আমি নাই।‘ আমিনুলে এইদৰে কয়।
তদুপৰি, ‘আগতে থকা হাইস্কুলকেইখন ভাল কৰক আৰু প্ৰাদেশিকৰণ কৰি লওঁক‘ বুলি দাবী জনাই আমিনুলে লগতে কয় ‘চৰকাৰী বিদ্যালয়ৰ প্ৰতি ৰাইজৰ আস্থা নোহোৱা হৈছে। সংস্কৃত টোল বন্ধ কৰিব বিচাৰিছে ইয়াৰ অৰ্থ এইটোৱেই যে তেওঁলোকৰ উদ্দেশ্যটো বেয়া। কি কথা ক’লে হুলস্থুল বেছি হ’ব বা সামাজিকভাৱে দণ্ডৰ সৃষ্টি হ’ব, সেই খেলটো তেওঁলোকে ভালকৈ জানে। উন্নয়নৰ কথা তেওঁলোকে ক’ব নিবিচাৰে।‘