ডেৰ লক্ষাধিক নগদ ধন আৰু ড্ৰাগছৰ সৈতে এগৰাকী মহিলাসহ দুগৰাকী ব্যক্তিক গ্ৰেপ্তাৰ আৰক্ষীৰ
নিষিদ্ধ ঘোষিত ড্ৰাগছ সৰবৰাহত জড়িত থকাৰ সন্দেহত এগৰাকী মহিলাসহ দুগৰাকী ব্যক্তিক গ্ৰেপ্তাৰ কৰিছে লখিমপুৰ আৰিক্ষীয়ে।
আৰক্ষীয়ে প্ৰকাশ কৰা অনুসৰি লখিমপুৰ জিলাৰ আৰক্ষীয়ে পৃথকে পৃথকে চলোৱা দুটা অভিযানত ড্ৰাগছ আৰু নগদ ধনসহ দুগৰাকী ব্যক্তিক গ্ৰেপ্তাৰ কৰিছে।
সোমবাৰে বিহপুৰীয়া আৰক্ষী থানাৰ অন্তৰ্গত বান্দৰদেৱাৰ ২ নং পাৰ্ৱতীপুৰত প্ৰথমে অভিযান চলাই আৰক্ষীয়ে হিৰণ্য দলে ওৰফে চৈত্যন্দ্ৰ দলে নামৰ লোকজনক নিষিদ্ধ ঘোষিত ড্ৰাগছ সৰবৰাহত জড়িত থকাৰ সন্দেহত গ্ৰেপ্তাৰ কৰে।
আৰক্ষীয়ে লোকজনৰ পৰা ১৩.৪৩ গ্ৰাম হিৰ’ইন, এটা মোবাইল ফোন আৰু ৩৩,৭০০ টকা নগদ ধনো জব্দ কৰে।
একেদিনাই অন্য এটা অভিযানত আৰক্ষীয়ে বিহপুৰীয়া আৰক্ষী থানাৰ অন্তৰ্গত ২ নং পাৰ্ৱতীপুৰৰ দিহিৰি জীয়াঢলৰ পৰা ৬৬.০৭ গ্ৰাম হিৰ’ইনসহ পৱিত্ৰ দলেৰ পত্নী ধনন্তী দলে নামৰ মহিলাগৰাকীক গ্ৰেপ্তাৰ কৰে।
মহিলাগৰাকীৰ পৰা উক্ত হিৰ’ইনখিনিৰ লগতে এটা মোবাইল ফোন আৰু ১,৩৮,২০০ টকা নগদ ধনো আৰক্ষীয়ে জব্দ কৰে।
লখিমপুৰ জিলাৰ উপ আৰক্ষী অধীক্ষক(হেড কোৱাৰ্টাৰ) ৰুণা নেওগ আৰু উপ পৰিদৰ্শক সুৰজ দলেৰ নেতৃত্ব এটা আৰক্ষীৰ দলে উক্ত দুয়োটা অভিযান চলাইছিল।