দূতাবাসৰ নিলামত ক্ৰয় কৰা এখন গাড়ীত ভুৱা দূতাবাসৰ নম্বৰ প্লেট ব্যৱহাৰ কৰাৰ অভিযোগত অসমৰ এগৰাকী ৪৫ বছৰীয়া মহিলাক দিল্লী আৰক্ষীয়ে গ্ৰেপ্তাৰ কৰিছে। মহিলাগৰাকীক ড০ আছমা বেগম বুলি চিনাক্ত কৰা হৈছে।
গণৰাজ্য দিৱস ওচৰ চাপি অহাৰ লগে লগে তেওঁক ৰাষ্ট্ৰীয় নিৰাপত্তাৰ বাবে সম্ভাৱ্য ভাবুকি বুলি গণ্য কৰা হৈছে বুলিও কৰ্তৃপক্ষই জনায়।
এক গোপন সূত্ৰৰ পম খেদি যোৱা ১৫ জানুৱাৰীত বসন্ত বিহাৰৰ বন্ধুৰ বাসগৃহৰ বাহিৰত মহিলাগৰাকীক জিম্মাত লোৱা হৈছিল। আৰক্ষী উপ আয়ুক্ত (অপৰাধ শাখা) সঞ্জীৱ কুমাৰ যাদৱে কয় যে তেওঁ চলোৱা বাহনখনৰ ভুৱা কূটনৈতিক পঞ্জীয়ন আছিল আৰু গ্ৰেপ্তাৰৰ সময়ত আন এখন ভুৱা নম্বৰ প্লেট উদ্ধাৰ কৰা হৈছে।
গেবনৰ দূতাবাসৰ ভুৱা প্লেট প্ৰদৰ্শন কৰা এখন গাড়ীত এগৰাকী মহিলাই সঘনাই দূতাবাসলৈ যোৱাৰ তথ্য লাভ কৰাৰ পিছত আৰক্ষীয়ে তেওঁক অনুসৰণ কৰি আহিছিল। জেৰাৰ সময়ত তেওঁ স্বীকাৰ কৰে যে আৰক্ষীৰ নিৰীক্ষণ অতিক্ৰম কৰি নিষিদ্ধ কূটনৈতিক অঞ্চলত প্ৰৱেশ কৰিবলৈ ভুৱা প্লেট তৈয়াৰ কৰিছিল।
তদন্তকাৰীসকলক তেওঁ জনায় যে তেওঁ “মধ্যস্থতাকাৰী” হিচাপে কাম কৰিছিল, বিদেশত নামভৰ্তি বিচৰা ছাত্ৰ-ছাত্ৰীসকলক দূতাবাসৰ বিষয়াসকলৰ সৈতে সংযোগ স্থাপন কৰাত সহায় কৰিছিল।
যাদৱে লগতে কয়, বিশেষকৈ “গণৰাজ্য দিৱসৰ কাষ চাপি অহাৰ লগে লগে ৰাষ্ট্ৰীয় নিৰাপত্তাৰ প্ৰেক্ষাপটত তেওঁৰ গ্ৰেপ্তাৰ তাৎপৰ্যপূৰ্ণ। তেওঁৰ কাৰ্যকলাপৰ পুংখানুপুংখ তদন্ত চলি আছে।”
কৰ্তৃপক্ষই তেওঁৰ মোবাইল ফোনটো পৰীক্ষাৰ বাবে জব্দ কৰিছে আৰু তেওঁৰ গতিবিধি আৰু যোগাযোগৰ পৰীক্ষা কৰি থকা হৈছে।
তেওঁৰ স্বামীয়ে অসম চৰকাৰৰ বিষয়া হিচাপে কাম কৰে। মহিলাগৰাকীয়ে বিদেশী দূতাবাসক প্ৰতিনিধিত্ব কৰা বুলি দাবী কৰিছিল যদিও ইয়াৰ সমৰ্থনত কোনো চৰকাৰী নথি-পত্ৰ দিব পৰা নাছিল।
২০২৪ চনৰ নৱেম্বৰ মাহত বিদেশী দূতাবাসৰ নিলামৰ পৰা টয়োটা ইনোভা গাড়ী কিনিছিল যদিও কেতিয়াও নিজৰ নামত গাড়ীখন পঞ্জীয়ন কৰা নাছিল বুলিও সদৰী কৰে।
দূতাবাসে এই বিষয়ে খবৰ দিয়াৰ পিছতে তেওঁ অফিচিয়েল প্লেট সলনি কৰি গেবন দূতাবাসৰ সৈতে মিল থকা ভুৱা প্লেট লগাইছিল বুলি অভিযোগ উঠিছে।
তদুপৰি, পূর্বে তেওঁ এটা ৰাজনৈতিক দলৰ সৰ্বভাৰতীয় সম্পাদক, ২০২৩-২৪ চনত বিদেশী দূতাবাসৰ পৰামৰ্শদাতা, মেঘালয়ৰ এখন বিশ্ববিদ্যালয়ত ক্ৰীড়া গাইড আদিকে ধৰি কেইবাটাও পদত অধিষ্ঠিত আছিল বুলি দাবী কৰে।
ইয়াৰ উপৰিও তেওঁ কয় যে বৰ্তমান তেওঁ আফ্ৰিকান ছাত্ৰ-ছাত্ৰীসকলক মেঘালয়ৰ এখন বিশ্ববিদ্যালয়ত নামভৰ্তি লাভ কৰাত সহায় কৰে। এই বক্তব্যৰ সত্যতা এতিয়াও পৰীক্ষা কৰিব পৰা নাই আৰক্ষীয়ে।
মহিলাগৰাকীৰ মূল ঘৰ গুৱাহাটী আৰু তেওঁৰ ২১, ১৩ আৰু ৫ বছৰ বয়সৰ তিনিটা পুত্ৰ সন্তান আছে। দিল্লীত তেওঁৰ স্থায়ী বাসগৃহ নাই।
ভাৰতীয় দণ্ডবিধিৰ একাধিক ধাৰাত তেওঁৰ বিৰুদ্ধে প্ৰতাৰণা, জালিয়াতি, ছদ্মবেশ, জাল নথি-পত্ৰ ব্যৱহাৰ, অপৰাধমূলক ষড়যন্ত্ৰৰ গোচৰ ৰুজু কৰিছে আৰক্ষীয়ে।
কৰ্তৃপক্ষই প্ৰথমে ছয় দিনৰ বাবে আৰক্ষীৰ জিম্মাত ৰাখিছিল আৰু এতিয়া ন্যায়িক জিম্মালৈ প্ৰেৰণ কৰিছে।
