কেন্দ্ৰীয় মানৱ সম্পদ উন্নয়ন মন্ত্ৰালয়ে সোমবাৰে লোকসভাত দেশৰ তৃতীয়খন কেন্দ্ৰীয় বিশ্ববিদ্যালয়ত অসমীয়া বিভাগ খোলাৰ কথা সদৰী কৰিছে। বিশ্বভাৰতী আৰু অসম বিশ্ববিদ্যালয়ৰ ডিফু চৌহদত অসমীয়া বিভাগ খোলাৰ পাছত এইবাৰ তেজপুৰ কেন্দ্ৰীয় বিশ্ববিদ্যালয়তো হ’ব অসমীয়া বিভাগ।
কেন্দ্ৰীয় মানৱ সম্পদ উন্নয়ন মন্ত্ৰালয়ে লোকসভাত জানিবলৈ দিয়ে যে তেজপুৰ কেন্দ্ৰীয় বিশ্ববিদ্যালয়ত অসমীয়া বিভাগ মুকলি কৰাৰ বাবে বিশ্ববিদ্যালয় অনুদান আয়োগে (ইউ জি চি) অনুমোদন জনাইছে।
বিশ্ববিদ্যালয় অনুদান আয়োগে যোৱা ৬ মাৰ্চত এখন পত্ৰ প্ৰেৰণ কৰি কেন্দ্ৰীয় মানৱ সম্পদ উন্নয়ন মন্ত্ৰালয়ক সেই কথা অৱগত কৰিছে।
আনহাতে, কলকাতাৰ বিশ্বভাৰতী বিশ্ববিদ্যালয়ত অসমীয়া বিভাগ মুকলি কৰা হৈছে যদিও অসমৰ শিলচৰত থকা অসম বিশ্ববিদ্যালয়ৰ মূল চৌহদত অসমীয়া বিভাগ খোলাৰ কেন্দ্ৰীয় চৰকাৰৰ কোনো পৰিকল্পনা নাই। অসম চৰকাৰৰ পৰা আনুষ্ঠানিক প্ৰস্তাৱ নোপোৱাৰ বাবেই অসমতেই থকা কেন্দ্ৰীয় বিশ্ববিদ্যালয়খনত অসমীয়া বিভাগ খোলাৰ কোনো পৰিকল্পনা কেন্দ্ৰৰ নাই বুলি স্পষ্ট কৰি দিয়ে মন্ত্ৰালয়ে।
উল্লেখযোগ্য যে শিলচৰস্থিত অসম বিশ্ববিদ্যালয়ৰ মূল চৌহদত অসমীয়া বিভাগ খোলাৰ বাবে বিভিন্ন দল-সংগঠনে দাবী কৰি আহিছে যদিও কোনো দল-সংগঠন তথা খিলঞ্জীয়াৰ চৰকাৰ বুলি দাবী ৰাজ্য চৰকাৰখনে আনুষ্ঠানিকভাৱে প্ৰস্তাৱ নিদিয়াৰ বাবে অসমতে এলাগী হ’বলগীয়া হ’ল অসমীয়া ভাষা।