অসমীয়া যুৱকে বাঙালী ছোৱালী বিয়া কৰালে লাভ কৰিব অৰ্থ
এতিয়াৰে পৰা বাঙালী যুৱকে অসমীয়া ছোৱালী বিয়া কৰালে আৰ্থিক সাহায্য লাভ কৰিব, অথবা বঙালী ছোৱালীয়ে যদি অসমীয়া যুৱকৰ সৈতে বিবাহ পাশত আবদ্ধ হয় তেন্তেও আৰ্থিক সাহায্য প্ৰদান কৰা হ’ব।
দেওবাৰে যোৰহাটত অনুষ্ঠিত এখন সংবাদ মেলত এই কথা স্পষ্ট কৰে অসম ভাষিক সংখ্যালঘু উন্নয়ন বোৰ্ডে।
ভাষিক সংখ্যালঘু উন্নয়ন বোৰ্ডৰ সভাপতি অলক কুমাৰ ঘোষে এই কথা উল্লেখ কৰি আৰ্থিক অনুদান হিচাপে লাভ কৰিবলগীয়া টকাৰ পৰিমাণ এতিয়াও নিৰ্ধাৰণ কৰা হোৱা নাই বুলি কয়।
‘‘প্ৰতিটো জনগোষ্ঠীৰ মাজত যি সমন্বয় আছে আমি সেই সমন্বয় আৰু অধিক দৃঢ় কৰিবলৈ বিচাৰো,’’ অলক কুমাৰ ঘোষে লগতে কয়।
ইয়াৰ উপৰিও ঘোষে অসমীয়া-বাঙালিৰ মাজত অতি মধুৰ সম্পৰ্ক বুলি উল্লেখ কৰি কিছুমান অজ্ঞাত কাৰণত দুয়োটা জাতিৰ ভাষা-সাহিত্য-সংস্কৃতিক হেয় প্ৰতিপন্ন কৰিবলৈ বিচৰা হৈছে কিন্তু এনেদৰে ৰাজ্য নচলে বুলি গুৰুত্বপূৰ্ণ মন্তব্য কৰে।
অসম ভাষিক সংখ্যালঘু উন্নয়ন বোৰ্ডে ৰাজ্যৰ ১৫ খন চহৰত সম্পুৰ্ণ নিজা খৰচত প্ৰজ্ঞা সুন্দৰী দেৱী আৰু তেওঁৰ স্বামী ৰসৰাজ লক্ষ্মীনাথ বেজবৰুৱাৰ প্ৰতিমূৰ্তি স্থাপন কৰিব বুলিও জানিবলৈ দিয়ে।
প্ৰজ্ঞাসুন্দৰী দেৱী আছিল বিজ্ঞানী হেমেন্দ্ৰনাথ ঠাকুৰ আৰু পূৰ্ণিমা দেৱীৰ কন্যা। প্ৰজ্ঞাসুন্দীৰ দেবীৰ ককায়েক আছিল নোবেল বঁটা বিজয়ী সাহিত্যিক তথা কবি ৰবীন্দ্ৰনাথ ঠাকুৰ।
‘‘বাঙালী সকলে কেতিয়াও নাগৰিকত্ব (সংশোধন) আইনক সমৰ্থন নকৰে। সেই কথা অসমীয়া লোক সকলে ভালকৈ নজনাৰ বাবে দ্বন্দ্বৰ সৃষ্টি হৈছে,’’ অলক ঘোষে আৰু কয়।
‘কা’-ৰ প্ৰসংগ উল্লেখ কৰি তেওঁ লগতে কয় যে অসমত বাঙালী আৰু অসমীয়াৰ মাজত কোনো প্ৰভেদ নাই অসমৰ বাঙালী সকলেও নিজকে অসমীয়া হিচাপে বিলীন কৰি দিছে।
সংবাদমেলত ঘোষে ভাৰত ৰত্ন ভূপেন হাজৰিকাৰ প্ৰসংগ উল্লেখ কৰি হাজৰিকাই বাঙালী-অসমীয়াৰ মিলন সাঁকো হিচাপে পশ্চিমবংগত যিবোৰ গান গাইছিল সেইগানবোৰ অসমত অসমীয়া ভাষাত গাইছে বুলি কয়।
বাঙালী-অসমীয়াৰ মাজত বিবাহ আৰু দুয়োটা জাতিৰ মাজৰ সম্পৰ্ক দৃঢ়কৰণৰ আৰম্ভণি বহু বছৰ পূৰ্বে আৰম্ভ হৈছিল।
বিশ্বকবি ৰবীন্দ্ৰনাথ ঠাকুৰৰ উত্তৰ-পূবৰ ভিতৰত অসম ৰাজ্যখন অতি প্ৰিয় আছিল। কবিগুৰুই তিনিবাৰ অসম ভ্ৰমণলৈ আহিছিল ক্ৰমে ১৯১৯, ১৯২৩ আৰু ১৯২৭ চনত।