অসমৰ জনপ্ৰিয় মডেল ৰজী ৰহমানে যেন ধাৰণাই সলনি কৰিলে মডেলিঙৰ। পৰম্পৰাগত অসমীয়া সাজ-পোছাক পৰিধানেৰে মডেলিং কৰি প্ৰশংসা লাভ কৰি আহিছে ৰজী ৰহমানে। কেৱল বিদেশী সাজ-পোছাক পিন্ধি নহয় থলুৱা বা অসমীয়া পোছাক পৰিধান কৰিও যে মডেলিঙত নাম কৰিব পাৰি তাৰেই নিদৰ্শন দেখুৱালে ৰজী ৰহমানে।
গুৱাহাটীৰ ৰজী ৰহমানে এটা সাক্ষাৎকাৰত কয়, “মই ফেশ্যনৰ জগতখনত আছো। মডেল হোৱাৰ আগ্ৰহ নাছিল যদিও মই সদায় নতুন নতুন ধৰণৰ কাপোৰ পিন্ধি ভাল পাইছিলোঁ। কিন্তু মই কেতিয়াও ভবা নাছিলোঁ যে মই নিজকে মডেল হিচাপে প্ৰতিষ্ঠা কৰিব পাৰিম। নৃত্য-গীতৰ প্ৰতি মোৰ আগ্ৰহ আছিল। মোৰ বন্ধু ঋতু গগৈ আৰু হেমলতা চেতিয়াই মোক আলোচনী এখনত মডেলিং কৰিবলৈ উৎসাহিত কৰিছিল। অসমীয়া আলোচনীৰ কভাৰ মডেল হিচাপে আত্মপ্ৰকাশ কৰাৰ লগতে নন্দিনী আৰু সাখী আলোচনীতো মডেলিং কৰিছিলোঁ।”
উল্লেখ্য যে, ৰজী ৰহমানে মেখেলা চাদৰকে ধৰি বিভিন্ন মাৰ্জিত পৰম্পৰাগত সাজ-পোছাক পৰিধান কৰি কেইবাখনো ৰাষ্ট্ৰীয় আৰু ৰাজ্যিক সৌন্দৰ্য্য প্ৰতিযোগিতাত বিজয়ৰ মুকুট পিন্ধিবলৈ সক্ষম হৈছে। মাৰ্জিত আৰু পৰম্পৰাগত সাজ-পোছাকৰ সৌন্দৰ্য্যৰ প্ৰতি ৰজী দৃঢ় বিশ্বাসী।
ৰজী ৰহমানে জয়, ‘‘মই ভাবো মাৰ্জিত সাজ-পোছাক পিন্ধিও ফেশ্বনত সফল হ’ব পাৰি। কাৰণ মই সদায় গাউন আৰু মেখেলা-চাদৰৰ দৰে মাৰ্জিত সাজ-পোছাক পিন্ধি মঞ্চত উপবেত হওঁ। এইদৰেই ৰেম্পত খোজ কাঢ়ি বিভিন্ন বঁটা লাভ কৰিছো।’’
২০২১ চনৰ মষ্ট বিউটিফুল মডেল, ৰেড কাৰ্পেট বিউটিফুল কুইন, ৱৰ্ল্ড বিউটি পেজেণ্ট ২০২১, ইণ্টাৰনেশ্যনেল গ্ল’বেল ইউনিভাৰ্ছ ২০২২, মিচেছ ইণ্ডিয়া ইণ্টাৰনেশ্যনেল ছত্তীশগড় ২০২২ আৰু মিচেছ ই ইণ্টাৰনেশ্যনেল এম্বেছাদৰ, মিচেছ গ্ল’বেল দিল্লী আৰু মিচেছ ৰয়েল হাৰিয়ানা ২০২৩ ত বিজয়ৰ মুকুট পিন্ধিবলৈ সক্ষম হৈছে ৰজী ৰহমান।
ইয়াৰ উপৰিও, মিছ ষ্টাৰ ইউনিভাৰ্ছ ২০২৩, এম এছ এছ এফ দিল্লী বঁটা ২০২৩, ভাৰত গৌৰৱ বঁটা ২০২৩, মিচেছ পপুলাৰ ফেচ অৱ ইণ্ডিয়া ২০২৩ আৰু বছৰৰ সৰ্বাধিক প্ৰতিপত্তিশীল মডেল হিচাপে তেওঁ মুঠ ১১টা খিতাপ লাভ কৰিছে।
এই সফলতাৰ ক্ষেত্ৰত তেখেতে সাংবাদিকৰ আগত কয়, “মই ভাবো পৰিয়াল আৰু বন্ধু-বান্ধৱীৰ সহায় অবিহনে কোনো কামতে মনোনিৱেশ কৰাটো অসম্ভৱ। মুছলমান সমাজত এটা ভুল ধাৰণা আছে যে নাৰী সদায় ওৰণিৰ আঁৰত থাকিব লাগে। কিন্তু মোৰ ভাগ্য ভাল যে মই মোৰ পৰিয়াল আৰু সমাজৰ পৰা এনে কোনো বাধাৰ সন্মুখীন হোৱা নাছিলো। মোৰ স্বামীয়ে মোক সদায় উৎসাহিত কৰি আহিছে আৰু মোৰ বন্ধুসকলেও বহুত সহায় কৰিছে।’’
ৰাজনৈতিক আৰু সামাজিক কামৰ লগতো জড়িত ৰজী। বৰ্তমান ভাৰতৰ মহিলা ৰাষ্ট্ৰীয় নিৰাপত্তা সংস্থা আৰু সাংস্কৃতিক সংগঠন বিহু সুৰক্ষা মঞ্চ অসম, সংস্কাৰিকা মহাসভা অসম, ৰংদলি সংস্কাৰ সংস্থা, সংস্কাৰ সংস্থা ‘সতসাৰী’ ইত্যাদিৰ সৈতেও জড়িত।
