যোৱা ১১ অক্টোবৰত অসমৰ ছবিগৃহত মুক্তি লাভ কৰা যতীন বৰাৰ ছবি ৰত্নাকৰে দৰ্শকৰ পৰা লাভ কৰিছে বিপুল সঁহাৰি।
জনপ্ৰিয় অভিনেতা যতীন বৰাৰ প্ৰযোজনা, পৰিচালনা আৰু অভিনীত ৰত্নাকৰে মুক্তিৰ প্ৰথম ১০ দিনত ৪.৯৫ কোটি টকা উপাৰ্জনেৰে অসমৰ ছবিজগতৰ সকলো ৰেকৰ্ড ভংগ কৰিবলৈ সক্ষম হৈছে।
ৰাজ্যৰ বিভিন্ন চলচ্চিত্ৰ সমূহত সফলতাৰে ১০ দিন পাৰ হৈ যোৱাৰ পাছতো ৰত্নাকৰৰ প্ৰতি দৰ্শকৰ আগ্ৰহ শেষ হোৱা নাই। এতিয়াও বিভিন্ন চলচ্চিত্ৰ সমূহত ৰত্নাকৰৰ টিকত আগন্তুক দুই তিনিদিনৰ বাবে বুক হৈ থকা বুলি জানিব পৰা গৈছে।
উল্লেখ্য যে মুক্তিৰ প্ৰথম দিনটোতে জুবিন গাৰ্গৰ ছবি কাঞ্চনজংঘাৰ নামত থকা ৪০ লাখ টকা উপাৰ্জনৰ ৰেকৰ্ড ভাঙিছিল ৰত্নাকৰে। ৰত্নাকৰৰ প্ৰথন দিনৰ উপাৰ্জন আছিল ৪১ লাখ টকা।
আনহাতে মুক্তিৰ প্ৰথম তিনিটা দিনত কাঞ্চনজংঘাৰ ১.৩৮ কোটি টকাৰ বিপীতে ৰত্নাকৰে উপাৰ্জন কৰিছিল প্ৰায় ১.৪৫ কোটি টকা।
যতীন বৰা, নিশিতা গোস্বামী, বৰষাৰাণী বিষয়াৰ লগতে কেইবাগৰাকীও জনপ্ৰিয় অভিনেতা-অভিনেত্ৰীয়ে অভিনয় কৰা ৰত্নাকৰৰ প্ৰথম ১০ দিনৰ উপাৰ্জন তলত উল্লেখ কৰ হ’ল-
১১ অক্টোবৰ- ৪১ লাখ, ১২ অক্টোবৰ- ৪৯.৫ লাখ, ১৩ অক্টোবৰ- ৫৫ লাখ, ১৪ অক্টোবৰ- ৪৩ লাখ, ১৫ অক্টোবৰ- ৪৫ লাখ, ১৬ অক্টোবৰ- ৪২ লাখ, ১৭ অক্টোবৰ- ৪৩.৫ লাখ, ১৮ অক্টোবৰ-৪৫ লাখ, ১৯ অক্টোবৰ- ৫১ লাখ, ২০ অক্টোবৰ- ৬৮ লাখ।
উল্লেখ্য যে মুক্তিৰ দ্বিতীয়টো দেওবাৰ অৰ্থাৎ ২০ অক্টোবৰৰ দিনা ছবিখনে মাত্ৰ ৫৪ টা চিত্ৰগৃহৰ পৰা সংগ্ৰহ কৰিছে অভিলেখ সংখ্যক মুঠ ৬৮ লাখ টকা।
বাণিজ্যিকভাৱে আটাইতকৈ সফল অসমীয়া ছবি হিচাপে পৰিগণিত হোৱা ৰত্নাকৰে অসমৰ বাহিৰৰ ছবিগৃহৰ পৰা প্ৰথম সপ্তাহত ১২ লাখ টকা উপাৰ্জন কৰিবলৈ সক্ষম হৈছে।
এইদৰে ছবিখনে প্ৰথম ১০ দিনত ৪.৯৫ কোটি টকা উপাৰ্জনেৰে অসমীয়া ছবি উদ্যোগত এক নতুন অভিলেখ গঢ়ে।
