বিশিষ্ট কবি অনুভৱ তুলসীৰ ইহলীলা সম্বৰণ। গুৱাহাটীৰ জিএনআৰচি হাস্পতালত আজি পুৱা ১০:০৫ বজাত শেষ নিশ্বাস ত্যাগ কৰে কবি গৰাকীয়ে। ষ্ট্ৰ’কত আক্ৰান্ত হৈ জিএনআৰচি হাস্পতালৰ আইচিইউত চিকিৎসাধীন হৈ আছিল কবিগৰাকী।
সকলোৰে মাজত অনুভৱ তুলসী নামেৰে জনপ্ৰীয় বৰেণ্য সাহিত্যিক ডিম্বেশ্বৰ শইকীয়াৰ বিয়োগ অসমীয়া ভাষা আৰু সাহিত্য লগতে সমাজ জীৱনৰ অপূৰণীয় ক্ষতি।
অসমীয়া সাহিত্যৰ বাবে এক অপুৰণীয় ক্ষতি। তেওঁ একাধাৰে এগৰাকী কবি, অনুবাদক, চলচ্চিত্ৰ সমালোচক, গল্পকাৰ, সম্পাদক। বিংশ শতিকাৰ শেষৰ পৰা সাম্প্ৰতিক সময়লৈকে অসমীয়া কবিতাৰ ক্ষেত্ৰখনত তেওঁ অনবদ্য অৱদান আগবঢ়াই গৈছে। তেওঁ ১৯৮৪ চনত গুৱাহাটী বিশ্ববিদ্যালয়ৰ পৰা ইংৰাজী সাহিত্যত স্নাতকোত্তৰ ডিগ্ৰী লাভ কৰে। তেওঁ ১৯৮৩ চনৰ পৰা ২০১৮ চনলৈকে শুৱালকুছি বুদৰাম মাধৱ সত্ৰাধিকাৰ মহাবিদ্যালয়ত অধ্যাপক হিচাপে কৰ্মৰত হৈ অৱসৰ গ্ৰহণ কৰে।
১৯৮৫ চনত তেওঁৰ প্ৰথম কবিতাপুথি ‘নাজমা’ প্ৰকাশ পায়। তেওঁৰ ২০খন কবিতাপুথি প্ৰকাশ পাইছে৷ ত্ৰিশখনতকৈ অধিক পুথিৰ ৰচক অনুভৱ তুলসীৰ কবিতা গুৱাহাটী বিশ্ববিদ্যালয়, কটন বিশ্ববিদ্যালয় আৰু লখিমপুৰ মহাবিদ্যালয়ৰ স্নাতকোত্তৰ অসমীয়া বিভাগৰ পাঠ্যক্ৰমতো অন্তৰ্ভুক্ত হৈছে। অক্সফ’ৰ্ড বিশ্ববিদ্যালয়, পেংগুইন, নৰ্থ ইষ্টাৰ্ণ পাৰ্বত্য বিশ্ববিদ্যালয়, সাহিত্য অকাডেমি, নেশ্যনেল বুক ট্ৰাষ্ট আদিৰ পৰা প্ৰকাশিত গ্ৰন্থত তেওঁৰ কবিতা অন্তৰ্ভুক্ত হৈছে।
তেওঁ তুৰস্কৰ ইস্তানবুল, আমেৰিকাৰ অষ্টিন, গ্ৰীচৰ এথেন্স আৰু বাংলাদেশ ঢাকাত অনুষ্ঠিত বিশ্ব কবিতা আৰু সাহিত্য মহোৎসৱত কবিতা পাঠৰ বাবে আমন্ত্ৰিত হৈছে। জাৰ্মানী, ফৰাচী, হাঙ্গেৰী, উজবেক আদি ভাষালৈও তেওঁৰ কবিতা অনুবাদ হৈছে।
অনুভৱ তুলসীয়ে মুনীন বৰকটকী বঁটা, কেন্দ্ৰীয় চৰকাৰৰ সংস্কৃতি দপ্তৰৰ জ্যেষ্ঠ ফেল’শ্বীপ, অন্তৰ্লিপি সাহিত্য বঁটা, সাহিত্য জ্যোতি বঁটা, অসম সাহিত্য সভাৰ সভাপতিৰ শতবৰ্ষীয় সাহিত্য সন্মান, পৰনাথ বিদ্যাবিনোদ স্মৃতি সাহিত্য পুৰস্কাৰ, নলবাৰী সাহিত্য সভাৰ ‘জমিৰুদ্দিন আহমদ বঁটা’, অসম সাহিত্য সভাৰ ‘অসম কেশৰী অম্বিকাগিৰী ৰায়চৌধুৰী বঁটা’ আদি পুৰস্কাৰ লাভ কৰিছিল।
