২১সংখ্যক নিউয়ৰ্ক ইণ্ডিয়ান ফিল্ম ফেষ্টিভেললৈ নিৰ্বাচিত হৈছে এখন অসমীয়া চুটি ছৱি।
‘শগুন’ নামৰ এই ছুটি ছৱিখনৰ পৰিচালক উৎপল বৰপুজাৰী।
জনপ্ৰিয় গল্পকাৰ তথা সাংবাদিক মনোজ কুমাৰ গোস্বামীৰ এটা বহু প্ৰশংসিত ছুটি গল্পৰ আধাৰত নিৰ্মাণ কৰা ছুটি ছৱিখন আইএফটি ইণ্ডিয়াই প্ৰযোজনা কৰিছে।
৪ৰ পৰা ১৫ জুনলৈকে ভাৰ্চুৱেলি অনুষ্ঠিত হ’ব লগা চিনেমা মহোৎসৱখনলৈ ‘শগুন’ৰ উপৰিও দেশৰ ১৫টা ভাষাৰ ৫৮খনকৈ চিনেমা, ডকুমেণ্টৰী আৰু ছুটি ছৱি নিৰ্বাচিত হৈছে।
ইয়াৰ পূৰ্বে ছুটি ছৱিখনে গুৱাহাটী চিনে ক্লাবে আয়োজন কৰা ১৩সংখ্যক গুৱাহাটী আন্তঃৰাষ্ট্ৰীয় চলচ্চিত্ৰ মহোৎসৱৰ ছুটি ছৱিৰ শিতানত শ্ৰেষ্ঠ ছৱিৰ সন্মান লাভ কৰিছিল।
ইয়াৰ উপৰিও ভাৰতৰ ছুটি ছৱি আৰু ডকুমেণ্টেৰী চিনেমা মহোৎসৱৰ ভিতৰত অন্যতম থিৰুৱন্তপুৰমৰ ১৩সংখ্যক ছাইনছ ফেষ্টিভেলত ‘শগুন’ক প্ৰদৰ্শিত কৰা হৈছিল।
গল্পকাৰ গোস্বামীৰ ছুটি গল্পৰ আধাৰতে নিৰ্মাণ কৰা ছুটি ছৱিখন বাডুংডুপ্পা কলা কেন্দ্ৰৰ সহযোগত গোৱালপাৰাৰ আগিয়া অঞ্চলত দৃশ্যগ্ৰহণ কৰা হৈছিল।
ছৱিখনত আধুনিক যুগৰ সাংবাদিকতাৰ কিছু কঠিন দিশ শক্তিশালীভাৱে উপস্থাপন কৰা হৈছে।
ছৱিখনত প্ৰতিষ্ঠিত অভিনেতা সঞ্জীৱ হাজৰিকা আৰু ধনঞ্জয় নাথৰ উপৰিও নৱাগত প্ৰতিভা ৰিমঝিম ডেকা, অংকিত শাণ্ডিল্যই অভিনয় কৰিছে।
ইয়াৰ উপৰিও শিশু অভিনেতা কপিল গাৰো, অনুৰাগ ৰাভা, ফণীভূষণ ৰাভা আৰু আশীষ ৰাভাই ছৱিখনত ভুমুকি মাৰিছে।
পৰিচালক উৎপল বৰপুজাৰীয়ে জনাইছে যে ছৱিখনত উপস্থাপন কৰা সাংবাদিকতা আৰু ইয়াৰ স’তে জড়িত কেতবোৰ বিষয়বস্তুক মনোজ কুমাৰ গোস্বামীৰ ছুটি গল্পটোৱে সুন্দৰভাৱে প্ৰতিফলিত কৰিছিল।
বৰপুজাৰীয়ে জনায় যে ছুটি ছৱিখনৰ সাংবাদিকতাৰ ক্ষেত্ৰখনত দেখা দিয়া দুৰ্নীতিসমূহ, যেনে- পেইড নিউজ, ফেক নিউজ, ৰাজনৈতিক আৰু কৰ্প’ৰেট হাউচসমূহৰ প্ৰভাৱ- ইত্যাদিকো উপস্থাপন কৰা হৈছে।
”এই ছুটি ছৱিখন এই সকলো বিষয়ৰ এক গভীৰ বাস্তৱিক প্ৰতিফলন।”- পৰিচালকজনে কয়।
