অসমৰ গোলাঘাট জিলাত স্থাপন কৰিবলগীয়া ৰাজ্যৰ দ্বিতীয়খন সৈনিক স্কুলৰ কাম লেহেমীয়া হোৱাৰ সন্দৰ্ভত প্ৰতিৰক্ষা মন্ত্ৰী ৰাজনাথ সিঙৰ হস্তক্ষেপ বিচাৰি কলিয়াবৰৰ সাংসদ গৌৰৱ গগৈয়ে এখন পত্ৰ লিখিছে। গগৈয়ে এই প্ৰকল্পটোক ‘ৰাষ্ট্ৰীয় প্ৰকল্প’ৰ মৰ্যাদা দিবলৈয়ো আহ্বান জনায়।
ৰাজনাথ সিঙলৈ লিখা পত্ৰখনত গৌৰৱ গগৈয়ে কয় যে প্ৰয়োজন হ’লে তেওঁ তেওঁৰ সাংসদৰ স্থানীয় অঞ্চল উন্নয়ন আঁচনিৰ সমস্ত ধন গোলাঘাট জিলাত সৈনিক স্কুল স্থাপনৰ বাবে দান দিবলৈ আগ্ৰহী।
‘’প্ৰক্ৰিয়াটোত দুবছৰ পলম হৈ গৈছে, ইয়াৰ মাজতে মই বিষয়টোত দৃষ্টি আকৰ্ষণ কৰি মুখ্য মন্ত্ৰীলৈ অনুৰোধ কৰি পত্ৰও লিখিছো। আনহাতে, গোলাঘাট জিলাত সৈনিক স্কুল স্থাপন কৰাটো নিশ্চিত কৰিবলৈ আপোনালৈ পত্ৰ লিখাৰ বাহিৰে উপায় বিচাৰি পোৱা নাই। ২০১৬ চনত প্ৰতিৰক্ষা মন্ত্ৰালয়ৰ পৰা ‘বিভাগীয় অনুমোদন লাভ কৰা সত্ত্বেও ৰাজ্য চৰকাৰখনে ইয়াৰ নিজৰ ফালৰ পৰা ভূমি, শৈক্ষিক তথা আৱাসিক গৃহ, খেল পথাৰ আদিৰ আন্ত:গাঁথনিৰ কামৰ বাবে পুজিৰ বিতৰণ পদ্ধতিৰ গ্ৰহণ বাবে কোনো পদক্ষেপ লোৱা নাই। যদি ৰাজ্য চৰকাৰৰ বাবে পুজিৰ সমস্যা হৈছে, মই এই প্ৰকল্পৰ বাবে মোৰ সাংসদৰ স্থানীয় অঞ্চল উন্নয়ন আঁচনিৰ সমস্ত ধন আগবঢ়াব বিচাৰো,’’-গগৈয়ে তেওঁৰ পত্ৰখনত ব্যক্ত কৰিছে।
তেওঁ লগতে উল্লেখ কৰে যে ৰাজ্যখনত বৰ্তমান মাত্ৰ এখনেই সৈনিক স্কুল নামনি অসমৰ গোৱালপাৰা জিলাত আছে।
‘’উজনি অসমত এনেকুৱা এখন প্ৰতিষ্ঠানৰ বাবে দীৰ্ঘদিন ধৰি দাবী উত্থাপন হৈ আহিছে। হিমাচল প্ৰদেশ, ৰাজস্থান, অন্ধ্ৰ প্ৰদেশ, বিহাৰ, হাৰিয়ানা, মহাৰাষ্ট্ৰ, কৰ্ণাটক আৰু উত্তৰ প্ৰদেশৰ দৰে বহু ৰাজ্যত দুখন বা ততোধিক সৈনিক স্কুল আছে। অসমৰ ৰাইজৰ স্বাৰ্থত মোৰ আপোনালৈ বিনম্ৰ অনুৰোধ যে আপুনি অসম চৰকাৰৰ সৈতে বিষয়টো আগবঢ়াব। ইয়াক ৰাষ্ট্ৰীয় প্ৰকল্প হিচাপেও গ্ৰহণ কৰিব পাৰে আৰু কেন্দ্ৰই পৰ্যাপ্ত পুজি প্ৰদান কৰি প্ৰকল্পটো সম্পূৰ্ণ কৰিব পাৰে,’’ সাংসদ গগৈয়ে পত্ৰখনত এইদৰে কয়।
উল্লেখযোগ্য যে সাংসদ গৌৰৱ গগৈ প্ৰতিৰক্ষা বিভাগৰ সংসদীয় স্থায়ী কমিটিৰ এগৰাকী সদস্য।