সামাজিক-সাংস্কৃতিক অনুষ্ঠান ‘সাতসৰী’ৰ বিহুনৃত্যই ‘ইণ্ডিয়াজ ৱৰ্ল্ড ৰেকৰ্ডছ’ত স্থান লাভ কৰিলে। দেওবাৰে অৰ্থাৎ ৩১ মাৰ্চত সোণাৰাম হাইস্কুল খেলপথাৰত সাতসৰীৰ উদ্যোগত ৮৩৭ গৰাকী নাচনী, ১৩৭ জন ঢুলীয়াই একেলগে ৭ মিনিট বিহুনাচ প্ৰদৰ্শন কৰি এই গৌৰৱ কঢ়িয়াই আনিবলৈ সক্ষম হয়।
অনুষ্ঠানত বিচাৰক হিচাপে ইণ্ডিয়াজ ৱৰ্ল্ড ৰেকৰ্ডছৰ বিষয়া প্ৰণৱ কুমাৰ, প্ৰিয়ংকা মেহতা, মহম্মদ শ্বাহাবুদ্দিন আৰু গীণিজ ৱৰ্ল্ড ৰেকৰ্ডছত নিজৰ নাম অন্তৰ্ভুক্ত কৰিবলৈ সক্ষম হোৱা চেতাৰবাদক কুন্তল ৰাজ চক্ৰৱৰ্তী উপস্থিত থাকি সমূহীয়া এই বিহুনৃত্যক স্বীকৃতি প্ৰদান কৰে।
বিহুনৃত্য অনুষ্ঠানটোৰ শুভ উদ্বোধন কৰি বিশিষ্ট শিক্ষাবিদ ড০ অমৰজ্যোতি চৌধুৰীয়ে ভাষণত কয় যে, ‘বিশ্ব অভিলেখ গঢ়াৰ লগতে শান্তি-সম্প্ৰীতিৰ বাৰ্তা সমগ্ৰ বিশ্বতে বিলাই দিয়াৰ উদ্দেশ্যে সাতসৰীয়ে যি উদ্যোগ হাতত লৈছে, তাৰবাবে মই উদ্যোক্তালৈ ওলগ জনাইছো।‘
অনুষ্ঠানৰ আৰম্ভণিতে মধুকুঞ্জ মহিলা চ’ৰাৰ সদস্যসকলে এটি সমৱেত গীত পৰিৱেশন কৰে। ইয়াৰ পিছতে আদৰণী ভাষণ প্ৰদান কৰি সাতসৰীৰ সভানেত্ৰী মন্দিৰা বৰুৱাই এই অনুষ্ঠানৰ জৰিয়তে অসমীয়াৰ বাপতি সাহোন বিহুক বিশ্ব দৰবাৰত প্ৰতিষ্টা কৰাৰ চেষ্টা কৰা হৈছে বুলি উল্লেখ কৰে।
অনুষ্ঠানৰ শেষত ইণ্ডিয়াজ ৱৰ্ল্ড ৰেকৰ্ডছৰ তৰফৰা পৰা প্ৰতিগৰাকী অংশগ্ৰহণকাৰীক একোখনকৈ প্ৰমাণপত্ৰ আৰু একোটাকৈ মেডেল প্ৰদান কৰে।
