শাৰদীয় দুৰ্গোৎসৱৰ বতৰত নিজৰ শিশুটিক “পুতলা পিষ্টলৰ সলনি এখন গ্ৰন্থ উপহাৰ দিয়ক” বাণীৰে ১৯৯৬ চনতে নগাঁও জিলাৰ ঐতিহ্যমণ্ডিত পুৰণিগুদামত জন্ম লাভ কৰা অসমৰ প্ৰথমখন শাৰদীয় শিশু গ্ৰন্থ মেলা বিশ্বজুৰি উদ্ভৱ হোৱা ক’ৰ’না মহামাৰীৰ ভয়াৱহতাৰ প্ৰতি লক্ষ্য ৰাখি এইবছৰৰ বাবে বাতিল কৰাৰ সিদ্ধান্ত গ্ৰহণ কৰিছে উদ্যোক্তা সকলে।
ৰূপালী জয়ন্তী বৰ্ষত ভৰি দিয়া শিশু গ্ৰন্থ মেলাখন প্ৰথম অৱস্থাত বহু কেইজন স্থানীয় গণ্য-মান্য ব্যক্তিৰ প্ৰচেষ্টাৰ অন্তত পুৰণিগুদামস্থিত শৰ্মা বুক এম্পিয়ামে আৰম্ভ কৰিছিল যদিও ২০০৮ চনৰ পৰা গ্ৰন্থমেলা খনৰ সম্পূৰ্ণ দ্বায়িত্বভাৰ পুৰণিগুদাম প্ৰেছ ক্লাৱে শিৰ পাতি লৈ ধাৰাবাহিকভাৱে জাক-জমকতাৰ মাজেৰে অনুষ্ঠিত কৰি বৃহত্তৰ অঞ্চলটোৰ শিশু সকলৰ সৰ্বাংগীন বিকাশৰ বাবে আৰম্ভ কৰিছিল মহৎ প্ৰচেষ্টা।
কিন্তু ক’ৰ’না সংক্ৰমণৰ আশংকা কৰি এই বছৰ গ্ৰন্থ মেলা খন অনুষ্ঠিত কৰিব পৰা নাযাব যদিও চৰকাৰী সকলো নীতি-নিৰ্দেশনা পালন কৰি ব্যতিক্ৰমী ধৰণৰে উদযাপন কৰা হ’ব শাৰদীয় শিশু গ্ৰন্থমেলাখনৰ ৰূপালী জয়ন্তী বৰ্ষৰ শুভাৰম্ভণি অনুষ্ঠানটি।
সদ্যহতে সকলো চৰকাৰী ক’ভিড প্ৰট’কল মানি চলি পুৰণিগুদাম অঞ্চলৰ কেৱল ২৫ জন বিশিষ্ট ব্যক্তিৰ দ্বাৰা ২৫ খনকৈ পতাকা দুৰ্গোৎসৱৰ আৰম্ভণিৰ দিনটোতে উত্তোলন কৰি অনুষ্টুপীয়াকৈ শুভাৰম্ভ কৰা হ’ব পুৰণিগুদাম শাৰদীয় শিশু গ্ৰন্থমেলা খনৰ বছৰজোৰা ৰূপালী জয়ন্তী বৰ্ষৰ কাৰ্যসূচী।
অৱশ্যে এই বছৰ শিশু গ্ৰন্থমেলাখন বাতিল কৰা হৈছে যদিও তাৰ পৰিৱৰ্তে কেৱল শিশুসকলৰ বাবে দুটা শাখাত আয়োজন কৰা হ’ব অনলাইন কবিতা আবৃত্তি প্ৰতিযোগিতা।
অ’নলাইন প্ৰতিযোগিতা খনৰ ফলাফল ৰূপালী জয়ন্তী বৰ্ষৰ শুভাৰম্ভণি অনুষ্ঠানত ঘোষণা কৰা হ’ব যদিও পুৰষ্কাৰ সমূহ জয়যুক্ত হোৱা শিশু সকলৰ ঘৰে-ঘৰে গৈ প্ৰদান কৰিব প্ৰেছ ক্লাৱৰ বিশেষ প্ৰতিনিধিয়ে।
অৱশ্যে ক’ৰ’না কালৰ অন্ততহে পুৰণিগুদাম শাৰদীয় শিশু গ্ৰন্থ মেলাৰ ৰূপালী জয়ন্তী বৰ্ষৰ সামৰণি অনুষ্ঠান ভাগ বৰ্ণাধ্য কাৰ্যসূচী মাজেৰে আয়োজন কৰা হ’ব বুলি সদৰি কৰিছে উপদেষ্টা তথা জ্যেষ্ঠ সাংবাদিক তপন কটকীয়ে।
শাৰদীয় শিশু গ্ৰন্থ মেলা খনৰ সন্দৰ্ভত এই সমূহ সিদ্ধান্ত এখন সাধাৰণ সভা পতি সৰ্বসন্মতি ক্ৰমে গ্ৰহণ কৰা হৈছে বুলি আনুষ্ঠানিক ভাৱে ঘোষণা কৰা দেখা যায় পুৰণিগুদাম প্ৰেছ ক্লাৱৰ সভাপতি হেমন্ত শইকীয়াৰ লগতে সম্পাদক ধ্ৰুৱজ্যোতি গায়নে।
আনহাতে ঐতিহ্যমণ্ডিত পুৰণিগুদাম শাৰদীয় শিশু গ্ৰন্থমেলা খনৰ সন্দৰ্ভত যিকোনো উৰাবাতৰিকে প্ৰশ্ৰয় নিদিবলৈও সংবাদ মাধ্যমৰ জৰিয়তে ৰাইজক আহ্বান জনাই পুৰণিগুদাম প্ৰেছ ক্লাৱৰ বিষয়ববীয়া সকলে।
