চিলেছিয়ান বক্সিং চেম্পিয়নশ্বিপত পদক নিশ্চিত কৰিলে অসমৰ বক্সাৰ লাভলিনা বৰগোহাঁইয়ে
পোলেণ্ডত চলি থকা ১৩ সংখ্যক ইণ্টাৰনেশ্যনেল চিলেছিয়ান বক্সিং চেম্পিয়নশ্বিপত অসমৰ প্ৰতিভাৱান মহিলা বক্সাৰ লাভলিনা বৰগোহাঁইৰ লগতে উত্তৰ-পূবৰ আন দুগৰাকী বক্সাৰে দমনীয় প্ৰদৰ্শন আগবঢ়াই ছেমি ফাইনেলত প্ৰৱেশ কৰি পদক নিশ্চিত কৰিবলৈ সক্ষম হৈছে।
প্ৰতিযোগিতাখনত ৬৯ কেজি শাখাত প্ৰতিদ্বণ্ডিতা আগবঢ়োৱা অসমৰ লাভলিনাই কোৱাৰ্টাৰ ফাইনেলত চেক গণৰাজ্যৰ মাৰ্টিনা স্কমৰাজ’ভাক পৰাস্ত কৰি এই কৃতিত্বৰ অধিকাৰী হয়।
ইফালে পাঁচবাৰৰ বিশ্ব চেম্পিয়ন মণিপুৰৰ মেৰী কমৰ লগতে এল সৰিতা দেৱীয়েও প্ৰতিযোগিতাখনৰ ছেমি ফাইনেলত প্ৰৱেশ কৰি পদক নিশ্চিত কৰিছে।
উল্লেখ্য যে আঘাতজনিত সমস্যাৰ বাবে জাকাৰ্টা এছিয়ান গেইমছৰ পৰা আঁতৰত থাকি দীৰ্ঘদিনৰ মূৰত বক্সিং ৰিঙলৈ প্ৰত্যাৱৰ্তন কৰা মেৰী কমে পোলেণ্ডত অনুষ্ঠিত হৈ থকা প্ৰতিযোগিতাখনৰ ছেমি ফাইনেললৈ ডাইৰেক্ট এণ্ট্ৰী লাভ কৰে। প্ৰতিযোগিতাখনত মেৰীয়ে ৪৮ কেজি শাখাত প্ৰতিদ্বণ্ডিতা আগবঢ়াব।
আনহাতে মণিপুৰৰ আন এগৰাকী মহিলা বক্সাৰ এল সৰিতা দেৱীয়ে চেক গণৰাজ্যৰ এলেনা চেচীক ৫-০ পইণ্টৰ ব্যৱধানত পৰাস্ত কৰি ছেমি ফাইনেললৈ অগ্ৰসৰ হয়। ছেমি ফাইনেলত সৰিতাই কাজাখস্তানৰ কৰিণা ইব্ৰাজিম’ভাৰ মুখামুখি হ’ব।
উল্লেখ্য যে ৬৪ কেজি শাখাত প্ৰতিদ্বণ্ডিতা আগবঢ়োৱা অসমৰ আন এগৰাকী মহিলা বক্সাৰ ফাইলু বসুমতাৰীয়ে কোৱাৰ্টাৰ ফাইনেলত পৰাস্ত হৈ প্ৰতিযোগিতাখনৰ পৰা অপ্ৰত্যাশিতভাৱে বিদায় লয়।