নগাওঁ জিলাৰ ঐতিহ্যমণ্ডিত পুৰণিগুদামৰ জনপ্ৰিয় মুখা আৰু ভাস্কৰ্য শিল্পী দেৱকান্ত হাজৰিকাক চি.চি.আৰ.টি. গুৱাহাটীৰ এগৰাকী আদৰ্শ শিক্ষক হিচাপে মহাৰাষ্ট্ৰলৈ ৰাষ্ট্ৰীয় বঁটা গ্ৰহণৰ বাবে আমন্ত্ৰণ কৰাত অঞ্চলবাসী উৎফুল্লিত হৈ পৰা পৰিলক্ষিত হৈছে৷
জানিব পৰা মতে, স্বতন্ত্ৰ আৰু সক্ৰিয় নাগৰিকৰূপে শিল্প জগতত পৰম্পৰাগত কাঠি মুখা, টেৰাকোটা আৰু ভাস্কৰ্য শিল্পৰে বিশেষ বৰঙণি আগবঢ়োৱা শিল্পী দেৱকান্ত হাজৰিকাক কোলহাপুৰস্থিত “ভাৰতীয় হিউমেনিটি একাডেমিক ৰিচাৰ্ছ এণ্ড ইনষ্টিটিউট ফৰ ইউথ্” নামৰ সংস্থাটোৱে চি.চি.আৰ.টি. গুৱাহাটীৰ এগৰাকী আদৰ্শ শিক্ষক হিচাপে উক্ত ৰাষ্ট্ৰীয় বঁটা গ্ৰহণৰ বাবে আমন্ত্ৰণ জনায়।
স্মৰ্তব্য যে, অহা ২ জুনত অনুষ্ঠিত হ’বলগীয়া বঁটা বিতৰণী সভাখনলৈ অসমৰ পৰা দেৱকান্ত হাজৰিকাক সংস্থাটোৱে আমন্ত্ৰণ কৰিছে যদিও আৰ্থিকভাৱে দুৰ্বল দৰিদ্ৰ শিল্পীজনে বঁটা গ্ৰহণৰ বাবে উক্ত অনুষ্ঠানলৈ যাবলৈ সমস্যাত পৰিছে বুলি জানিব পৰা গৈছে৷
এই ক্ষেত্ৰত শিল্পীগৰাকীয়ে অসমৰ কলা-সাহিত্য, কৃষ্টি- সংস্কৃতি জগতৰ বিভিন্ন অনুষ্ঠান- প্ৰতিষ্ঠানৰ লগতে সচেতন নাগৰিকসকলৰ সহায়, সহযোগিতা বিনম্ৰভাৱে কামনা কৰি তেওঁৰ ব্যক্তিগত ৭০০২৫২২১৫৬ ফোন নম্বৰত যোগাযোগ কৰিবলৈ আহ্বান জনাইছে।
