বিজেপিত জাহ গৈ অস্তিত্বহীন হ’ল “জাতীয় ঐক্য মঞ্চ”; আঞ্চলিক দলটোৰ পতাকাও সমৰ্পণ

তিৱাসকলৰ সমস্যাবোৰক গুৰুত্বসহ দাঙি ধৰাৰ লক্ষ্যৰে গঠিত তিৱা জনগোষ্ঠী প্ৰধান আঞ্চলিক ৰাজনৈতিক দল “জাতীয় ঐক্য মঞ্চ” আজি বিজেপিত জাহ যায়। ৰমাকান্ত দেউৰী নেতৃত্বাধীন দলটো বিজেপিৰ এটা মিত্ৰ দল হিচাপে আছিল।

আজি মৰিগাঁৱত অনুষ্ঠিত ভাৰতীয় জনতা পাৰ্টি আৰু জাতীয় ঐক্য মঞ্চৰ একত্ৰীকৰণ সমাৱেশত দলটো আনুষ্ঠানিকভাৱে ৰাষ্ট্ৰীয় দলটোত চামিল হয় আৰু ইয়াৰ লগে লগে অস্তিত্বহীন হৈ পৰিল এটা আঞ্চলিক দল।

দলটোৱে ২০১৩ চনত তিলা জাতীয় ঐক্য মঞ্চ নামেৰে আত্মপ্ৰকাশ কৰি পিছত “জাতীয় ঐক্য মঞ্চ” নাম লৈছিল মধ্য অসমৰ ৰাজনীতিত বিশেষ ভূমিকা লৈ আছিল।

মৰিগাঁও উচ্চতৰ মাধ্যমিক বিদ্যালয়ৰ খেলপথাৰত অনুষ্ঠিত একত্ৰীকৰণ সমাৱেশত বিজেপিৰ সভাপতি ৰঞ্জিত দাস আৰু নেডাৰ আহ্বায়ক তথা মন্ত্ৰী ড° হিমন্ত বিশ্ব শৰ্মাৰ উপস্থিতিত জাতীয় ঐক্য মঞ্চৰ প্ৰতিষ্ঠাপক সভাপতি তথা মৰিগাঁৱৰ বিধায়ক ৰমাকান্ত দেউৰীয়ে একত্ৰীকৰণৰ কথা ঘোষণা কৰে।

ঐক্য মঞ্চৰ নেতৃবৰ্গই দলীয় পতাকাও সমৰ্পণ কৰে বিজেপিক ৰাজ্যিক সভাপতি ৰঞ্জিত দাসক।

“আজিৰে পৰা দুখনি হিয়া একেলগ হ’ল।“, বিজেপিত চামিল হোৱা বুলি ঘোষণা কৰি ৰমাকান্ত দেউৰীৰ মন্তব্য।

আনহাতে, আঞ্চলিক দলটোক বিজেপিৰ মাজত লীন নিওৱাৰ পিছত টুইটাৰত মন্ত্ৰী হিমন্ত বিশ্বৰ মন্তব্য, “ৰাজ্যিক বিজেপিৰ সভাপতি শ্ৰী ৰঞ্জিৎ কুমাৰ দাস, মন্ত্ৰী শ্ৰী পিযুষ হাজৰিকা আৰু সতীৰ্থ বিধায়কসকলৰ উপস্থিতিত মৰিগাঁৱত অনুষ্ঠিত বিজেপিৰ সৈতে জাতীয় ঐক্যমঞ্চৰ একত্ৰীকৰণৰ বিশাল গণসমাৱেশত অংশগ্ৰহণ কৰি আনন্দিত হৈছো৷ ইয়ে দলক শক্তিশালী কৰি অধিক উদ্যমেৰে ৰাইজৰ সেৱা কৰিবলৈ আমাক উৎসাহ যোগাব৷”

উল্লেখ কৰিব পাৰি যে মুখ্য মন্ত্ৰী সোণোৱালৰ নিৰ্দেশত যোৱা ২৯ মে’ত অসম চৰকাৰে ভৈয়াম জনজাতি আৰু পিছপৰা শ্ৰেণী কল্যাণ বিভাগৰ যুটীয়া সচিব বিভাষ মোদীক DW/731/Autonomous Council/2019/105 নং নির্দেশযোগে তিৱা স্বায়ত্ত পৰিষদৰ বিত্তীয় লেনদেনৰ তদন্ত কৰিবলৈ নির্দেশনা জাৰি কৰিছিল৷

তিৱা স্বায়ত্ত পৰিষদত পূৰ্বৰ মুখ্য কার্যবাহী ৰমাকান্ত দেউৰী (বৰ্তমান বিধায়ক) আৰু বর্তমানৰ তিৱা স্বায়ত্ত পৰিষদৰ মুখ্য কার্যবাহী পৱন মান্তা উভয়ৰে দিনত কোটি কোটি টকাৰ অনিয়মৰ অভিযোগ আছে। শেহতীয়াকৈ পৱন মান্তা আৰু ৰমাকান্ত দেউৰীৰ মাজত সংঘাতে মূৰ দাঙি উঠে।

মুখ্য মন্ত্রী সর্বানন্দ সোণোৱালে কেৱল ২০১৬-১৭ বর্ষ আৰু ২০১৭-১৮ বর্ষৰহে তদন্ত কৰিবলৈ নিৰ্দেশ দিয়া ঘটনাই তদন্ত প্রক্রিয়াটোক ৰহস্যৰ মাজলৈ ঠেলি দিছে।

অথচ ২০১২ চনৰ পৰা ২০১৬ চনলৈ ৰমাকান্ত দেউৰী তিৱা স্বায়ত্ত পৰিষদৰ মুখ্য কার্যবাহী সদস্য হৈ থকাৰ সময়ছোৱাত ব্যাপক দুৰ্নীতিৰ অভিযোগ আছিল। তিৱাসকলৰ জাতীয় বীৰ জোঙাল বলহুৰ প্রতিমূর্তি স্থাপনৰ নামত ৬০-৬৫ লাখ টকাৰ দুৰ্নীতিৰ উপৰি আন কেইবাটাও বহু লাখ টকীয়া কেলেংকাৰি দেউৰীৰ দিনতে সংঘটিত হৈছিল।

দুৰ্নীতিৰ তদন্তৰ পৰা বাচিবলৈকে ৰমাকান্ত দেউৰীয়ে তেওঁৰ দলটো বিজেপিত চামিল কৰাৰ সিদ্ধান্ত ল’লে নেকি- এনেকুৱা এটা প্ৰশ্নও তুলিছে স্থানীয় ৰাজনীতি সচেতন লোকে।