আগন্তুক লোকসভা নিৰ্বাচনত বিজেপিক ভোট নিদিবলৈ অসমৰ ৰাইজক মুকলি আহ্বান জনাইছে আহোম জাতীয় সংগঠন তাই আহোম যুৱ ছাত্ৰ সন্মিলনে।
উত্তৰ-পূবৰ খিলঞ্জীয়াৰ ব্যাপক প্ৰতিবাদৰ পিছতো ক্ষমতালৈ আহিলেই বিতৰ্কিত নাগৰিকত্ব বিধেয়কখন গৃহীতকৰণৰ ঘোষণা কৰা বাবে দলটোক নিৰ্বাচনত এই শিক্ষা দিয়াৰ আহ্বান জনাইছে সংগঠনটোৱে।
“বৰ্তমানৰ বিজেপি চৰকাৰখনে অসমৰ সাতামপুৰুষীয়া ঐক্য, সম্প্ৰীতি, ভাষা, কৃষ্টি, সংস্কৃতি, ধৰ্মৰ লগতে জাতীয় অস্তিত্বৰ প্ৰতি ভাবুকি কঢ়িয়াই আনিছে। জাতিধ্বংসী নাগৰিকত্ব সংশোধনী বিধেয়ক গৃহীত কৰি হিন্দু বাংলাদেশীক অসমত সংস্থাপন কৰি অসমীয়া জাতি ধ্বংস কৰাৰ পৰিকল্পনা কৰিছে। এইবাৰ ৰাজ্যসভাত এই বিল উত্থাপন কৰিব নোৱাৰিলে যদিও বিজেপিৰ স্বয়ং ৰাষ্ট্ৰীয় সভাপতি অমিত শ্বাহে বিজেপি পুনৰ ক্ষমতালৈ আহিলে এই আইন প্ৰণয়ন কৰা হ’ব বুলি ঘোষণা কৰিছে। বিগত সময়ত খিলঞ্জীয়া অসমীয়া ৰাইজৰ ব্যাপক গণ প্ৰতিবাদ, আন্দোলনক নস্যাৎ কৰি অসমীয়া মানুহৰ জাতীয় আৱেগ-অনুভূতি ভৰিৰে মোহাৰি চূড়ান্তভাৱে বিশ্বাসঘাটকতা কৰিছে। এনে এটা ধুৰন্দৰ, দগাবাজ আৰু মিথ্যাচাৰী নেতাৰদ্বাৰা পৰিচালিত ৰাজনৈতিক দল বিজেপিক ভোটদান কৰি পুনৰ ক্ষমতালৈ আনিলে ভৱিষ্যত দিনত শান্তিপূৰ্ণ অসম গুজৰাট, উত্তৰ প্ৰদেশৰ দৰে অগ্নিগৰ্ভা হৈ পৰিব। অসম দ্বিতীয় ত্ৰিপুৰা হোৱাৰ পথত। গতিকে এনে এটা বিশ্বাসঘাটক, সাম্প্ৰদায়িক, মিথ্যাচাৰী দলক ভোটদান নকৰিবলৈ সংগঠনটোৱে পোনপটীয়াকৈ আহ্বান জনাইছে,” সংগঠনটোৰ কেন্দ্ৰীয় সভাপতি চাও হিটলাৰ দিহিঙ্গীয়াৰ বিবৃতিত প্ৰকাশ।
তাৰোপৰি তাই আহোমকে ধৰি অসমৰ ছটা জনগোষ্ঠীক জনজাতিকৰণৰ নিৰ্বাচনী প্ৰতিশ্ৰুতিৰ ক্ষেত্ৰতো বিজেপি চৰকাৰে চূড়ান্তভাৱে প্ৰতাৰণা কৰা বুলি অভিহিত কৰি গেৰুৱা দলটোক পুনৰ প্ৰতাৰণাৰ সুযোগ নিদিবলৈয়ো অসমৰ ৰাইজক সংগঠনটোৱে আহ্বান জনাইছে।
শেহতীয়াকৈ অশ্বিনী চেতিয়াৰ বিজেপি গমনে আহোম জাতীয় সংগঠন আটাছুক “নিকা আৰু প্ৰগতিশীল” কৰিছে বুলিও অভিহিত কৰিছে তাই আহোম যুৱ ছাত্ৰ সন্মিলনীয়ে।
“এজন সুবিধাবাদী, তথাকথিত নেতা” বুলি অভিহিত কৰি সংগঠনটোৱে দাবী কৰে চেতিয়াই নিৰ্বাচনত একো প্ৰভাৱ পেলাব নোৱাৰে।
“বিশ্বাসঘাটক নেতাৰে পৰিপূৰ্ণ বিজেপিত অশ্বিনী কুমাৰ চেতিয়া নামৰ সুবিধাবাদী তথাকথিত নেতাগৰাকীৰ গমনে আহোম ভোটাৰক প্ৰভাৱান্বিত কৰিব বুলি যদি বিজেপিয়ে ভাবিছে তেন্তে তেওঁলোকৰ অলীক কল্পনা। তাই আহোম জনগণে এই নেতাজনক কেতিয়াবাই প্ৰত্যাখান কৰিছে,” সংগঠনটোৰ মত।
