দিল্লীৰ বিজেপিৰ সভাপতি মনোজ তিৱাৰীয়ে অসমৰ সাংসদ বদৰুদ্দিন আজমলৰ মন্তব্যৰ প্ৰতিক্ৰিয়াত কৈছে যে অসম চৰকাৰৰ দুটা সন্তানৰ নীতিটো কোনো বিশেষ এটা সম্প্ৰদায়ৰ বিৰুদ্ধে নহয়। ইয়াক ইতিবাচক ধৰণে গ্ৰহণ কৰিব লাগে।
সোণোৱাল চৰকাৰৰ কেবিনেট বৈঠকে যোৱা ২১ অক্টোবৰত দুটাতকৈ অধিক সন্তান থকা পিতৃ বা মাতৃক চৰকাৰী চাকৰিত আৱেদন কৰাৰ বাবে অযোগ্য কৰাৰ সিদ্ধান্ত লৈছিল আৰু এইটো ২০২১ চনৰ ১ জানুৱাৰিৰ পৰা কাৰ্য্যকৰী হ’ব।
চৰকাৰৰ নীতিটোৰ পিছতে ধুবুৰীৰ সাংসদ তথা এ আই য়ু ডি এফৰ মুৰব্বী বদৰুদ্দিন আজমলে ইয়াৰ বিৰুদ্ধে সৰৱ হৈ নীতিটোৰ সমালোচনা কৰিছিল।
সাংসদজনে “ইছলামে ৰাজ্য চৰকাৰৰ দুটা সন্তানৰ নীতি ইছলামে নামানে” বুলি কৈ ইয়াৰ প্ৰতিক্ৰিয়া কৰিছিল।
“চৰকাৰে আমাক (মুছলমানক) এনেও চাকৰি নিদিয়ে। আমিও চাকৰিৰ আশা নকৰো। মুছলমানে দুটাতকৈ অধিক সন্তান জন্ম দিবই”, দুটা সন্তানৰ নীতিক অগ্ৰাহ্য কৰি সংবাদ মাধ্যমৰ আগত মন্তব্য কৰিছিল বদৰুদ্দিনে।
সংবাদ মাধ্যমৰ আগত সাংসদজনে মোহন ভাগৱতে হিন্দুসকলক অধিক সন্তান জন্ম দিয়াৰ বাবে জনোৱা আহ্বানকো কটাক্ষ কৰিছিল। তেওঁ কৈছিল, “এফালে মোহন ভাগৱতে হিন্দুক দহটাকৈ সন্তান জন্ম দিয়াৰ কথা কয়, আনফালে তেওঁলোকৰ চৰকাৰে দুটা সন্তান জন্ম দিয়াৰ কথা কয়। প্ৰথমে নিজৰ মাজত কথাবোৰ ঠিক কৰি লওক”।
বদৰুদ্দিন আজমলৰ মন্তব্যৰ প্ৰতিক্ৰিয়া ৰাষ্ট্ৰীয় ৰাজনীতি আৰু ৰাষ্ট্ৰীয় সংবাদ মাধ্যমতো দেখা গৈছে।
সাংসদজনৰ মন্তব্যৰ প্ৰতিক্ৰিয়া আগ বঢ়াই ২৮ অক্টোবৰত বিজেপি নেতা সুব্ৰমনিয়ন স্বামীয়ে প্ৰশ্ন কৰিছিল, “আজমলৰ পত্নী ৭-৮টা সন্তান জন্ম দিবলৈ ৰাজিনে?”
দিল্লী বিজেপিৰ সভাপতি তিৱাৰীয়ে অসম চৰকাৰৰ সিদ্ধান্তটোক এটা ভাল সিদ্ধান্ত আখ্যা দি কয়, অসম চৰকাৰে লোৱা সিদ্ধান্তটোক ইতিবাচক ধৰণে ল’ব লাগে। নিয়মটো কোনো সম্প্ৰদায়ৰ বিৰুদ্ধে নহয়। তিৱাৰীৰ এই মন্তব্য প্ৰকাশ পাইছে টাইমছ অব ইণ্ডিয়াত। তেওঁ কিছুমান মানুহে সকলো ভাল কামক বাধা দিব বিচাৰে বুলি কটাক্ষ কৰে।
