বিহুৰ ঐতিহ্য আৰু পৰম্পৰা ৰক্ষা কৰি টীয়ক আঞ্চলিক ছাত্ৰ সন্থাই প্ৰত্যেক বছৰৰ দৰেই এইবছৰো সম্পূৰ্ণ ক’ভিড প্ৰ’টকল মানি টীয়ক হাইস্কুল খেলপথাৰত কালি পহিলা বহাগৰ দিনটিত মুকলি বিহু উদযাপন কৰিছে।
পুৱা সদৌ অসম ছাত্ৰ সন্থাৰ পতাকা উত্তোলন কৰে আঞ্চলিক ছাত্ৰ সন্থাৰ সভাপতি পাপু কলিতাই, শ্বহীদ তৰ্পণ কাৰ্যসূচীত অংশগ্ৰহণ কৰে টীয়ক আছুৰ সম্পাদক প্ৰাঞ্জল দত্ত, উপদেষ্টা ক্ৰমে প্ৰীতমজ্যোতি শইকীয়া, প্ৰশান্ত দোলাকাষৰীয়া, দীপাংকৰ বেজবৰা, প্ৰাক্তন ছাত্ৰনেতা বিজু তনুৱাল আৰু পাপু কলিতা আৰু গছপুলি ৰোপণ কৰে ৰেঙণি এটি আশাৰ সঞ্চালক বিজু শৰ্মাই।
টীয়ক আঞ্চলিক ছাত্ৰ সন্থাৰ উপদেষ্টা ৰন্টু ভূঞাই আঁত ধৰা মুকলি বিহুখনি উদ্বোধন কৰে নৱাঁগত অভিনেত্ৰী সুকন্যা বৰুৱাই।
সদ্যঘোষিত অসম অসামৰিক সেৱা পৰীক্ষাত উত্তীৰ্ণ হৈ টীয়কলৈ গৌৰৱ কঢ়িয়াই অনা ৰন্টু বৰুৱাক সম্বৰ্ধনা জ্ঞাপন কৰে আছুৱে।
মুকলি বিহুত আমন্ত্ৰিত অতিথি হিচাপে উপস্থিত থাকে মাজুলী জিলাৰ সহঃ আয়ুক্ত হিমাদ্রি বৰা, সদৌ অসম ছাত্ৰ সন্থাৰ সহকাৰী সাধাৰণ সম্পাদক জুল খাউণ্ড, সদৌ যোৰহাট জিলা ছাত্ৰ সন্থাৰ সভাপতি বিজয় শংকৰ বৰদলৈ, প্ৰাগ নিউজৰ উজনি অসমৰ ব্যৰ’ চীফ উৎপল বৰা।
উল্লেখযোগ্য যে টীয়ক আছুৱে প্ৰতিবছৰে পহিলা বহাগৰ দিনটোত আয়োজন কৰা মুকলি বিহুখনিত বয়োজ্যেষ্ঠসকলৰ লগতে টীয়ক সমাজ জীৱনলৈ বৰঙণি আগবঢ়োৱা ব্যক্তিসকল তথা শিক্ষানুষ্ঠানসমূহৰ মুৰব্বীসকলক জলপান আপ্যায়ন আৰু ভৰি চুই সেৱা জনায়।
মুকলি বিহুখনিত নাট্যকাৰ তথা শিক্ষক ৰমেন শৰ্মা, বিশিষ্ট সুৰকাৰ অশোক কুমাৰ বৰা, টীয়ক উচ্চতৰ মাধ্যমিক বালিকা বিদ্যালয়ৰ অধ্যক্ষ ৰাজু কুমাৰ শইকীয়া, বনাই হাইস্কুলৰ প্ৰধান শিক্ষক ধ্ৰুৱজ্যোতি বৰা, জ্যেষ্ঠ সাংবাদিক ৰিজু কুমাৰ শইকীয়া, জাঁজী হেমনাথ শৰ্মা মহাবিদ্যালয়ৰ সহকাৰী অধ্যাপক ডঃ মণ্টু কুমাৰ বড়া, যোৰহাট জিলা সাংবাদিক সন্থাৰ সভাপতি ৰামপ্ৰসাদ ফুকনকে ধৰি বহু গণ্য মান্য ব্যক্তি উপস্থিত থাকে।
দুই সহস্ৰাধিক লোক সমবেত হোৱা আছুৰ মুকলি বিহুখনিত বিহুৰ লগতে ঝুমুৰ নৃত্য আৰু মিছিং জনগোষ্ঠীৰ লোকসকলে তেওঁলোকৰ নৃত্য প্ৰদৰ্শন কৰে।
