মহাকাশ এখন বিশাল জগত; মানুহে যিমানেই ইয়াৰ বিষয়ে জানিবলৈ চেষ্টা কৰে সিমানেই নতুন নতুন ৰহস্য উন্মোচিত হয়। শেহতীয়াকৈ বিজ্ঞানীসকলে বিশ্বব্ৰহ্মাণ্ডৰ আটাইতকৈ কম বয়সীয়া বা ‘শিশু গ্ৰহ’টো আৱিষ্কাৰ কৰিছে, যিটোৰ বয়স দহ লাখ বছৰতকৈও কম। মহাজাগতিক সময়ৰ হিচাপত ইয়াৰ অৰ্থ হ’ল গ্ৰহটোৰ মাত্ৰ ‘জন্ম’ হৈছে।
বিস্ময়কৰ কথাটো হ’ল, ই কোনো সৰু গ্ৰহ নহয়; বৰঞ্চ ইয়াৰ ভৰ বৃহস্পতিৰ সৈতে প্ৰায় সমান। বিজ্ঞানীসকলে ইয়াৰ নাম ‘ইলিয়াছ ২-২৪ বি’ (Elias 2-24 b) ৰাখিছে আৰু ইয়াক এতিয়ালৈকে আৱিষ্কৃত আটাইতকৈ নতুন গ্ৰহ বুলি কোৱা হৈছে।
এই আৱিষ্কাৰে বিজ্ঞানীসকলক আচৰিত কৰি তুলিছে। তেওঁলোকৰ আচৰিত হোৱাৰ কাৰণ হ’ল, গতানুগতিক তত্ত্ব অনুসৰি নক্ষত্ৰৰ পৰা ইমান দূৰত আৰু বিকাশৰ ইমান প্ৰাৰম্ভিক পৰ্যায়ত ইমান বিশাল গ্ৰহ গঠন হোৱাটো বাস্তৱিকতে অসম্ভৱ। কিন্তু আশাৰ কথাটো হৈছে যে এই গ্ৰহটোৰ আৱিষ্কাৰে বিজ্ঞানীসকলক গ্ৰহ গঠন প্ৰক্ৰিয়াৰ বিষয়ে নতুনকৈ জনাৰ সুযোগ আনি দিব।
১৬ ছেপ্টেম্বৰত ‘দ্য এষ্ট্ৰ’ফিজিকেল জাৰ্নেল লেটাৰছ’ত প্ৰকাশ পাইছিল এই অধ্যয়ন। গৱেষণা দলটোৰ নেতৃত্বত আছিল চিলিৰ ইউনিভাৰ্চিটি ডিয়েগো পৰ্টেলছৰ গৱেষক আন্দ্ৰেয়া বাৰ্নাৰ্ডি। তেওঁৰ নেতৃত্বত বিজ্ঞানীসকলে হাৱাইৰ ডব্লিউ এম কেক মানৱ নিৰীক্ষণ কেন্দ্ৰৰ তথ্যকোষত সংৰক্ষিত প্ৰায় সাতটা নতুন নক্ষত্ৰৰ পৰ্যবেক্ষণ পৰ্যালোচনা কৰে।
এই অধ্যয়নত এই নক্ষত্ৰবোৰৰ চাৰিওফালে গেছ আৰু ধূলিৰ বৃহৎ চক্ৰৰ (ডিস্ক) অস্তিত্ব ধৰা পৰিছে। এই চক্ৰবোৰৰ ভিতৰতে গ্ৰহ গঠন প্ৰক্ৰিয়াটো সংঘটিত হয়। যেতিয়া কোনো গ্ৰহ গঠন হ’বলৈ আৰম্ভ কৰে তেতিয়া ই নিজৰ পথৰ পৰা গেছ আৰু ধূলি আঁতৰাই পেলায়, যাৰ ফলত চক্ৰটোত শূন্য বা খালী ঠাই সৃষ্টি হয়।
এই খালী স্থানটোৱে বিজ্ঞানীসকলৰ বাবে এক গুৰুত্বপূৰ্ণ সূত্ৰ হিচাপে কাম কৰে। গৱেষক দলটোৱে ইলিয়াছ ২-২৪ নামৰ নতুন নক্ষত্ৰ এটাক আগুৰি থকা ধূলিৰ চক্ৰত স্পষ্ট খালী স্থান পৰ্যবেক্ষণ কৰে। সেই খালী স্থানৰ ভিতৰত এটা অতি অস্পষ্ট বস্তুৰ উপস্থিতি ধৰা পেলায়।
