আকৌ আক্ৰমণাত্মক হৈ পৰিছে ৰাছিয়া। ইউক্ৰেইনৰ ৰাজধানী কিয়েভ, ড্নিপ্ৰ’ আৰু খাৰ্কিভকে ধৰি ডাঙৰ ডাঙৰ চহৰবোৰত ৰাছিয়াৰ ভয়াৱহ বিমান আৰু ক্ষেপণাস্ত্ৰ আক্ৰমণত কমেও ১১ জন লোক নিহত হোৱাৰ লগতে ৬০ জনতকৈ অধিক আহত হয়।
মঙলবাৰে পুৱা সংঘটিত হয় এই আক্ৰমণ। ‘মস্কোৱে আন এক ভয়ংকৰ আক্ৰমণৰ প্ৰস্তুতি চলাইছে’ বুলি ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিয়ে সকীয়াই দিয়াৰ মাত্ৰ কেইদিনমান পিছতে এই আক্ৰমণ সংঘটিত হৈছে।
ড্নিপ্ৰ’ অঞ্চলৰ গৱৰ্ণৰ অলেক্সেণ্ড্ৰ হানজাই টেলিগ্ৰামযোগে কয় যে চহৰখনত ক্ষেপণাস্ত্ৰ আৰু ড্ৰ’ন আক্ৰমণত ৫ জন লোক নিহত হোৱাৰ লগতে ২৫ জন আহত হৈছে। আহতসকলক চিকিৎসালয়ত চিকিৎসাধীন হৈ আছে। আক্ৰমণৰ পিছত কেইবাটাও ঘৰ ধ্বংসাৱশেষলৈ পৰিণত হয়, গাড়ীত জুই লাগে আৰু শিশুৰ খেলপথাৰ এখনো ক্ষতিগ্ৰস্ত হয়।
ইউক্ৰেইনৰ ৰাজধানী কিয়েভৰ মেয়ৰ ভিটালি ক্লিচকোৱে কয় যে চহৰখনত শিশুকে ধৰি কমেও চাৰিজন লোক নিহত হোৱাৰ লগতে ৫১জন লোক আহত হৈছে। ২৪ মহলীয়া অট্টালিকা এটা মিছাইলৰ খুন্দাত আংশিকভাৱে ভাঙি বহু লোক ধ্বংসাৱশেষৰ তলত আবদ্ধ হৈ পৰে। ৯ মহলীয়া এটা অট্টালিকাতো অগ্নিকাণ্ড সংঘটিত হোৱাৰ লগতে আন্তঃগাঁথনিৰ ব্যাপক ক্ষতিসাধন হয়।
এই আক্ৰমণৰ সময়ত কিয়েভৰ মেট্ৰ’ ষ্টেচনত আশ্ৰয় লৈছিল হাজাৰ হাজাৰ লোক। প্ৰত্যক্ষদৰ্শীয়ে জনোৱা মতে, তেওঁলোক বেগ, বিচনা আৰু অন্যান্য প্ৰয়োজনীয় সামগ্ৰী লৈ ভূগৰ্ভস্থ আশ্ৰয় শিবিৰত আছিল, আনহাতে বায়ু প্ৰতিৰক্ষাই ৰাছিয়াৰ আক্ৰমণক প্ৰতিহত কৰিবলৈ সক্ৰিয়ভাৱে চেষ্টা কৰি আছে।
ইফালে ইউক্ৰেইনৰ খাৰকিভ অঞ্চলত ড্ৰ’ন আৰু মিছাইল আক্ৰমণত এটি শিশুসহ কমেও ১০ জন লোক আহত হোৱা বুলি মেয়ৰ ইহ’ৰ টেৰেখভে জানিবলৈ দিয়ে।
২০২২ চনৰ ফেব্ৰুৱাৰী মাহৰ পৰা আৰম্ভ হৈছিল ৰাছিয়া-ইউক্ৰেইন যুদ্ধ। এতিয়াও চলি আছে। দুয়োখন দেশৰ দীৰ্ঘদিনীয়া সংঘাতত শান্তি আলোচনাৰ বিশেষ অগ্ৰগতি হোৱা নাই।
