মহাৰাষ্ট্ৰৰ থানেৰ ডম্বিভলী অঞ্চলত সংঘটিত হৈছে ভয়ংকৰ বয়লাৰ বিস্ফোৰণৰ ঘটনা। এই বিস্ফোৰণওৰ ফলত অতি সোনকালেই ওচৰৰ ঔদ্যোগিক অঞ্চললৈ জুই বিয়পি পৰে।
এই বিস্ফোৰণৰ ফলত ১১ জনকৈ লোকে প্ৰাণ হেৰুৱাৰ লগতে পুৰুষ-মহিলাসহ প্ৰায় ৬৪ গৰাকী লোক আহত হৈছে।
ইতিমধ্যে আমুদন কেমিকেল প্ৰাইভেট লিমিটেডৰ স্বতাধিকাৰীৰ বিৰুদ্ধে হত্যাৰ গোচৰ ৰুজু কৰা হৈছে।
শুকুৰবাৰে পুৱা কল্যাণ ডম্বিভলী পূৰ্ণিগামৰ অগ্নিনিৰ্বাপক বিষয়া দত্তত্ৰেয়াই জনাইছে যে এতিয়াও উদ্ধাৰ অভিযান চলি আছে। ধ্বংসাৱশেষ পৰিষ্কাৰ কৰিলে মৃত্যুৰ সংখ্যা বৃদ্ধি পাব পাৰে বুলি তেওঁৰ আশংকা। প্ৰকাশ কৰে। আহত সকল এইমছ হাস্পতালত চিকিৎসাধীন হৈ আছে।
বৃহস্পতিবাৰে দিনৰ প্ৰায় ১:৪০ বজাত ডম্বিভলী ঔদ্যোগিক এলেকাৰ এমআইডিচি দ্বিতীয় পৰ্যায়ৰ আমুডান কেমিকেল কোম্পানীৰ ৰাসায়নিক প্লাণ্টৰ ভিতৰত বয়লাৰ বিস্ফোৰণৰ ফলত এই অগ্নিকাণ্ড সংঘটিত হয়। ইয়াৰ পিছত আৰু দুটা বয়লাৰ বিস্ফোৰণ ঘটে। জুইৰ তীব্ৰতা ইমানেই বেছি আছিল যে ওচৰৰ কাৰখানা আৰু ঘৰবোৰতো জুই লাগিছিল।
১০খন অগ্নিনিৰ্বাপক বাহিনীৰ গাড়ীৰে জুই নিৰ্বাপনৰ চেষ্টা চলোৱা হয়। ৰাষ্ট্ৰীয় দুৰ্যোগ সঁহাৰি বাহিনী (এন ডি আৰ এফ)ও উদ্ধাৰ অভিযানত যোগদান কৰে।
ইতিমধ্যে মহাৰাষ্ট্ৰৰ মুখ্যমন্ত্ৰী একনাথ শিণ্ডেই বিস্ফোৰণৰ উচ্চ পৰ্যায়ৰ তদন্তৰ নিৰ্দেশ দিছে। তদুপৰি মৃতকৰ পৰিয়ালৰ বাবে ৫ লাখ টকাৰ আৰ্থিক অনুদানৰ কথা ঘোষণা কৰিছে। তেওঁ কয় যে আহতসকলৰ চিকিৎসাৰ দায়িত্ব মহাৰাষ্ট্ৰ চৰকাৰে গ্ৰহণ কৰিছে।
জানিব পৰা মতে, সেই কাৰখানাতে খাদ্যৰ ৰং তৈয়াৰ কৰা হৈছিল। আৰু ইয়াত পেৰাক্সাইড ব্যৱহাৰ কৰা হৈছিল, যিটো অতি বিক্ৰিয়াশীল। ইয়াৰ ফলত বিস্ফোৰণ হ’ব পাৰে বুলি সন্দেহ কৰা হৈছে।
আৰক্ষীৰ সূত্ৰ অনুসৰি ইতিমধ্যে ভাৰতীয় দণ্ডবিধিৰ কেইবাটাও ধাৰাত আমুদন কেমিকেল প্ৰাইভেট লিমিটেডৰ মালিকৰ বিৰুদ্ধে গোচৰ ৰুজু কৰা হৈছে।
