বুধবাৰে পুৱাৰ ভাগত গোলাঘাট জিলাৰ দেৰগাঁৱৰ সমীপত এখন ট্ৰাকৰ সৈতে এখন যাত্ৰীবাহী বাছৰ মুখামুখি সংঘৰ্ষ ঘটে। এই ঘটনাত কমেও ১৪ জন লোকৰ মৃত্যু হোৱা বুলি কোৱা হৈছে যাৰ ভিতৰত পাঁচগৰাকী মহিলা আৰু এজন নাবালকো আছে।
গোলাঘাট জিলাৰ দেৰগাঁৱৰ বালিজানৰ সমীপত নিৰ্মাণাধীন ৰাষ্ট্ৰীয় ঘাইপথত বিপৰীত দিশৰ পৰা অহা এখন ট্ৰাকৰ সৈতে সংঘৰ্ষ হয় ৪৫ জন যাত্ৰীসহ তিনিচুকীয়া অভিমুখী বনভোজলৈ যোৱা দলৰ বাছখনৰ।
স্থানীয় সূত্ৰই জানিবলৈ দিয়া মতে, এই দুৰ্ঘটনাত দুটাকৈ পৰিয়াল নিঃশেষ হৈ যায়। বাছখনত থকা পৰিয়াল দুটাৰ আটাইকেইজন সদস্যৰ মৃত্যু হয়। ইয়াৰে এটা পৰিয়ালৰ ৪জন আৰু আনটো পৰিয়ালৰ ৫জন সদস্য আছিল।
মৃত লোকসকলৰ ভিতৰত কেইগৰাকীমানৰ নাম জানিব পৰা গৈছে। সেই অনুসৰি, তেওঁলোক হ’ল ক্ৰমে পিংকী শইকীয়া, ৰিংকী বৰা, অনিমা শইকীয়া, ১৩ বছৰীয়া শুভংকৰ শইকীয়া, ১০ বছৰীয়া নিহাৰিকা বৰা, দীপালী শইকীয়া, নৱজিৎ শইকীয়া আৰু ট্ৰাক চালক নুৰ আলম।
আনহাতে, এই ভয়ংকৰ দুৰ্ঘটনাটোত আহত হৈ চিকিৎসাধীন লোকসকলৰ ভিতৰত আছে নৱনীতা শইকীয়া (৩৪), ধ্ৰুৱজ্যোতি বৰা (১৮), প্ৰাচুৰ্য শইকীয়া (৭), জোনালী বৰা শইকীয়া (৪৩), কৌশিক শইকীয়া (১৭), চিন্ময় বৰা (১২),বিতোপন বৰা (২৪), অৰ্চনা শইকীয়া (৪১), প্ৰীতি শইকীয়া (৭), অভিজিৎ বৰা(৬), বুলু শইকীয়া (৪৭), ৰুলী শইকীয়া বৰা (৩৫), দীপ্তি শইকীয়া (১৭), মৃদুল শইকীয়া (৪০), মাধুৰ্য শইকীয়া (২৫), ধ্ৰুৱজ্যোতি বৰা (২৭), কুলুমণি শইকীয়া (৩৪), চিত্ৰলেখা বৰা (২৬), বিজিত শইকীয়া (২৮)আৰু অৰূপ শইকীয়া (৩৭)।
বাতৰি মতে, ঘাইপথ নিৰ্মাণ কৰ্তৃপক্ষই ৪ লেনযুক্ত পথটোত ডাইভাৰচনৰ সৃষ্টি কৰিছিল, যাৰ ফলত ট্ৰাকখনে “ভুল লেন”ত প্ৰৱেশ কৰিছিল। স্থানীয় এজন বাসিন্দাই জনায় যে কুঁৱলীয়ে পৰিস্থিতি আৰু বেয়া কৰি তুলিছিল।
কমাৰবন্ধাৰ পৰা তিনিচুকীয়াৰ টিলিঙা মন্দিৰ আৰু ডিব্ৰুগড়ৰ বগীবিললৈ নৱবৰ্ষৰ পিকনিকৰ বাবে প্ৰায় ৪৫ জন লোক বাছখনত যাত্ৰা কৰিছিল।
ঘটনা সন্দৰ্ভত গোলাঘাটৰ উপাযুক্ত পি উদয় প্ৰবীনে কয়, ‘আমি দুৰ্ঘটনাৰ কাৰণৰ তদন্ত কৰি আছো। শেহতীয়াকৈ আমি দিল্লীৰ পথ সুৰক্ষা বিশেষজ্ঞ আৰু এন এইচ ডি চি এলৰ সৈতে বৈঠকত মিলিত হৈছিলো আৰু আমাক আশ্বাস দিছিল যে ঘাইপথত উপযুক্ত চিন আৰু অন্যান্য শুধৰণিৰ কাম এমাহৰ ভিতৰত সম্পূৰ্ণ হ’ব। আজি এনেকুৱা ঘটনা ঘটাটো দুৰ্ভাগ্যজনক। কিন্তু আৰক্ষী আৰু কৰ্তৃপক্ষই তদন্ত সম্পূৰ্ণ কৰাৰ পিছতহে দুৰ্ঘটনাটো কেনেকৈ সংঘটিত হ’ল সেই বিষয়ে আমি অধিক ক’ব পাৰিম।’
ইপিনে, দুৰ্ঘটনাত আহতসকলক ততাতৈয়াকৈ উন্নত চিকিৎসাৰ বাবে চিকিৎসালয়লৈ প্ৰেৰণ কৰা হয়।
