হিমাচল প্ৰদেশত প্ৰচণ্ড বৰষুণৰ ফলত ভয়াৱহ বান আৰু ভূমিস্খলনৰ সৃষ্টি হৈছে। মৃতকৰ সংখ্যা ক্ৰমে বাঢ়িছে। ৰাজ্য চৰকাৰৰ তথ্য অনুসৰি এই পৰ্যন্ত মৃত্যু হৈছে ১৫ জন লোকৰ। বহুতো সন্ধানহীন হৈছে। যুদ্ধকালীনভাৱে উদ্ধাৰৰ কাম আৰম্ভ কৰা হৈছে। ধাৰাসাৰ বৰষুণৰ ফলত কেইবাটাও অঞ্চল ডুব গৈছে। প্ৰাকৃতিক দুৰ্যোগৰ বাবে ৰাজ্যখনৰ ২৯.১৬ কোটি টকা লোকচান হোৱা বুলি অনুমান কৰা হৈছে।
সূত্ৰ অনুসৰি বৰষুণৰ ফলত সৰ্বাধিক ক্ষতিসাধন হৈছে কুল্লু আৰু কাংৰা জিলা। ৰাজ্যিক দুৰ্যোগ ব্যৱস্থাপনা অভিযান কেন্দ্ৰৰ উদ্যোগত উদ্ধাৰৰ কাম আৰম্ভ হৈছে। তেওঁলোকে ক্ষয়-ক্ষতিৰ সবিশেষ তথ্যও প্ৰকাশ কৰিছে।
প্ৰতিবেদন অনুসৰি বৃহস্পতিবাৰলৈকে কাংৰা জিলাত মৃত্যুৰ সংখ্যা ৬জনলৈ বৃদ্ধি পাইছে। কুল্লু উপত্যকাতো সন্থানহীন হৈছে ৩ জন। তেওঁলোকৰ সন্ধানত অভিযান চলি আছে।
ভয়ংকৰ পৰিস্থিতি আৰু ক্ষতিৰ ছবি
বিগত কিছুদিন ধৰি ধাৰাসাৰ বৰষুণৰ ফলত বিয়াছ আৰু শতদ্ৰু নদীৰ পানী বিপদসীমাৰ ওপৰেৰে বৈ গৈছে। কুল্লু জিলাৰ সায়ঞ্জ উপত্যকাৰ জীভা নালা, হুৰলা নালা আৰু বঞ্জৰা অঞ্চলৰ ডাৱৰ বিস্ফোৰণৰ বৰষুণৰ ফলত যথেষ্ট ক্ষতিগ্ৰস্ত হৈছে। শুকুৰবাৰে ধৰ্মশালাৰ খনিয়াৰাৰ মনুনি খাদত বানত এজন শ্ৰমিকৰ মৃত্যু হয়। মৃত যুৱকজন ফতেহপুৰৰ নংগল পঞ্চায়তৰ পঞ্চুদা গাঁৱৰ নিতিন কুমাৰ বুলি জানিব পৰা গৈছে।
আজি ৮ খন জিলাত জাৰি হল হালধীয়া সতৰ্কতা
বতৰ বিজ্ঞান বিভাগে হিমাচল প্ৰদেশৰ ৮খন জিলা (উনা, বিলাসপুৰ, হামিৰপুৰ, কাংৰা, মাণ্ডি, শিমলা, সোলান আৰু ছিৰমৌৰ)ত ধাৰাসাৰ বৰষুণৰ বাবে হালধীয়া সতৰ্কবাণী জাৰি কৰিছে। ২৯, ৩০ জুন আৰু ১ জুলাইত উনা, বিলাসপুৰ, হামিৰপুৰ, কাংগৰা, ছিৰমৌৰ আৰু সোলানত ধাৰাসাৰ বৰষুণৰ সম্ভাৱনা আছে। ইয়াৰ উপৰিও চাম্বা, কুল্লু, শিমলা আৰু মাণ্ডিতো ধাৰাসাৰ বৰষুণৰ সম্ভাৱনা আছে।
