দেশৰ কেইবাখনো চহৰত এটাৰ পিছত আনটো ওখ অট্টালিকা ভাঙি পৰাৰ খবৰৰ পিছত এইবাৰ ৰাজধানী দিল্লীত এটা ওখ অট্টালিকা ভাঙি পৰাৰ ঘটনা ঘটিছে।
দিল্লীৰ বুৰাৰীত এটা চাৰি মহলীয়া অট্টালিকা ভাঙি পৰিছে। অট্টালিকাটোৰ নিৰ্মাণৰ কাম সম্পূৰ্ণ হৈছিলহে মাত্ৰ। সোমবাৰে সন্ধিয়া “অস্কাৰ পাব্লিক স্কুল”ৰ সমীপৰ “কৌশিক এনক্লেভ”ত সংঘটিত হয় এই ঘটনা। ঘটনাস্থলীৰ পৰা এতিয়ালৈ মুঠ ১২ জন লোকক উদ্ধাৰ কৰা হৈছে। ইয়াৰে ২ জনৰ মৃত্যু হোৱা বুলি জানিব পৰা গৈছে।
স্থানীয় সূত্ৰৰ পৰা জানিব পৰা মতে, ঘটনাৰ সময়ত ঘৰটোত ২০-২৫জন লোক আছিল। বিজেপিৰ সাংসদ মনোজ তিৱাৰীয়ে অভিযোগ কৰে যে গাফিলতিৰ বাবেই বহুমহলীয়া অট্টালিকাটো ভাঙি পৰে।
বহুমহলীয়া অট্টালিকাৰ দুৰ্যোগৰ খবৰ পাই সাংসদগৰাকী অঞ্চলটোত উপস্থিত হয়। ঘটনাস্থলী পৰিদৰ্শন কৰি তেওঁ কয়, “নতুন ঘৰটো ভাঙি গ’ল। ক’ৰবাত গাফিলতি হোৱাটো স্পষ্ট। ইয়াৰ কাৰণ সোনকালে বিচাৰি উলিয়াব লাগিব। এই গাফিলতিৰ বাবে যি বা যিসকল দায়ী, তেওঁলোকক ৰেহাই দিয়া নহ’ব।”
দিল্লী অগ্নিনিৰ্বাপক বাহিনীৰ সূত্ৰৰ পৰা পোৱা শেহতীয়া তথ্য অনুসৰি এতিয়াও কেইবাজনো লোক ঘৰৰ ভিতৰত আবদ্ধ হৈ থাকিব পাৰে বুলি আশংকা কৰা হৈছে। তেওঁলোকক উদ্ধাৰৰ বাবে কাম চলি আছে।
সোমবাৰে সন্ধিয়া প্ৰায় ৭ বজাত ভাঙি পৰে বহুমহলীয়া অট্টালিকাটো। তথ্য লাভ কৰাৰ লগে লগে অগ্নিনিৰ্বাপক বাহিনীয়ে দ্ৰুতগতিত সেই স্থানত উপস্থিত হৈ উদ্ধাৰ অভিযান আৰম্ভ কৰে। উদ্ধাৰ অভিযানৰ বাবে মুঠ ৯ টা বাহিনী মোতায়েন কৰা হয়। ইয়াৰ উপৰিও দিল্লী অসামৰিক প্ৰতিৰক্ষা আৰু ৰাষ্ট্ৰীয় দুৰ্যোগ সঁহাৰি বাহিনীৰ সদস্যসকলেও উদ্ধাৰ অভিযানত সহযোগ কৰে।
