দেশৰ বাণিজ্য নগৰী মুম্বাইত ধাৰাসাৰ বৰষুণ আৰু ভয়ংকৰ ভূমিস্খলনৰ ফলত অতি কমেও ২০ জন লোক নিহত হোৱাৰ উপৰি আহত হৈছে বহু লোক।
শনিবাৰে নিশাৰ পৰা দেওবাৰে পুৱালৈ অব্যাহত থকা ধাৰাসাৰ বৰষুণে মুম্বাইত একপ্ৰকাৰ বিভীষিকাৰ সৃষ্টি কৰিছে ।
বৰষুণৰ ফলত মহানগৰখনৰ উপকণ্ঠ চেম্বুৰ আৰু ভিৰখুলী অঞ্চলত বৰষুণৰ পানীয়ে সৃষ্টি কৰিছে প্ৰৱল কৃত্ৰিম বানপানীৰ।
ধাৰাসাৰ বৰষুণ আৰু কৃত্ৰিম বানৰ ফলত অঞ্চলকেইটাত হোৱা ভূমিস্খলনৰ ফলত বহু আৱাসগৃহ খহি পৰিছে।
ইয়াৰ ফলতে ২০ জনকৈ লোকৰ মৃত্যু হোৱা বুলি জানিব পৰা গৈছে।
আনহাতে, উদ্ধাৰকাৰী দলে দুয়োটা অঞ্চলৰ পৰা অতি কমেও ২৫ গৰাকী আহত লোকক উদ্ধাৰ কৰি চিকিৎসালয়ত ভৰ্তি কৰিছে।
সমগ্ৰ মুম্বাই মহানগৰখনত ৰেড এলাৰ্ট জাৰি কৰা হৈছে আৰু প্ৰশাসনে নাগৰিকসকলক ঘৰৰ পৰা বাহিৰলৈ নোলাবলৈ আহ্বান জনাইছে।
Saddened by the loss of lives due to wall collapses in Chembur and Vikhroli in Mumbai. In this hour of grief, my thoughts are with the bereaved families. Praying that those who are injured have a speedy recovery: PM @narendramodi
— PMO India (@PMOIndia) July 18, 2021
মুম্বাইৰ পৰা থানে সংযোগী ৰে’লপথটোৰ দাদৰ, পাৰেল, মুতাংগা, কুৰ্লা, চিয়ন, ভান্দুপ আদি ঠাইত কৃত্ৰিম পানীত বুৰ যোৱাৰ বাবে কেন্দ্ৰীয় আৰু পশ্চিম ৰে’লৱেই থানে অভিমুখী সকলো ৰে’লৰ চলাচল বাতিল কৰিছে।
প্ৰধানমন্ত্ৰী নৰেন্দ্ৰ মোদীয়ে বৰষুণৰ ফলত মৃত্যু হোৱা লোকসকলৰ প্ৰতি শোক ব্যক্তি কৰিছে আৰু প্ৰতিগৰাকী মৃত ব্যক্তিৰ পৰিয়াললৈ ২ লাখ টকা আৰু আহত ব্যক্তিলৈ ৫০ হাজাৰ টকাৰ এককালীন সাহায্য ঘোষণা কৰিছে।
