দখলদাৰী ইজৰাইল সেনাই পেলেষ্টাইনৰ গাজাত বিভিন্ন স্থানত তীব্ৰ বিমান আক্ৰমণ চলাইছে। ইয়াত দুশৰো অধিক পেলেষ্টাইনী লোকে প্ৰাণ হেৰুৱাইছে। তাৰ মাজত বহু শিশুও আছে৷ আন বহু লোকো আহত হৈছে।
যোৱা ১৯ জানুৱাৰীত পেলেষ্টাইনৰ স্বাধীনতাকামী হামাছৰ সৈতে যুদ্ধবিৰতি আৰম্ভ হোৱাৰ পিছত ইজৰাইলৰ এইটোৱেই আটাইতকৈ ডাঙৰ আক্ৰমণ।
২০২৩ চনৰ ৭ অক্টোবৰত হামাছে ইজৰাইলৰ সীমান্ত অতিক্ৰম কৰি আকস্মিক আক্ৰমণ চলায়। সেই সময়ত ১১৩৯ জন লোকৰ মৃত্যু হৈছিল। তদুপৰি দুশৰো অধিক লোকক অপহৰণ কৰি পণবন্দী কৰি ৰখা হৈছিল। ইয়াৰ পিছত ইজৰাইলে গাজাত প্ৰত্যাক্ৰমণ চলায়।
ইজৰাইলৰ বাহিনীয়ে এই অভিযানৰ নামত গাজাত ধাৰাবাহিক হত্যাকাণ্ড সংঘটিত কৰিছে। ইজৰাইলে আক্ৰমণ নকৰা কোনো ঠাই বাকী নাই। এই অৱৰোধ কৰা উপত্যকাৰ বিদ্যালয়, চিকিৎসালয়, মছজিদ, আৱাসিক অট্টালিকাকে ধৰি অধিকাংশ নিৰ্মাণ ইজৰাইলৰ আক্ৰমণৰ ফলত ধ্বংসাৱশেষলৈ পৰিণত হৈছে।
গাজাত হামাছৰ নিয়ন্ত্ৰিত স্বাস্থ্য মন্ত্ৰালয়ে প্ৰকাশ কৰা অনুসৰি এতিয়ালৈকে তাত কমেও ৪৮,৫৭২ জন পেলেষ্টাইনী লোকৰ মৃত্যু হৈছে। তদুপৰি আৰু ১, ১২, ০৩২জন লোক আহত হৈছে।
অৱশ্যে গাজাৰ চৰকাৰী মিডিয়া অফিচে জনোৱা মতে, তাত ৬১,৭০০ৰো অধিক লোকে প্ৰাণ হেৰুৱাইছে। তাত নিৰুদ্দেশ হোৱা হাজাৰ হাজাৰ পেলেষ্টাইনী এতিয়া জীয়াই থকা নাই বুলিও ধাৰণা কৰা হয়।
ইপিনে, ইজৰাইলে দাবী কৰিছে যে এই আক্ৰমণ হামাছৰ শীৰ্ষ নেতাক লক্ষ্য কৰি চলোৱা হৈছে। ইজৰাইলৰ সংবাদ মাধ্যম কানৰ এক প্ৰতিবেদন অনুসৰি ইজৰাইলৰ সেনাই অভিযোগ উত্থাপন কৰিছে যে হামাছৰ যোদ্ধাসকলে পুনৰ আক্ৰমণ চলাবলৈ সাজু হৈছে।
