উত্তৰাখণ্ডত এক ভয়ংকৰ বাছ দুৰ্ঘটনাত কেইবাজনো তীৰ্থযাত্ৰীৰ মৃত্যু ঘটিছে। দেওবাৰে সংঘটিত দুৰ্ঘটনাটোত মুঠ ২৫ জন লোকৰ মৃত্যু হোৱাৰ আশংকা কৰা হৈছে। অৱশ্যে, এতিয়ালৈকে ২২ জন লোকৰ মৃত্যুৰ খবৰ নিশ্চিত কৰা হৈছে। এছডিআৰএফৰ দলে উদ্ধাৰ কাৰ্য চলাইছে।
মধ্য প্ৰদেশৰ পান্না জিলাৰ পৰা ২৮ জন তীৰ্থযাত্ৰী কঢ়িয়াই নিয়া বাছখন উত্তৰকাশীলৈ গৈ আছিল। যমুনেত্ৰী ৰাষ্ট্ৰীয় ঘাইপথৰ কাষেৰে গৈ থকা উত্তৰকাশী জিলাৰ দামতাত নিয়ন্ত্ৰণ হেৰুৱাই বাছখন প্ৰায় ১৫০ মিটাৰ গভীৰ খাদত পৰে।
দুৰ্ঘটনাৰ ফলত মৃত্যু ঘটা লোকৰ মৃতদেহ উদ্ধাৰ কৰা হৈছে আৰু গুৰুতৰভাৱে আহত তীৰ্থযাত্ৰীক চিকিৎসালয়লৈ প্ৰেৰণ কৰা হৈছে। মৃত্যুৰ সংখ্যা বৃদ্ধি হোৱাৰ সম্ভাৱনাৰ কথা প্ৰকাশ কৰিছে ৰাজ্যখনৰ ডিজিপি অশোক কুমাৰে।
এই মর্মান্তিক দুর্ঘটনাত শোক প্রকাশ কৰাৰ লগতে কেন্দ্ৰীয় গৃহমন্ত্ৰী অমিত শ্বাহে উত্তৰাখণ্ডৰ মুখ্যমন্ত্ৰী পুষ্কৰ ধামিৰ সৈতে কথা পাতি উদ্ধাৰ কাৰ্যৰ বুজ লয়।
ইপিনে, প্রধানমন্ত্রীৰ কাৰ্যালয়ে কৰা এটা টুইটত এই দুৰ্ঘটনাত নিহত লোকৰ পৰিয়াললৈ ২লাখ টকা আৰু আহতসকলক ৫০হাজাৰ টকাৰ ক্ষতিপূৰণ দিয়াৰ কথা ঘোষণা কৰিছে।
