আমেৰিকাৰ লছ এঞ্জেলছ ভয়ংকৰ জুইয়ে গ্ৰাস কৰিছে। কেলিফৰ্ণিয়াৰ একাধিক চহৰত এই জুই বিয়পি পৰিছে। ইতিমধ্যে হাজাৰ হাজাৰ ঘৰ জ্বলি ছাই হৈ গৈছে। প্ৰকৃতিৰ ৰোষত ৫ জন লোকে প্ৰাণ হেৰুৱাইছে। লাখ লাখ লোক গৃহহীন হৈ পৰিছে।
বিভিন্ন অঞ্চলৰ বাসিন্দাসকলক সুৰক্ষিত স্থানলৈ স্থানান্তৰ কৰাৰ প্ৰক্ৰিয়া এতিয়াও অব্যাহত আছে। জৰুৰীকালীন অৱস্থা জাৰি কৰা হৈছে।
বাতৰি অনুসৰি, লছ এঞ্জেলছৰ পাহাৰীয়া অঞ্চলৰ পৰা চহৰ অঞ্চললৈ জুই বিয়পি পৰিছে। সেয়ে ঘন জনবসতিপূৰ্ণ অঞ্চলৰ পৰা দ্রুত গতিৰে মানুহক উলিয়াই অনা হৈছে৷ জানিব পৰা মতে, ছান্টা মনিকা আৰু মালিবুৰ উপৰিও আন চাৰিটা স্থানত পৃথকে অগ্নিকাণ্ড সংঘটিত হৈছে। ফলত পৰিস্থিতি অধিক ভয়াৱহ হৈ পৰিছে।
বুধবাৰে (৮ জানুৱাৰী) ৫ জন লোকৰ মৃত্যু হোৱা বুলি জানিব পৰা গৈছে। আহতৰ সংখ্যাও বহু বৃদ্ধি পাইছে। অগ্নিনিৰ্বাপক বাহিনী আৰু উদ্ধাৰকাৰীসকলৰো বহু আহত হৈছে। প্ৰায় লক্ষাধিক লোকে নিজৰ প্ৰাণৰ ভয়ত ঘৰ এৰি পলায়ন কৰিছে।
এতিয়ালৈকে দক্ষিণ কেলিফৰ্ণিয়াৰ একাধিক স্থানৰ পৰা ৭০ হাজাৰ বাসিন্দাক উলিয়াই অনা হৈছে। ইতিমধ্যে হাজাৰ হাজাৰ ঘৰ জুইত জাহ গৈছে। যিটো লছ এঞ্জেলছৰ জুইৰ ইতিহাসত আটাইতকৈ ভয়ংকৰ হিচাপে পৰিগণিত হৈছে।
এই ভয়ংকৰ দুৰ্যোগৰ বাবেই আমেৰিকাৰ বিদায়ী ৰাষ্ট্ৰপতি জো বাইডেনে ইটালী ভ্ৰমণ বাতিল কৰিছে। হোয়াইট হাউছৰ প্ৰেছ সচিব কেৰিন জিন পিয়েৰে সংবাদ মাধ্যমৰ আগত কয়, ‘’বুধবাৰে বিয়লি আমেৰিকাৰ ৰাষ্ট্ৰপতি জো বাইডেনে লছ এঞ্জেলছ ভ্ৰমণ কৰিছিল। তাত তেওঁ আৰক্ষী, অগ্নিনিৰ্বাপক বাহিনী আৰু উদ্ধাৰকাৰী দলক সাক্ষাৎ কৰে। কেলিফৰ্ণিয়াত এক বৃহৎ দুৰ্যোগৰ ঘোষণা কৰা হৈছে। সকলো পৰিস্থিতিৰ পৰ্যালোচনা কৰি ৰাষ্ট্ৰপতি বাইডেনে ইটালী ভ্ৰমণ বাতিল কৰিছে। তেওঁ এতিয়া সমগ্ৰ পৰিস্থিতি পৰীক্ষা আৰু নিৰীক্ষণ কৰি আছে।”
উল্লেখ্য যে ছান্টা মনিকা আৰু মালিবুৰ মাজৰ কমেও ১২৬২ একৰ ভূমি প্ৰথমে জুইৰ গ্ৰাসত পৰিবলৈ আৰম্ভ কৰিছিল। শুকান বতৰত প্ৰচণ্ড বতাহৰ ফলত দ্ৰুতগতিত বিয়পি পৰে জুই। এতিয়াও প্ৰচণ্ড গতিত বলি আছে বতাহ। ফলত অগ্নিনিৰ্বাপক বাহিনী অসুবিধাৰ সন্মুখীন হৈছে। ঘৰবোৰৰ সমান্তৰালকৈ ৰাস্তাৰ গাড়ীবোৰো জ্বলি আছে। লছ এঞ্জেলছৰ আকাশখন ক’লা ধোঁৱাই আৱৰি ধৰিছে। ফলত শিশু আৰু বৃদ্ধসকল অসুস্থ হৈ পৰিছে।
লছ এঞ্জেলছৰ অৰ্থ হৈছে “পৰীসকলৰ চহৰ।” সেই চহৰখন এতিয়া জুইৰ লেলিহান শিখাই আগুৰি ধৰিছে। সেয়ে, এই জুই কেনেকৈ নিয়ন্ত্ৰণলৈ অনা হয় তালৈ সকলোৰে দৃষ্টি ৰৈছে।
