জানুৱাৰী মাহৰ পিছৰ এইবাৰ মে’ মাহ। মাত্ৰ কেইমাহমানৰ ভিতৰতে পুনৰ মন্দিৰত দুৰ্যোগৰ সৃষ্টি হ’ল। অন্ধ্ৰ প্ৰদেশৰ তিৰুপতি মন্দিৰত সংঘটিত হোৱা কৰুণ দুৰ্ঘটনাৰ পুনৰাবৃত্তি ঘটিছে এইবাৰ গোৱাৰ শিৰগাঁৱত।
শনিবাৰে পুৱা লাইৰাই দেৱী মন্দিৰত সংঘটিত হোৱা পদপিষ্টৰ ঘটনাত কমেও ৬ জন লোক নিহত হয়। কমেও ১৫ জন লোক আহত হৈছে।
শুকুৰবাৰে গভীৰ নিশাৰ পৰা মন্দিৰৰ বাৰ্ষিক শোভাযাত্ৰাৰ বাবে বহু লোক সমবেত হয়। তাতেই ঘটে বিপৰ্যয়। জনসমাগম বৃদ্ধি পোৱাৰ লগে লগে পুৱাৰ ভাগত এই পদপিষ্টৰ ঘটনা সংঘটিত হোৱাৰ খবৰ পোৱা গৈছিল। এই ভিৰৰ বাবে বহু লোক মাটিত পৰি যায়।
উল্লেখ্য যে যোৱা ৮ জানুৱাৰীত তিৰুপতি মন্দিৰত হোৱা পদপিষ্টৰ ঘটনাত ৬জন তীৰ্থযাত্ৰীয়ে প্ৰাণ হেৰুৱাইছিল। আনহাতে কমেও ২০ জন লোক আহত হয়।
উত্তৰ গোৱাৰ আৰক্ষী অধীক্ষক অক্ষত কৌশলে শিৰগাঁৱৰ লাইৰাই দেৱী মন্দিৰত সংঘটিত পদপিষ্টৰ ঘটনাত ৬ জন লোকৰ মৃত্যু হোৱা বুলি নিশ্চিত কৰিছে। শনিবাৰে পুৱাৰ ভাগত সংঘটিত হোৱা এই দুৰ্ঘটনাত আন কমেও ১৫ জন লোক আহত হোৱা বুলিও তেওঁ জনায়।
গোৱাৰ মুখ্যমন্ত্ৰী প্ৰমোদ সাৱন্তে এই ঘটনাত শোক প্ৰকাশ কৰিছে। তেওঁ কয় যে তেওঁ ব্যক্তিগতভাৱে সমগ্ৰ পৰিস্থিতিৰ ওপৰত নজৰ ৰাখিছে। প্ৰধানমন্ত্ৰী নৰেন্দ্ৰ মোদীয়েও শিৰগাঁৱৰ লাইৰাই দেৱী মন্দিৰত সংঘটিত হোৱা দুৰ্যোগৰ বুজ লৈছে। তেওঁ গোৱাৰ মুখ্যমন্ত্ৰী প্ৰমোদ সাৱন্তৰ সৈতে ফোনযোগে কথা পাতিছে।
