পুনে-বেংগালুৰু ৰাষ্ট্ৰীয় ঘাইপথৰ নাভালে দলঙৰ সমীপত সংঘটিত হয় এক ভয়ংকৰ দুৰ্ঘটনা। তীব্ৰবেগী কণ্টেইনাৰ ট্ৰাকে হঠাতে নিয়ন্ত্ৰণ হেৰুৱাই বিধ্বংসী ৰূপ ধাৰণ কৰে। প্ৰত্যক্ষদৰ্শীয়ে দাবী কৰিছে যে ট্ৰাকখনৰ ব্ৰেক বিকল হোৱাৰ বাবে চালকে নিয়ন্ত্ৰণ হেৰুৱাই পেলায়। ক্ষন্তেকতে ট্ৰাকখনে আন এখন বৃহৎ কণ্টেইনাৰ ট্ৰাককে ধৰি ৫ৰ পৰা ১০খন গাড়ীত খুন্দা মাৰে।
সংঘৰ্ষৰ তীব্ৰতাৰ বাবে এখন গাড়ী ট্ৰাক দুখনৰ মাজত আবদ্ধ হৈ পৰে আৰু চূৰ্ণবিচূৰ্ণ হৈ পৰে। অলপ সময়ৰ ভিতৰতে কেইবাখনো গাড়ীত জুই লাগি যায়। সমগ্ৰ অঞ্চলটো নিমিষতে প্ৰকাণ্ড অগ্নিকাণ্ডলৈ পৰিণত হয়।
আৰক্ষীৰ সূত্ৰ অনুসৰি কমেও ৮ জন লোকৰ মৃত্যু হৈছে, ইয়াৰে অধিকাংশই গাড়ীৰ ভিতৰত আবদ্ধ হৈ অগ্নিদগ্ধ হৈ মৃত্যুমুখত পৰিছে। কমেও ২০জন লোক আহত হোৱাৰ লগতে কেইবাজনো লোকৰ অৱস্থা সংকটজনক।
দুৰ্ঘটনাৰ খবৰ পোৱাৰ পিছতে আৰক্ষী আৰু অগ্নিনিৰ্বাপক বাহিনীৰ লোকে ক্ষীপ্ৰতাৰে সেই স্থানত উপস্থিত হয়। বহু চেষ্টাৰ অন্তত জুই নিয়ন্ত্ৰণ কৰিবলৈ সক্ষম হয়। আহতসকলক ক্ষন্তেকতে ছাছুন হাস্পতালকে ধৰি ওচৰৰ বিভিন্ন চিকিৎসালয়ত ভৰ্তি কৰোৱা হয়।
প্ৰাথমিক তদন্তত ব্ৰেক বিকল আৰু অত্যধিক গতিবেগৰ বাবেই এই দুৰ্ঘটনা সংঘটিত হোৱা বুলি জানিব পৰা গৈছে। ঘটনাস্থলীৰ পৰা প্ৰমাণ সংগ্ৰহ কৰি আছে ফৰেনছিক দলে। এজন আৰক্ষী বিষয়াই জনোৱা মতে, মৃত লোককেইজনৰ পৰিচয় এতিয়াও জানিব পৰা হোৱা নাই।
স্থানীয় ৰাইজে অভিযোগ কৰিছে যে নাভালে দলঙৰ এই অংশটো অতি বিপদজনক। ইয়াৰ পূৰ্বেও একে ঠাইতে কেইবাবাৰো দুৰ্ঘটনা সংঘটিত হৈছে। এনে মৰ্মান্তিক দুৰ্ঘটনা বাৰে বাৰে সংঘটিত হৈ আছে যদিও কোনো স্থায়ী সমাধান লোৱা হোৱা নাই বুলিও তেওঁলোকে কয়।
তেওঁলোকৰ চকুৰ সন্মুখতে সংঘটিত হোৱা দুৰ্ঘটনাটোৰ বিষয়ে এজন প্ৰত্যক্ষদৰ্শীয়ে কয়, “এই সংঘৰ্ষৰ শব্দত আমি স্তম্ভিত হৈ পৰিলোঁ। নিমিষতে গাড়ীবোৰত জুই জ্বলি উঠিল। জুইৰ উত্তাপৰ বাবে কোনোৱে ওচৰলৈও যাব পৰা নাছিল।”
এই মৰ্মান্তিক দুৰ্ঘটনাই পুনৰবাৰ নাভালে দলঙৰ সুৰক্ষাক লৈ প্ৰশ্ন উত্থাপন কৰিছে। ভৱিষ্যতে এনে দুৰ্ঘটনাৰ পৰা হাত সাৰিবলৈ শীঘ্ৰে পদক্ষেপ গ্ৰহণ কৰিবলৈ প্ৰশাসনক দাবী জনাইছে।
