জৱাহৰলাল নেহৰু বিশ্ববিদ্যালয়ৰ (জে এন ইউ) এগৰাকী অধ্যাপকৰ বিৰুদ্ধে যৌন নিৰ্যাতনৰ অভিযোগক কেন্দ্ৰ কৰি চাঞ্চল্য বিয়পি পৰিছে। সূত্ৰ অনুসৰি অধ্যাপকগৰাকীৰ বিৰুদ্ধে যৌন নিৰ্যাতনৰ অভিযোগ উত্থাপন কৰিছে কমেও ১০ গৰাকী শিক্ষাৰ্থীয়ে।
সম্প্ৰতি বিশ্ববিদ্যালয়খনৰ আভ্যন্তৰীণ অভিযোগ সমিতিৰ তদন্ত অব্যাহত আছে। বিশ্ববিদ্যালয়ৰ সূত্ৰ অনুসৰি প্ৰায় এমাহ পূৰ্বে এই অভিযোগ দাখিল কৰা হৈছিল।
এই অভিযোগ পোনপটীয়াকৈ জেএনইউ কমিটীৰ ওচৰত দাখিল কৰা হৈছে। এই কমিটীয়ে কৰ্মক্ষেত্ৰ বা শিক্ষানুষ্ঠানত যৌন নিৰ্যাতনৰ অভিযোগৰ তদন্তৰ বাবে বিশ্ববিদ্যালয়ৰ আভ্যন্তৰীণ ব্যৱস্থা হিচাপে কাম কৰে। অভিযোগ লাভ কৰাৰ পিছত কমিটীয়ে নিয়ম অনুসৰি বিষয়টোৰ তদন্ত আৰম্ভ কৰিছে।
সূত্ৰই দাবী কৰিছে যে অভিযুক্ত অধ্যাপকজন বিশ্ববিদ্যালয় চৌহদতে থাকে। অভিযোগকাৰী শিক্ষাৰ্থীসকলৰ একাংশই দাবী কৰে যে তেওঁ তেওঁলোকক নিজৰ ঘৰত বিভিন্ন পাৰ্টি বা অনুষ্ঠানলৈ মাতিছিল। সেই সময়তে তেওঁলোকৰ সৈতে অশ্লীল আচৰণ বা যৌন ইংগিতপূৰ্ণ মন্তব্য কৰাৰ অভিযোগ উত্থাপন হৈছে । কিছুমান অভিযোগত এই কথাও দাবী কৰা হৈছে যে অধ্যাপকগৰাকীয়ে ক্লাছৰ সময়তো আপত্তিজনক বা অশ্লীল মন্তব্য কৰিছিল।
সূত্ৰ অনুসৰি কমিটীখনে কমেও ১০ গৰাকী শিক্ষাৰ্থীৰ অভিযোগ লাভ কৰিছে। বিষয়টো পোহৰলৈ অহাৰ পিছত জানিব পৰা গৈছে যে আৰু কেইবাগৰাকীও জ্যেষ্ঠ শিক্ষাৰ্থীয়েও একেধৰণৰ অভিযোগ লৈ আগবাঢ়ি আহিছে। ফলত তদন্ত আগবাঢ়ি যোৱাৰ লগে লগে অভিযোগৰ সংখ্যা আৰি বৃদ্ধি পাব বুলি আশংকা কৰা হৈছে।
সম্প্ৰতি কমিটীয়ে অভিযোগৰ বিভিন্ন দিশৰ তদন্ত অব্যাহত ৰাখিছে। সূত্ৰসমূহে জনোৱা মতে, তদন্তৰ অংশ হিচাপে বৰ্তমানৰ শিক্ষাৰ্থীৰ লগতে বিশ্ববিদ্যালয়খনৰ প্ৰাক্তন শিক্ষাৰ্থীৰ সৈতেও কথা পতা হ’ব পাৰে। সেই প্ৰক্ৰিয়াত আৰু কোনো অভিযোগ পোহৰলৈ আহে নেকি সেই সন্দৰ্ভতো চকু ৰখা হৈছে।
ইপিনে, যোগাযোগ কৰাত শিক্ষাৰ্থীৰ প্ৰতিনিধিয়ে বিষয়টো সন্দৰ্ভত কোনো মন্তব্য দিবলৈ অস্বীকাৰ কৰে। কমিটীৰ সদস্য হিচাপে তেওঁলোক গোপনীয়তাৰ শপত খাই আৱদ্ধ থকা বুলি কয়। ফলত তেওঁলোকে ৰাজহুৱাভাৱে তদন্তৰ কোনো তথ্য দিয়া সম্ভৱ নহয়।
এই সন্দৰ্ভত উপাচাৰ্যগৰাকীকো জেৰা কৰা হৈছিল। অৱশ্যে অধ্যাপকগৰাকীৰ বিৰুদ্ধে উত্থাপিত অভিযোগ সন্দৰ্ভত তেওঁ কোনো মন্তব্য নকৰিলে। জানিব পৰা মতে, শীঘ্ৰে বিশ্ববিদ্যালয়খনে বিবৃতি জাৰি কৰিব পাৰে।
আনহাতে, দিল্লী আৰক্ষীৰ এজন ডেপুটি কমিছনাৰে এই ঘটনাত এতিয়ালৈকে আৰক্ষীৰ ওচৰত কোনো অভিযোগ দাখিল কৰা হোৱা নাই বুলি জানিবলৈ দিয়ে। ফলত বৰ্তমান বিশ্ববিদ্যালয়ৰ আভ্যন্তৰীণ অভিযোগ নিৰাময় ব্যৱস্থাৰ জৰিয়তেই বিষয়টোৰ তদন্ত চলি আছে। তদন্ত সম্পূৰ্ণ নোহোৱালৈকে অভিযোগৰ সত্যতা সন্দৰ্ভত চূড়ান্ত সিদ্ধান্তত উপনীত হোৱা সম্ভৱ নহয়।
