নগাঁও জিলাৰ চামগুৰি সমষ্টি অন্তৰ্ভুক্ত আমনিস্থিত নিমন্ত্ৰণী হোটেলত আজি বিয়লি অসম চাহ জনজাতি ছাত্ৰ সন্থাৰ কলিয়াবৰ শাখা সমিতিয়ে বিভিন্ন সমস্যা সমাধানৰ দাবীত এখন সংবাদমেল আয়োজন কৰে।
উক্ত সংবাদমেলত অসম চৰকাৰৰ লগতে বিভিন্ন ৰাজনৈতিক দলক ক্ষুৰধাৰ সমালোচনা কৰি ছাত্ৰ সংগঠনটোৱে কয় যে চাহ জনগোষ্ঠী তথা কলিয়াবৰবাসী ৰাইজৰ সমস্যাক লৈ বিগত সময়ৰ কংগ্ৰেছ চৰকাৰে চাহ জনগোষ্ঠীটোক ঠক প্ৰবঞ্চনা কৰি গ’ল আৰু বৰ্তমান শাসনাধিষ্ঠিত চৰকাৰেও চাহ শ্ৰমিক তথা বাগান বস্তিৰ এলেকাৰ মানুহক বিভিন্ন সুবিধাৰ পৰা বঞ্চিত কৰি আহিছে।
কলিয়াবৰৰ সাংসদ গৌৰৱ গগৈয়ে কোনো দিনে চাহ শ্ৰমিকৰ সমস্যাৰ বুজ ল’বলৈ নাহিল, মাথো নিৰ্বাচন আহিলেই ভোট বিচাৰি আহে। ঠিক তেনেকৈ স্থানীয় বিধায়ক তথা মন্ত্ৰী হৈও চিকনী চাহ বাগিছাৰ শ্ৰমিক সকলৰ কোনো সমস্যা সমাধান কৰাৰ পদক্ষেপ লোৱা পৰিলক্ষিত হোৱা নাই বুলিও সংবাদমেলত উল্লেখ কৰে।
আজিৰ সংবাদ মেলৰ জৰিয়তে অসমৰ মুখ্য মন্ত্ৰী সৰ্বানন্দ সোণোৱালক সকিয়াই দি সংগঠনটোৱে কয় যে, ‘বাগান বস্তিৰ অঞ্চলবোৰৰ ৰাইজক যাতে সমাগত লোকসভা নিৰ্ব্বাচনত টকাৰ প্ৰলোভন দি মদ খোৱাই বিভিন্ন ৰাজনৈতিক দলে প্ৰলোভিত নকৰে।’ লগতে আটছাই জনগোষ্ঠীটোৰ ৰাইজক বিবেক ভোট প্ৰদান কৰিবলৈ আহ্বান জনায়।
আনহাতে সংবাদমেলৰ পিছতেই আমনিৰ ৩৭ নং ৰাষ্ট্ৰীয় ঘাইপথত ছাত্ৰ সংগঠনটোৱে জনজাতিকৰণ, মাটিৰ পট্টা প্ৰদান, চাহ শ্ৰমিকৰ দৈনিক মজুৰি ৩৫১ টকালৈ বৃদ্ধি কৰাকে ধৰি বিভিন্ন সমস্যাৰ সমাধান দাবীত সাংসদ গৌৰৱ গগৈ, সৰ্বানন্দ সোণোৱাল, মন্ত্ৰী কেশৱ মহন্তৰ পুতুলিকা দাহ কৰি তীব্ৰ প্ৰতিবাদ সাব্যস্ত কৰে।
