নগাঁও জিলাৰ পুৰণিগুদাম ৰাধাকান্ত বৰুৱা উচ্চতৰ মাধ্যমিক বিদ্যালয়ত আজি বিয়লি এক উত্তপ্ত পৰিস্থিতিৰ সৃষ্টি হয়।
জানিব পৰা মতে বিদ্যালয়খনত ৫ ছেপ্তেম্বৰত অনুষ্ঠিত হ’ব লগা শিক্ষক দিৱসৰ লগতে ৬ আৰু ৭ ছেপ্তেম্বৰত অনুষ্ঠিত হ’ব লগা নৱাগত আদৰণি সভাৰ বিভিন্ন কাৰ্যসূচীৰ বাবে প্ৰস্তুতিৰ কাম-কাজ চলি আছিল।
সেই সময়তে পুৰণিগুদাম চলচলিৰ তিনিজন যুৱকে বিদ্যালয়খনত অনাধিকাৰ প্ৰবেশৰ চেষ্টা চলাই এক হুলস্থুলীয়া পৰিবেশ সৃষ্টি কৰে। আনকি যুৱক তিনিজনে বিদ্যালয়খনৰ ছাত্ৰ একতা সভাৰ সাধাৰণ সম্পাদক পুলক বৰাৰ লগত তৰ্ক-বিতৰ্কতো লিপ্ত হয়।
ফলত বিদ্যালয় কৰ্তৃপক্ষই পুৰণিগুদাম আৰক্ষীক খবৰ দিয়ে। আৰু সেই অনুসৰি পুৰণিগুদাম আৰক্ষী বিদ্যালয়ত উপস্থিত হৈ উদণ্ড যুৱক তিনি জনক আটক কৰে।
ইয়াতে খৰ্গহস্ত হৈ যুৱক তিনিজনৰ পৰিয়ালৰ নুৰুল আমিন নামৰ এজন লোকে একাংশ যুৱকক লগত লৈ সন্ধিয়া বিদ্যালয়ত উপস্থিত হৈ বিদ্যালয়ৰ আচবাব নষ্ট কৰাৰ লগতে ছাত্ৰ একতা সভাৰ সম্পাদকক আক্ৰমণ কৰি গুৰুতৰ ভাৱে আহত কৰে।
ইয়াৰ উপৰিও দলটোৱে বিদ্যালয়ৰ অধক্ষ্যা গৰাকীলৈ চোঁচা লৈ আক্ৰমণ কৰাৰ গুৰুতৰ অভিযোগ উত্থাপন কৰিছে অধক্ষ্যা সন্ধ্যা বৰুৱাই।
ঘটনা সন্দৰ্ভত বিদ্যালয় কৰ্তৃপক্ষই চামগুৰি আৰক্ষীক এজাহাৰ দাখিল কৰাৰ পিছতে মূল অভিযুক্ত নুৰুল আমিনৰ লগতে মুঠ চাৰিজনক আটক কৰি চামগুৰি আৰক্ষী থানালৈ লৈ যায়। ইফালে বিদ্যালয়ৰ অধক্ষ্যা সন্ধ্যা বৰুৱাসহ বিদ্যালয় কৰ্তৃপক্ষই ঘটনাৰ এক উচিত তদন্তৰ দাবীত নগাঁও আৰক্ষী অধীক্ষকক অৱগত কৰিছে বুলি জানিব পৰা গৈছে।
আনহাতে উদণ্ড লোকৰ আক্ৰমণত গুৰুতৰভাৱে আহত হোৱা ছাত্ৰ একতা সভাৰ সাধাৰণ সম্পাদক পুলক বৰাক ততাতৈয়াকৈ নগাঁও ভোগেশ্বৰী ফুকননী অসামৰিক চিকিৎসালত অতি সংকটজনক অৱস্থাত ভৰ্তি কৰোৱা হয়।