‘কাৰোবাৰ ধৰ্মক লৈ আক্ৰমণ কৰাটো একোজন মানুহে কৰিব পৰা আটাইতকৈ লজ্জাজনক কাম। সকলোৱে নিজৰ মত প্ৰকাশ কৰাৰ অধিকাৰ আছে, কিন্তু ধৰ্মৰ ভিত্তিত কাৰোবাক বৈষম্য কৰাটো ব্যক্তিগতভাৱে মই ভাবিব নোৱাৰো।’’ সমালোচকসকললৈ এইবাৰ এইদৰে বাক্যবাণ নিক্ষেপ কৰিছে টীম ইণ্ডিয়াৰ অধিনায়ক বিৰাট কোহলীয়ে।
শেহতীয়াকৈ সামাজিক মাধ্যমক ভাৰতীয় পেচাৰ মহম্মদ ছামীৰ প্ৰতি সমালোচকসকলে কৰা আক্ৰমণৰ প্ৰত্যুত্তৰত অৱশেষত সাংবাদিকৰ আগত এইদৰে মন্তব্য কৰে কোহলীয়ে।
ছামীক ট্ৰ’ল কৰি থকাসকলক মেৰুদণ্ডহীন বুলিও কোহলীয়ে কয়। কয় যে টীম ইণ্ডিয়াৰ সফলতাত ছামীৰ সুন্দৰ অৰিহণা আছে। এনে পৰিস্থিতিত বৰ্তমান বিশ্বকাপত ব্যস্ত থকা টীম ইণ্ডিয়াই ছামীৰ পক্ষত ২০০ শতাংশ অৱস্থান কৰা বুলিও কোহলীয়ে জনায়।
উল্লেখযোগ্য যে পাকিস্তানৰ হাতত ভাৰতে টি-২০ বিশ্বকাপত পৰাজিত হোৱাৰ পাছতে ভক্তসকলে ভাৰতীয় পেচাৰ মহম্মদ স্বামীক আক্ৰমণৰ লক্ষ্য কৰি লৈছিল। ছামীয়ে মেচখনত উন্নত প্ৰদৰ্শন আগবঢ়াব পৰা নাছিল। সেয়ে সামাজিক মাধ্যমযোগে সমালোচকসকলে ছামীক দেশদ্ৰোহী আখ্যা দিছিল।
তদুপৰি পাকিস্তানলৈ গুচি যাবলৈও হুমকি প্ৰদান কৰিছিল। তাৰপাছতে বিষয়টোৱে ব্যাপক চৰ্চাত আছে। শচীন টেণ্ডুলকাৰ, বীৰেন্দৰ সেহৱাগকে ধৰি টীম ইণ্ডিয়াৰ বহুকেইজন প্ৰাক্তন তাৰকাৰ উপৰিও বিচিচিআইয়েও ছামীৰ পক্ষত অৱ্স্থান কৰিছে।
অৱশেষত সমালোচকসকলৰ বিৰুদ্ধে কৰা কোহলীৰ এই ভাষ্যই এক শক্তিশালী বাৰ্তা প্ৰেৰণ কৰিছে।