জম্মু আৰু কাশ্মীৰ পুনৰ সংঘটিত হৈছে গুলীচালনাৰ ঘটনা। ভাৰতীয় সেনাৰ সৈতে হোৱা তীব্ৰ সংঘৰ্ষত অৰণ্যৰ মাজত ঘাটি পাতি থকা দুজন জেহাদী নিহত হৈছে। এতিয়ালৈকে তেওঁলোকৰ পৰিচয় ৰাজহুৱা হোৱা নাই। অৱশ্যে এক নিৰ্ভৰযোগ্য সূত্ৰৰ পৰা জানিব পৰা মতে নিহত দুয়োজনেই পাকিস্তানৰ সমৰ্থনপুষ্ট সন্ত্ৰাসবাদী সংগঠন জইছ-ই-মহম্মদৰ সদস্য।
বুধবাৰে এক গোপন সূত্ৰৰ জৰিয়তে ভাৰতীয় সেনাই খবৰ লাভ কৰিছিল যে কাশ্মীৰৰ উধমপুৰ জিলাৰ সোহান অঞ্চলৰ ঘন অৰণ্যত কেইজনমান সন্ত্ৰাসবাদীয়ে আত্মগোপন কৰি আছে। ইয়াৰ পিছতেই ভাৰতীয় সেনাৰ ৰাষ্ট্ৰীয় ৰাইফলছ, পেৰা স্পেচিয়েল ফৰ্চ আৰু জম্মু-কাশ্মীৰ আৰক্ষীয়ে ততাতৈয়াকৈ এক যুটীয়া অভিযান আৰম্ভ কৰে। সমগ্ৰ অঞ্চলটো ঘেৰাও কৰি তন্নতন্নকৈ তালাচী চলোৱা হয়। পলাই সাৰিবলৈ কোনো পথ নেপায় সন্ত্ৰাসবাদী দুজন আতংকিত হৈ পৰে আৰু নিৰাপত্তাৰক্ষীৰ দিশলৈ লক্ষ্য কৰি গুলীচালনা কৰিবলৈ আৰম্ভ কৰে। সেনায়ো লগে লগে ইয়াৰ উচিত প্ৰত্যুত্তৰ দিয়ে। নিশাৰ অন্ধকাৰত দীৰ্ঘ সময় ধৰি দুয়োপক্ষৰ মাজত গুলীয়াগুলী চলে। অৱশেষত পুৱতি নিশা যুটীয়া বাহিনীৰ গুলীত সন্ত্ৰাসবাদী দুজনৰ মৃত্যু হয়। তেওঁলোকৰ কাষৰ পৰা প্ৰচুৰ পৰিমাণৰ অত্যাধুনিক অস্ত্ৰ-শস্ত্ৰ আৰু গুলী-বাৰুদ উদ্ধাৰ কৰা হৈছে।
উল্লেখযোগ্য যে, শেহতীয়াকৈ কাশ্মীৰৰ ডোডা অঞ্চলতো নিৰাপত্তাৰক্ষীৰ গুলীত এজন জইছ সন্ত্ৰাসবাদী নিহত হৈছিল। সেই সন্ত্ৰাসবাদীজনৰ মৃতদেহৰ কাষৰ পৰা এম ফ’ৰ কাৰ্বাইন নামৰ এটা স্বয়ংক্ৰিয় ৰাইফল উদ্ধাৰ কৰা হৈছিল। নিশাৰ ভাগত অভিযান চলাবৰ বাবে এই অস্ত্ৰবিধত বিশেষ নাইট ভিজন টেলিস্কোপ সংলগ্ন কৰা থাকে। সীমান্তৱৰ্তী পাহাৰীয়া অঞ্চলসমূহত সন্ত্ৰাসবাদীয়ে সাধাৰণতে এনেধৰণৰ অত্যাধুনিক অস্ত্ৰ ব্যৱহাৰ কৰিয়েই কূটাঘাতমূলক কাৰ্য সংঘটিত কৰে। সেই ঘটনাৰ প্ৰভাৱ মাৰ নৌযাওঁতেই পুনৰবাৰ সন্ত্ৰাসবাদী আৰু সেনাৰ মাজৰ সংঘৰ্ষত ভূস্বৰ্গ কাশ্মীৰ কঁপি উঠে।
