এগৰাকী মহিলাৰ কাপোৰ খোলাৰ চেষ্টা কৰা আৰু তেওঁৰ বুকুত হাত দি শাৰীৰিকভাৱে হাৰাশাস্তি কৰাটোক ‘ধৰ্ষণৰ চেষ্টা‘ বুলি গণ্য কৰিব নোৱাৰি। শেহতীয়াকৈ পাটন উচ্চ ন্যায়ালয়ে এই ৰায় দিছিল। এই ৰায়ক কেন্দ্ৰ কৰি এতিয়া উচ্চতম ন্যায়ালয়ে এক স্বতঃপ্ৰণোদিত গোচৰ গ্ৰহণ কৰিছে।
উচ্চতম ন্যায়ালয়ৰ বিচাৰপতি সূৰ্য কান্তে বিহাৰৰ মহাধিবক্তা এছ ডি সঞ্জয়ক উদ্দেশ্যি কয় যে পাটন উচ্চ ন্যায়ালয়ৰ এই ৰায়ত কিছুমান আপত্তিজনক মন্তব্য আছে। অৱশ্যে অভিযুক্তৰ ভাষ্য নুশুনাকৈ উচ্চ ন্যায়ালয়ৰ ৰায় বাতিল কৰা সম্ভৱ নহয় বুলিও তেওঁ প্ৰকাশ কৰে। সেয়েহে স্থানীয় আৰক্ষীৰ জৰিয়তে অভিযুক্তৰ হাতত যাতে জাননী গৈ পৰে, সেয়া নিশ্চিত কৰিবলৈ বিচাৰপতিগৰাকীয়ে নিৰ্দেশ দিছে।
পাটন উচ্চ ন্যায়ালয়ে নিজৰ ৰায়ত স্পষ্টকৈ কৈছিল যে এগৰাকী মহিলাৰ কাপোৰ খোলাৰ চেষ্টা কৰা বা বুকুত হেঁচা দি শাৰীৰিক নিৰ্যাতন চলোৱাটো ধৰ্ষণৰ চেষ্টা হ‘ব নোৱাৰে। ন্যায়ালয়ৰ মতে, যদি ধৰ্ষণৰ উদ্দেশ্য প্ৰমাণ কৰিব পৰাকৈ কোনো স্পষ্ট কাম বা প্ৰৱেশৰ দৰে প্ৰমাণ নাথাকে, তেন্তে ইয়াক ধৰ্ষণৰ চেষ্টা হিচাপে ধৰা নহ‘ব। উচ্চ ন্যায়ালয়ে লগতে কয় যে এনে অভিযোগ সৰ্বাধিক এগৰাকী মহিলাৰ শালীনতা হানি কৰা অপৰাধৰ অধীনতহে পৰিব পাৰে, যিটো ভাৰতীয় দণ্ডবিধিৰ ৩৫৪ ধাৰাত উল্লেখ আছে। সেইবাবে ন্যায়ালয়ে ৩৭৬ ধাৰাৰ লগতে ৫১১ ধাৰা সংলগ্ন কৰি দিয়া শাস্তি বাতিল কৰিছিল।
ইয়াৰ পূৰ্বে যোৱা জুলাই মাহত অন্য এটা গোচৰৰ শুনানিৰ সময়ত পাটন উচ্চ ন্যায়ালয়ৰ এই ৰায়ৰ বিষয়ে উচ্চতম ন্যায়ালয়ক অৱগত কৰা হৈছিল। সেই সময়ত এলাহাবাদ উচ্চ ন্যায়ালয়ৰ এক একেধৰণৰ ৰায়ক লৈ উচ্চতম ন্যায়ালয়ে স্বতঃপ্ৰণোদিত গোচৰ চলাই আছিল। এলাহাবাদ উচ্চ ন্যায়ালয়ে কৈছিল যে এগৰাকী নাবালিকাৰ স্তনত হেঁচা মৰা, পিন্ধি থকা কাপোৰ ফালি পেলোৱা আৰু দলঙৰ তললৈ টানি নিয়াৰ চেষ্টাক ধৰ্ষণৰ চেষ্টা বুলি ক‘ব নোৱাৰি।
সেই শুনানিৰ সময়ত জ্যেষ্ঠ অধিবক্তা শোভা গুপ্তাই উচ্চতম ন্যায়ালয়ক জনাইছিল যে এলাহাবাদ উচ্চ ন্যায়ালয়ৰ সেই ৰায়টো উচ্চতম ন্যায়ালয়ে ইতিমধ্যে বাতিল কৰিছে, কিন্তু একেধৰণৰ ঘটনাৰ ভিত্তিত পাটন উচ্চ ন্যায়ালয়েও এনে পৰ্যবেক্ষণ দিছে। জ্যেষ্ঠ অধিবক্তা এইচ এছ ফুলকায়ো এই কথাত সন্মতি প্ৰকাশ কৰিছিল। ইয়াৰ পিছতে উচ্চতম ন্যায়ালয়ে এলাহাবাদ উচ্চ ন্যায়ালয়ৰ বিতৰ্কিত ৰায়টো বাতিল কৰাৰ লগতে যৌন অপৰাধ সংক্ৰান্তীয় গোচৰবোৰত বিচাৰকসকলক অধিক সংবেদনশীলতাৰে বিচাৰ কৰিবলৈ একাধিক নিৰ্দেশনা জাৰি কৰিছে।
