অষ্ট্ৰেলিয়াই আজি দেশভ্ৰমণৰ উদ্দেশ্যে ভাৰতৰ কোভাক্সিনক স্বীকৃতি দিছে। আন্তঃৰাষ্ট্ৰীয় ভ্ৰমণৰ ক্ষেত্ৰত কোভাক্সিনে অনুমোদন লাভ নকৰাৰ মাজতে অষ্ট্ৰেলিয়াৰ এই স্বীকৃতিয়ে বিশেষ গুৰুত্ব লাভ কৰিছে।
ভাৰত বায়োটেকৰ দ্বাৰা নিৰ্মিত কোভাক্সিন আৰু চীনৰ চিনোফাৰ্মৰ দ্বাৰা নিৰ্মিত বিবিআইবিপি-কৰ্ভি ভেকছিন ভ্ৰমণকাৰীৰ ক্ষেত্ৰত স্বীকৃত কৰা হ’ব। ১২ বছৰ বা তাতকৈ অধিক বয়সৰ যিসকল ব্যক্তিক কভাক্সিনৰ আৰু বিবিআইবিপি-কৰ্ভিৰ টিকাকৰণ কৰা হৈছে তেওঁলোকে অষ্ট্ৰেলিয়া ভ্ৰমণৰ স্বীকৃতি লাভ কৰিব।” – অষ্ট্ৰেলিয়া চৰকাৰৰ এক সংবাদ মাধ্যমৰ বিজ্ঞপ্তিত এই কথা প্ৰকাশ পাইছে।
“এই স্বীকৃতিৰ ফলত চীন আৰু ভাৰতৰ লগতে কোভাক্সিন আৰু বিবিআইবিপি-কৰ্ভি প্ৰয়োগ কৰা আন দেশসমূহৰ বহুতো নাগৰিকৰ ক্ষেত্ৰত এতিয়া অষ্ট্ৰেলিয়াত প্ৰৱেশৰ সময়ত সম্পূৰ্ণৰূপে টিকাকৰণ কৰা বুলি বিবেচনা কৰা হ’ব। ইয়াৰ ফলত আন্তঃৰাষ্ট্ৰীয় শিক্ষাৰ্থীসকলৰ উভতি অহাৰ ওপৰত গুৰুত্বপূৰ্ণ প্ৰভাৱ পৰিব, আৰু দক্ষ আৰু অদক্ষ শ্ৰমিকৰ অষ্ট্ৰেলিয়া ভ্ৰমণৰ ওপৰত গুৰুত্বপূৰ্ণ প্ৰভাৱ পৰিব।” সংবাদ মাধ্যমৰ বিজ্ঞপ্তিত লগতে কোৱা হৈছে।
থেৰাপিউটিক সামগ্ৰীৰ বাবে অষ্ট্ৰেলিয়াৰ নিয়ামক কৰ্তৃপক্ষ থেৰাপিউটিক সামগ্ৰী প্ৰশাসন(TGA) য়ে কয় যে এই ভেকছিনবোৰে সুৰক্ষা প্ৰদান কৰে আৰু এজন ভ্ৰমণকাৰীয়ে অষ্ট্ৰেলিয়াত থাকোঁতে আনলৈ কোভিড-১৯ সংক্ৰমণ কৰা বা কোভিড-১৯ৰ বাবে তীব্ৰভাৱে অসুস্থ হোৱাৰ সম্ভাৱনা হ্ৰাস কৰে।
ইয়াৰ পূৰ্বে TGA এ পৰামৰ্শ দিছিল যে কেৱল অষ্ট্ৰেলিয়াত ব্যৱহাৰৰ বাবে অনুমোদিত ভেকছিন আৰু ভাৰতৰ পৰা কভিশ্বিল্ড আৰু চীনৰ চিনোভাক ভ্ৰমণৰ ক্ষেত্ৰত স্বীকৃতি দিয়া হ’ব।
টিকাকৰণ নোহোৱা যাত্ৰীসকলে এতিয়াও ভ্ৰমনৰ ক্ষেত্ৰত বাধাৰ সন্মুখীন হ’ব আৰু সকলো যাত্ৰীক বৰ্ডিঙৰ আগতে ঋণাত্মক কোভিড-১৯ পৰীক্ষাৰ প্ৰমাণৰ প্ৰয়োজন। অষ্ট্ৰেলিয়াই আগতে কেৱল সীমিত সংখ্যক নাগৰিক আৰু স্থায়ী বাসিন্দাক বিদেশৰ পৰা উভতি আহিবলৈ দিছিল।
